Read Kapampangan Ecclessiasticu 33 Bible Online

Ecclessiasticu 33 - Kapampangan bible

Ecclessiasticu 33

¹E ya mipapahamak ing taung ating takut at kagalangan king Ginu; iligtas ne king nanumang panganib.

²E ne pikakasaman ning taung biasa ing Kautusan, oneng ing taung e tapat king Kautusan anti yang bangkang sapul-sapulan na ning angin a masikan.

³Panaligan ne ning biasa ing Kautusan; ing Kautusan anti neng siwala ning Ginu.

⁴Isadia mu pa ing sabian mu ban pakiramdaman da ka ring tau; tipunan mu pa ing kekang beluan bayu ka makibat.

⁵Anti ya king parugang ning gareta ing kaisipan ning mangmang, at anti la king ehe a dudurut ing sasabian na.

⁶Anti ya king kabayung malyap ing kakaluguran a mapanlibak; lundag neng lundag, nung saken ne ning ninuman.

⁷Baket ating aldo a mas banal kesa karing aliwa ngening metung ya ing aldo a saslag aldo-aldo?

⁸Uling ating aldo a tikda ning Ginu ban pangilinan at pagpiestan.

⁹Ating aldo a gewa nang banal ampon pepaulagan, at ating aldo a tinuring nang pangkaraniwan.

¹⁰Ibat la ngan king gabun ding tau; ibat ya at meubug i Adan king gabun.

¹¹Oneng king degulan ning kabiasnan ning Ginu lelang na lang e paraparehu ding tau, at dininan na lang miyayaliwang obra at kagiwan.

¹²Gewa na lang banal ding aliwa at tinas a matas ban milapit la arap na. Sinumpa na la ding aliwa at gewang mababa uri at leko king karelang kabilian.

¹³Antimo ing pila king gamat ning mangawang kasangkapan a kapsa,[52] iyubug ne ing pila ketang buri na. Makanyan tamu munaman king gamat ning kekatang Talapaglalang, iyubug na katamu ketang buri na.

¹⁴Ing kabangkilas na ning mayap ya ing e mayap, ing kabangkilas na ning bie ya ing kamatayan, at ing kabangkilas na ning kasalanan ya ing katapatan ning tau king Ginu.

¹⁵Pibulayan mu ing depat ning Kakataskatasan: atin yang kabangkilas ing balang lelang na; makayaliwa ya ing metung king metung.

¹⁶Aku ing tauling diling menagtal ubas, anti ku mo waring mamulut mu kaybat ning pamamupul. Oneng binendisyunan na ku ning Ginu, uling dakal la pa mu rin ding ubas a ikua ku; akatmu ke ing pipapaslan kung ubas.

¹⁷E yu sa kakalinguan king depat ku ita e uli ning sarili kung kapakanan, nune para karing sablang magnasang mabiasa.

¹⁸Makiramdam kayu kaku, ikong pamuntuk ding tau; ikong manimuna karing kapulungan, makiramdam kayu king kakung sabian!

¹⁹E mu pailalam ing bie mu king kenu man kabang mabie ka, agyang pang anak me o asawa o kapatad o kakaluguran. E mu babie kenu man ing kekang pibandian pota sumisi ka at makisabing mayap ban akua mung pasibayu.

²⁰E mu pailalam ing bie mu king aliwang tau kabang atin kang pangisnawa.

²¹Mas mayap ing ding anak mu ilang maniawad keka kesa king ika ing maniawad karela.

²²Ika ing dapat mamahala king sabla mung sukat daptan, at e mu paintulut ing midungisan ya ing kekang dangalan.

²³Potang datang na ing kawakasan mu at ditak na inawa kanita mu ipamie ing kekang pibandian.

²⁴Sukat yang dinan kumpe, karga, at barug ing asno. Antimu rin, ing ipus sukat yang dinan pamangan, obra, at disiplina.

²⁵Papagobran me ing kekang ipus ban mipanatag ka lub. Nung e me dinan pagobran na mika panaun yang misip king ikalaya na.

²⁶Paswang king arung at paud ing gamitan ban ituru ya ing damulag,[53] parusa at pango ing king ipus a e mayap.

²⁷Papagobran mu neng papagobran; e me dirinan oras a alang gagawan, uling ing alang gagawan ituru neng dapat e ustu.

²⁸Papagobran me uling iti ing gulis ning palad na. Itanikala me, nung e bisang mamintu keka.

²⁹Oneng e ka mabagsik kenu man at e ka sa mangabiran.

³⁰Nung atin kang ipus tratusan meng anti ing tratus a buri mu king sarili mu, uling seli me karing salaping tinipun mu.

³¹Ibilang meng antimong kapatad mu, uling kailangan me antimo ing sarili mu. Nung mabagsik ka king ipus takasan na ka. Nukarin me panintunan?