Read Kapampangan Ecclessiasticu 34 Bible Online

Ecclessiasticu 34 - Kapampangan bible

Ecclessiasticu 34

¹Mapipirait lang mangmang king alang kabaldugan at e tutung kapanayan; mawiwili la karing apapaninap da.

²Ing taung magtiwala keng paninap anti yang sasakmal king anino o tatagal king angin.

³Ing akakit mu king paninap anti ya king lupa mung mayayaninag king salamin.

⁴E malyaring mamungang malinis ing marinat; lalung e mamungang katutuan ing kalaraman.

⁵Ala la ngang kabaldugan ding ula, ding vision,[54] at paninap, uling ing buri nang akit ning tau ya ing akakit na.[55]

⁶Oneng dinan lang pansin, nung deti peparala na la ning Kakataskatasan.

⁷Dakal na lang mepirait uli da ring paninap; mipahamak la uli ning penaligan da la.

⁸Ganap ya ing Kautusan agyang alalu deting e katutuan, at sasalita de ring taung tapat ing sakdal a kabiasnan.

⁹Dakal ya balu ing taung mekapaglakbe na king aliwang lugal; makabaldugan ing sasabian ning taung ating sibukan.

¹⁰Ala yang dakal a balu ing taung e mekapaglakbe, oneng itang mekapaglakbe na karing aliwang lugal dakal ya balung sabian.

¹¹Dakal ku ikit king pamaglakbe ku at e ku agyung sabian ing sablang abalu ku.

¹²Maralas ing mibili ku king panganib, oneng miligtas ku uli ding sibukan ku.

¹³E mate ing sikanan dang lub detang ating takut at kagalangan king Ginu, uling binili ra ing kapanaligan da king makapagligtas karela.

¹⁴E la mitakutan king nanuman detang ating takut at kagalangan king Ginu; e la mataloti uling ing kapanayan da atyu king Ginu.

¹⁵Mapalad la detang ating takut at kagalangan king Ginu, uling balu ra nung ninu ing lapitan dang aduananan saup.

¹⁶Ingatan na la ning Ginu detang malugud king Ginu; ya ing mayupaya rang talaingat at matibe kambilan. Ya ing karelang salilungan neng mapali ya ing aldo o neng kaugtuan aldo, at ya ing mamalale ban e la mitisud at misakab.

¹⁷Paligayan[56] na la at pakislapan a mata; dinan na lang masanting a pamikakatawan at makabang bie at bendisyunan.

¹⁸Kalapastanganan king Ginu ing dinan yang ain a e mayap penibatan; iti e katanggap-tanggap king Ginu.

¹⁹E ya tutula ing Kakataskatasan king taung alang dios a katawan, at e na patawaran ing kasalanan da agyang alang tuknang ing pamanain da.

²⁰Nung ing penako mu karing kalulu ya ing inain mu, kanita anti mu neng pete ing anak king arapan nang tata na.

²¹Ing pamangan ya ing kabud bie da ring taung pakakalulu; nung kuanan mu iti karela anti mu na lang pete.

²²Pamakamate tau na ing pagkaimutan meng kapanintunan ing ninuman o nung e mu babie ing karampatan a sueldung mangaintulid king makipagobra.

²³Nung ing metung manalakad yang bale at ing aliwa naman lasakan ne, nanu ing maging pakinabang nune mu ing mepagal la?

²⁴Nung ing metung manalangin ya at ing aliwa naman maniumpa ya, ninu karelang adua ing pakiramdaman na ning Ginu?

²⁵Nung miglinis kang katawan kaybat mung tinalan mete at kaybat telan mu ne naman, nanu mo ing meging ulaga ning pamaglinis mu?

²⁶Nung mag-ayunu[57] ka uli ning mikasala ka at kaybat dapat kang pasibayung pamikasala, nanu ing apala mu king kekang pamag-ayunu? Ninu ing makiramdam king kekang panalangin?