Read Kapampangan Ecclessiasticu 36 Bible Online

Ecclessiasticu 36 - Kapampangan bible

Ecclessiasticu 36

¹O Ginung Dios ning meto sikluban, lawan mu kami at lunusan.

²Pamatakutan mu la keka ding sablang bansa.

³Itas mu lang gamat mu laban karing dayuan a bansa at paintulut mung akit da ing kekang upaya.

⁴Ginamit mu kami ban ipakit karela nung nu anti ka kabanalan; ngeni gamitan mu la ban ipakit kekami ing kekang kayupayan.

⁵O Ginu, paintulut mung mabiasa la antimo nung makananu keng mebiasa king ala nang aliwang Dios nung e mu ika.

⁶Pasibayu kang pakit tanda at bage pagmumulalan; ipakit mu kekami ing kekang makaligayang sikanan.

⁷Paragulan mu ing mua mu, ibugnus mu ing bigsikan mu, lasawan mong kalaban mu, pamuksan mu lang kalaban mu.

⁸Ganakan me itang aldo a tikda mu at pamalaguanan mu neng datang ban apisabi rang pasibayu ding tau ing makapagmulala mung daraptan.

⁹Paintulut mung laklakan na la ning mikakaluku mung mua ding miligtas; paten mo ngan detang menalipit karing kekang memalen.

¹⁰Lasawan mu la buntuk ding mabagsik a pamuntuk a sasabi: Alang aliwang mayupaya nung e mu ikami.

¹¹Tipunan mu lang pasibayu ding tribu ning Israel at isubli karela ing gabun a kekang pepamana karela kanitang minunang panaun.

¹²O Ginu, malunus ka king Israel, ing balen mung mayayaus king lagyu mu a pemalagyuan mung pangane anak mung lalaki.

¹³Malunus ka king Jerusalem, ing banal mung siudad a pinili mung kekang tuknangan.

¹⁴Katmuan me king kanta ning kapurian ing Templo mung atyu king Zion; katmuan mu la king kekang ligaya ding kekang memalen.

¹⁵Patunayan mu karing kekang memalen ding bage depat mu kanitang minunang panaun; tuparan mu la detang sinabi mu king kapamilatan na ning lagyu mu.

¹⁶Ablasan mu la king mayap detang menalig keka; patunayan mu king karapatdapat lang pagkatiwalan ding kekang propeta.

¹⁷Pakiramdaman mu, O Ginu, ing panalangin da ring talasuyu mu a manangkamin king bendisyun nang Aaron karing kekang memalen. Kanita kilalanan da ring sablang tau keti king yatu king ika ing Ginu, ing Dios a alang angga.

¹⁸Tungkul king atian ing sablang pamangan, oneng ating pamangan a maygit karing aliwa.

¹⁹Nung makananu neng alalasa ning dila ing pamangan, makanyan neng ababalu ning taung ating kabiasnan ing taung malaram.

²⁰Pasari yang lungkut ing taung ating e mayap a isip, oneng ing taung masibukan balu neng pakiarapan.

²¹Tanggapan ne ning babai ing ninumang lalaking mitakdang maging asawa na, oneng kailangan yang mamili ing lalaki king buri nang maging asawa.

²²Babie ligaya king lalaki ing leguan ning babai; ala nang aliwa pang makawili pa subali kaniti.

²³Nung maganaka ya ing babai at malambing magsalita, kanita ing asawa ya na ing pekamasuerting lalaki.

²⁴Potang makiasawa ne ing lalaki, ikua na na ing mayap diliing asawang akatambayan na at munie sikanan lub king bie na.

²⁵Ing mulahan a alang bakud mayan yang luban at panakawanan; ing lalaking alang asawa parati yang lakad-lakad at malungkut.

²⁶Atin na waring migtiwala king tulisan a makasandatang lipat-lipat karing balen? Lalu yang e sukat pagkatiwalan ing lalaking alang tuknangan a matudtud nu man karin ne dasan ning kabengian.