Read Kapampangan Ecclessiasticu 28 Bible Online

Ecclessiasticu 28 - Kapampangan bible

Ecclessiasticu 28

¹Ing taung mapagbengansa[50] tanggapan na ing bengansa ning Ginung makibalu karing sablang kasalanan ning ninuman.

²Patawaran mu ing depat nang pamikasala keka ning kalupa mung tau. At potang manalangin ka mipatawaran ing kekang kasalanan.

³E na tanggapan ning tatanam mua king kalupa nang tau ing lunus[51] ning Ginu.

⁴Nung ala yang lunus ing tau king kalupa nang tau, makananu yang makapaniawad kapatawaran karing kasalanan na?

⁵Tau ka mu at mitatanam kang mua, oneng kaninu ka maniawad kapatawaran para karing kekang kasalanan?

⁶E mu kakalinguan king datang ing aldo a ika mate ka at malaso ya ing kekang katawan. Inya ilako mu na ing mua at mamintu ka karing utus ning Ginu.

⁷E mu la kakalinguan ding kautusan at e ka paimua king kalupa mung tau. Ganakan me ing kasunduan ning Kakataskatasan at e mo papansinan ding kamalian ding aliwa.

⁸Pangilagan mu ing pamakipate ban e ka parating mikakasala, uling ing pelian buntuk ya ing pasari king pamakipate.

⁹Pipapate na la ning makasalanan ding mikaluguran at sasalbag yang kaguluan karing taung mibiebie king kapayapan.

¹⁰Lalung milalablab ing api uli ning daragdag a panangab, at papali ing pamakipate uli ning dakal a kesiasan a lub. Nung nu ya anti kasikan o kabandi ing ninuman, ing mua na makanyan munaman.

¹¹Ing bugasuk a pamagsalita pasari na ing pelian buntuk; ing biglang pelian buntuk miyangganan king pamipatayan.

¹²Tiupan me ing baya at mitau ya; luran me matda ya. Isanu man kareti ing asbuk ya ing pasari.

¹³Isumpa la ding maindredus at ding malaram, uling dakal na lang taung payapa ding karelang sinira.

¹⁴Dakal ne sinira ing mapakialam a dila, inya dakal lang taung maglipat-lipat karing aliwang bansa. E mu iti ing daraptan ning manyirang dila; lesak na la pati balen a payapa at tuknangan ding taung kagalang-galang lesak na la.

¹⁵Uli ning dilang mapakialam dakal lang tapat a babaing kewanian ding karelang asawa, at mewala ing sablang karelang pipagalan.

¹⁶Ing ninumang makiramdam king dilang manyira e ya mipaindatun kapilan man ni mika kapayapan king kaisipan na.

¹⁷Ing barug ning latiku maglate, oneng ing barug ning manyirang dila king kilub ya daraya.

¹⁸Mas dakal la ding mete king taram ning dila kesa king taram ning espada.

¹⁹Masuerti ya ing taung miligtas king dilang mataram at e mibata king bigsikan na o megapus king tanikala na o mipasuluran king paud na.

²⁰Uling bakal ya ing paud na at tangsu ya ing tanikala na.

²¹Ing pasari na ning mapanyirang dila ya ing makapangilabut a kamatayan, inya mayap pa ing mete na ka.

²²Oneng ding taung king Ginu tapat e no ananu balang ning dilang manyira, e no asilab ning milablab nang api.

²³Ding biktima na ila mu detang ginulut king Ginu. E na malyaring patdan pa ing silab ning dilang manyira. Anti ing leon, itikma na la at anti ing leopardo paglapakan na la.

²⁴Babakuran me ing kekang gabun at atin yang susi ing pisisinupan mung pilak at gintu ban maingat la,

²⁵inya keka lang ingatan at timbangan ding amanung kekang sasabian. Gawa kang pasbul at kandadu para king kekang asbuk.

²⁶Mingat ka magkang mitalusad ya ing kekang dila, at mibagsak ka arap da ring kalaban a manenaya keka.