Read Kapampangan Ecclessiasticu 29 Bible Online

Ecclessiasticu 29 - Kapampangan bible

Ecclessiasticu 29

¹Pamaniapat mayap ing paraman ya ing kekang kasiping bale; tutuparan mu ne kanita ing kautusan, nung keka yang sasaupan.

²Paraman me ing kalupa mung tau king oras ning pamangailangan na; nung ika ing mendam mamayad ka king takdang panaun.

³Tuparan mu ing kekang pangaku at maging tapat ka, at king oras ning kekang pamangailangan ating sumaup keka.

⁴Dakal lang taung bala ra ing utang suerti yang kabud na dinatang, inya papagkasakitan da lang karelang pikautangnan.

⁵Potang manutang la simba-siklaud la king pipanutangnan da; alang tuknang ing karelang pamamuri. Oneng potang oras nang mamayad piliban-liban da at dakal la balung sabian a sangkan.

⁶Nung sakaling mepilit lang mamayad, kapitna mu ing karelang bayaran, inya sukat neng tumula ing pipanutangnan. Ing maralas malilyari ya pin ing lalbug la ding salaping meyandam, at maging kalaban ya ing menandam. Palmura at sumpa ampon keyalan kapasalamatan ing tanggapan da ring peparam.

⁷Inya dakal na lang e bisang param; e uling maimut la, nune uli ning takut a mapirait la.

⁸Makanyan man, maging maganaka ka karing kalulu. E mu no painipan pa king saup a kekang ibie.

⁹Alang-alang king kautusan, saupan lang kalulu; e la palakuan alang daralan detang mangailangan.

¹⁰Mas mayap ing mawala lang salapi para karing kapatad o kakaluguran kesa king kanan na la ning kalawang.

¹¹Gamitan mu lang kekang salapi agpang king kautusan ning Kakataskatasan, at makinabang kang lalung dakal kesa king gintu.

¹²Ibilang mung maragul a pibandian ing pamamie limus karing kalulu, at iti magsilbing kaligtasan king sablang kekang kakulangan.

¹³Agamit mung parati ing pamamie limus laban karing kalaban; maygit ya karing matibe kalasag at matibe tandus.

¹⁴Tatalakaran ne ning mayap a tau ing utang ning kalupa nang tau; e na daptan ning alang marine tau ing anti kanita.

¹⁵Nung ating taung menalakaran ban makapanandam ka, e mu kakalinguan king atin kang utang a lub keting tau, uling teya na ing pangatau na para keka.

¹⁶Ating palpikasala a pawalan dang ulaga ing pamanalakaran para karela; ala lang pasalamat at kakalinguan de ing taung sinaup karela.

¹⁷Dakal lang taung ating pibandian a mekalulu uli ning karelang pamanalakaran, ing sibukan da anting bagyung manyira king bie ra.

¹⁸Menga-embargu la tuknangan ding atinan uli ning karelang pamanalakaran, at ngeni lakad-lakad la karing aliwang bansa.

¹⁹Ing taung manalakaran ban manakitan tanggapan na ing dakal a dalum laban king pangatau na.

²⁰Saupan me ing kalupa mung tau king anggang agyu mu, oneng ingatan mung e ka mipahamak.

²¹Ing maulagang diling kailangan ning tau ya ing danum, pamangan, imalan, at tuknangan nung nu ka makapagdili-dili.

²²Mas mayap ing manuknangan ka king pakakalulung kubu kesa king mamangan kang maniaman king bale ning aliwang tau.

²³Sukat kang tumula ketang atyu keka agyang pang ditak mu ban e ka mipamalagyuan makikipangan nia mu.

²⁴Makalunus ing mabibie makipanuknangan karing miyayaliwang bale; e ka makapagsalita uling makipanuknangan ka mu.

²⁵Ika ing talasalubung at babie inuman karing bisitang daratang a ala mang pasalamat king kekang daraptan. Mangalati ka potang karelang sabian:

²⁶Hoy dayuan, isadia me ing pipanganan, at pakanan mu na ku nung atin na kang ayapag.

²⁷O kaya sabian da, Mabating na ka, dayuan; atin kung bisitang datang, datang ya ing kapatad ku at kailangan ne ing kuartung pitutudturan mu.

²⁸Tune masakit king taung ating pegaralan ing pamaramdaman ne ning makibale o ing tagal-tagalan ne ning pikautangnan na.