Read Kapampangan Ecclessiasticu 30 Bible Online

Ecclessiasticu 30 - Kapampangan bible

Ecclessiasticu 30

¹Babarugan ne ning malugud a pengari ing anak na ban potang dagul ya maging ligaya ne.

²Mupul yang dakal a pakinabang ing pengaring minie turu king anak na, at apagmaragul ne karing kakaluguran na.

³E mu ing apagmaragul ne ning pengaring minie mayap a turu, nune karirian de pa ding kalaban na.

⁴Agyang pang mete ne ing pengari balamu mabie ya pa mu rin, uling ing likuan nang anak kalupa ne.

⁵Kabang mabie ya pa, paligayan na ne ning anak na at ala yang pigaganakan potang mate ne.

⁶Atin yang likuan a anak a singil karing kalaban na, at ya ing mamayad karing taung pikautangan nang lub.

⁷Oneng ing pengaring kusintirul king anak na dakal ya uluan a sugat, at manganerbiusan ya kabud makaramdam yang kulisak.

⁸Ing kabayung e mituruanan masakit yang rendan, at ing anak a e medisiplina makanyan ya naman.

⁹Nung kusintian me ing anak at ibie sabla nang aduan e lumuat ika ing pamatakutan na ampon pakiakan.

¹⁰E mu kaylian ing kalokuan na, nung e mu buring kumiak kang kayabe na at mitigis a ipan.

¹¹Kabang anak ya pa, e mu paintulut ing sablang buri nang daptan at e ka magbulag-bulagan king depat nang kamalian.

¹²Pamaklian mu ne butul o barugan mu ne kabang anak ya pa ban e ya dagul masias a buntuk at lapastangan keka at pasukalan na lub.

¹³Disiplinan me ing anak mu at ituru meng magobra ban e na ka pamakarine o sugatan a kapanamdaman.

¹⁴Mas mayap ing kalulung ating masanting a pamikakatawan kesa king dakal ka pibandian, oneng masakit ne man ing kekang katawan.

¹⁵Mas maulaga ya ing masanting a pamikakatawan at alang kapanamdaman kesa king dakal a gintung pibandian.

¹⁶Alang pibandian a igitan na ing masanting a pamikakatawan at ing panatag a pilubluban.

¹⁷Mayap pa ing mate na ka kesa king mabibie kang magkakasakit king sakit a e kakayap.

¹⁸Ala kang ganang mangan agyang maniaman ing pamangan; antimong pamangan a miyapag karing larawan.

¹⁹Alang kabaldugan ing miyapag pamangan karing larawan, uling e no man makapangan o makabau. Makanyan ya kabilian ing taung ating sakit a binie ning Ginu.

²⁰Lalawan na ing pamangan na at mangisnawa yang saldak, uling ala yang ganang mangan; anti ya king lalaking kapun a kakaul king metung a babai oneng ala yang akarapat.

²¹E mu pasakitan ing sarili mu uli ning kalungkutan o pakadibdiban king kaiisip ing kagutgutan.

²²Ing pusung matula ya ing pagkabie ning tau; ing tula ya ing pakaba king bie na.

²³Magsaya ka at tumiman; itabi mung kalungkutan. Dakal ne pete ing kalungkutan at ala yang depat a mayap kareng malungkut.

²⁴Ing pamangalalu at ing mua kukuyaran na ing bie, at ing kaiisip agad na kang gawan matua king e oras.

²⁵Ing masaya at maganaka atin yang ganang mangan at tune yang matalik mangan.