Read Kapampangan Ecclessiasticu 3 Bible Online

Ecclessiasticu 3 - Kapampangan bible

Ecclessiasticu 3

¹Anak, aku i tata yu; makiramdam kayu kanaku. Daptan yu ing sabian ku kekayu at milisia kayu king panganib.

²Dininan na lang upaya ning Ginu ding pengaring lalaki karing anak da, at dininan pakibatan ding anak karing pengari dang babai.

³Mipatawaran la ding kasalanan yu, nung galangan ye i tata yu;

⁴at manakitan kayung dakal a pibandian, nung parangalan ye i ima yu.

⁵Nung galangan ye i tata yu, datang ing panaun a ding anak yu paligayan da kayu at pakibatan ning Ginu ing panalangin yu.

⁶Kumaba ing bie yu, nung ing utus ning Ginu pamintuan yu king kapamilatan ning pamipaligaya yu kang tata yu at ima yu.

⁷Mengari kayu sanang ipus neng pamintuan yu la ding pengari yu.

⁸Galangan ye i tata yu king sablang daraptan yu at amanu ba yung tanggapan ing bendisyun na.

⁹Uling ing bendisyun ning tata gagawan neng matatag ing tuknangan da ring penganak, oneng malasak ya neng paniumpa da la ring anak da.

¹⁰E yu ikakatula ing kamarinayan a miras kang tata yu, uling ing pangapakarine na e munie dangalan kekayu.

¹¹Ing maging dangalan ning tau manibatan king pangatau nang tata na. Ing pengaring babaing e ra gagalangan ding anak na, kamarinayan iti karela.

¹²Anak, e yu la paburen ding tata yu potang matua na la. E yu la sana dirinan sukal a lub kabang mabie la.

¹³Panupaya yu la sana potang mangalinguan na la; e yu la lalapastanganan ngening kasiknang-siknangan yu.

¹⁴E na kalinguan ning Ginu ing malasakit a depat yu karing tata yu; iti makasaup king pangapatawaran ning kasalanan yu.

¹⁵Ganakan ning Ginu ing depat yung mayap karing tata yu, at ding kasalanan yu malaso lang tunggal ditak anti ing yelu a miyaslagan king aldo.

¹⁶Anti na mong ing Dios ya ing lalapastanganan yu neng kakalinguan yo ding tata yu, at isumpa ne ning Ginu ing ninumang penganak a pamua kang ima na.

¹⁷Anak ko, maging mapagpakumbaba ka sana king sablang daraptan mu, at kilalanan da iti ding tau maygit king isanu mang regalu.

¹⁸Kabang mirarangal ka, kanita ka sa lalung magpakumbaba; tumula ya kanita keka ing Ginu.[6]

²⁰Tune maragul ing upaya na ning Ginu, at miparangalan ya king kapamilatan da ring mapagpakumbaba.

²¹E mu na la sana pakikuanan pang pakaintindian detang bage masakit pakiabutan o sasaliksikan detang bage a alang kang upayang atagpuan la.

²²Ing pibulayan mu na mu ya ing Kautusan a binie ning Ginu keka. E mu na la pangabalanan pa detang bage e na sinabi ning Ginu.

²³E mu na la sa pakialaman deta uling dakal na ing mituru keka a e na abut isipan ning tau.

²⁴Dakal na la deng taung melili uli na ning sarili dang kapamalakan at e ustung kaisipan.[7]

²⁶Idala na ka mu ning kesiasan buntuk king kapahamakan at mate ya king panganib ing mahilig king panganib.

²⁷Mipasubu ya karing dakal a kaligaligan ing taung masias a buntuk. Ala lang patugut mitatambak kasalanan ding palpikasala.

²⁸Alang makaulu karing kasakitan na ning taung palalu, uling atin neng yamut ing e mayap king bie na.

²⁹Lalu lang mabibiasa deng biasa king pamagaral da karing kasebian at karing talimhaga. Makiramdam la uling bisa lang mabiasa.

³⁰Nung makananu nang apapatda ning danum ing mikakalabkab a api, makanyan mipatawaran ing kasalanan king kapamilatan na ning pamamie limus.

³¹Magsadia ya para king daratang a panaun ing ninumang sasaup darapat mayap karing aliwa; ating sumaup potang datang ing pamangailangan na.