Read Kapampangan Ecclessiasticu 31 Bible Online

Ecclessiasticu 31 - Kapampangan bible

Ecclessiasticu 31

¹Mayayayat ya at e mipapatudtud ing taung masalapi a migaganaka king salapi na.

²Mitatabi ing tundu uli ning kabalisan a isip king kapanintunan; anting grabing sakit a e ka mipatudtud.

³Ala yang patugut magobra ing mabandi ban lalu yang mibandi; kaybat mag-retiru ya at magpasasa king bie.

⁴Magobra ya namang alang patugut ing pakakalulu, oneng e ya makatipun at potang mag-retiru ya kalulu ya pa mu rin.

⁵E ya mipayalang sala ing taung malugud king salapi; ing pamagpakasalapi inabu na ka king pamikasala.

⁶Dakal na lang taung mesira at miyarap king kapahamakan uli ning pamagnasa ra king gintu.

⁷Bitag ya ing salapi karetang pa-ipus kaniti, at mararakap la king bitag ding mangmang.

⁸Makalma ya ing taung mibanding e mikasala uling e ya pepa-ipus king salapi.

⁹Atin kayung balung taung makanyan? Ninu ya ba ta yang parangalan? Uling ya mung bukud karing kalupa nang tau ing mekarapat pagmumulalan.

¹⁰Uling delanan na ing pagsubuk at akabiusan nang e ya mikasala. Inya atin yang matulid magparangalan. Mika oportunidad ing mikasala ya, oneng e ya mikasala, at mika oportunidad yang dapat e ustu, oneng e ya dinapat e ustu.

¹¹Uli na niti, karampatan ya king pibandian na at uling maganaka ya purian de ring kabalen na.

¹²Neng atyu ka arap ning lamesang ating dakal a pamangan, e mu papakit ing kakayat ka wawa at e mu sasabian: Kaniaman ing pamangan a ine!

¹³Manawang ing masaklo ka mata. E mu sa kakalinguan yan. King sablang melalang bukud mung ing mata ya ing pekamatako. Uli na niti, maralas ing lua na tutulu.

¹⁴E mu ngan abutan ing sablang makayapag at e ka makiuna ketang minuna keka.

¹⁵Intindian mo ding aliwang kalupa mu kapanamdaman, at daptan mu karela itang buri mung daptan da keka.

¹⁶Kanan mu ing pamangan a inapag da keka bilang taung ating pegaralan, at e ka langut nang langut a makabuklat a asbuk ban e ka maging pikakasaman.

¹⁷Malagung ugali ing ika ing munang tuknang mamangan; pangilagan mu ing mayaus kang alang pikabsian.

¹⁸Nung dakal la deng kumbiradung makipangan, e ka makiuna karing aliwa.

¹⁹Makagyu na ing ditak ketang biasang manatindi, at e ya maskup a salu potang matudtud ne.

²⁰Matudtud yang maniaman ing mamangan kasantingan; maranun yang migigising at mayan ya pamikakatawan. Oneng ing labis a pengan, e ya mipatudtud maniaman at manyuka ya naman.

²¹Nung dakal ing kekang pengan at masakit na ka atian, talakad ka at mako king lamesa at king lual mu isuka ban mipasno ka.

²²Anak ku, makiramdam ka king kakung sabian at e mu sa mamarokan. Datang mu rin ing aldo a kilalanan mu ing ulaga ning kakung turu. Pakakalale ka sa king nanumang kekang daraptan at e dugpa keka ing nanumang kapanamdaman.

²³Pasalamatan de ing taung maganaka at migsadiang pamangan a maniaman, at e malyaring payalian kapilan man ing mayap nang pilubluban.

²⁴Oneng sasaingsing de ing taung kuriput king sidia nang pamangan, at iti e malyaring payalian kapilan man.

²⁵E mu patunayan ing pangalalaki mu king kapamilatan na ning pamaninum alak, uling dakal na lang mipahamak king uli ning alak.

²⁶King ornung mapali ya masubuk ing pangapasbu ning bakal, king pamaninum alak ne man masubuk ing pangatau ning palalu.

²⁷Babie sigla ing alak king katawan, nung inuman yang katamtaman. E maniaman ing mabibie nung alang alak? Melalang ing alak ban munie tula king tau.

²⁸Nung katamtaman ing pamaninum at king makatud a panaun, iti munie sigla at tula king katawan.

²⁹Oneng sakit buntuk at lub ampon kamarinayan, nung inuman me kabang mua ka.

³⁰Ing kalasingan ning mangmang ya ing mitutulak ban panasakitan na ing sarili na; magigisan ya sikanan at milalantad ya king dakal a kapahamakan.

³¹E me paniabianan ing ninuman neng maki-inuman ya karing abe na o lalawan alang kabaldugan kabang magsaya ya. E oras ita ban makipate o manyingil karing utang na.