Read Kapampangan Ecclessiasticu 37 Bible Online

Ecclessiasticu 37 - Kapampangan bible

Ecclessiasticu 37

¹Sabian na ning ninumang kakaluguran king kakaluguran na ka, oneng deng aliwa kakaluguran la mu keng salita.

²Masakit anting kamatayan ing pasari na ning kakaluguran a meging kalaban.

³O e ustung kekatamung kayuyungyungan, makananu kang milub ban laganapan meng pamaglinlang ing balang tau?

⁴Ating kakaluguran a kakaluguran mu neng atin lang akakua keka, oneng maging kalaban la potang atyu ka king kagipitan.

⁵Ing tune kakaluguran saupan na ka king pamakilaban karing kalaban; makasadia ya ban idipensa na ka.

⁶E me sukat kakalinguan iting kayabe mu king kekang pamakilaban; dinan me potang minawa na ing kekang bie.

⁷Atin yang ibie turu ing ninumang talaturu, oneng ating babie turu a ating e mayap a kapagnasan.

⁸Mingat ka neng ating babie turu keka. Lawan mu pa mu nung nanu ing kapagnasan na pota ing sarili nang kapakanan ya ing buri nang saupan at kakasangkapanan na ka mu.

⁹Sabian na keka, Ustu ya ing daralanan mu, oneng kaybat lisia ya at lawan na nung nanu ing miras keka.

¹⁰E ka maniawad turu karetang e magtiwala keka, at e na ka man babie turu karetang mariria keka.

¹¹E ka maniawad turu king metung a babai tungkul king katunggali na o king duag tungkul king gera o king negosianti tungkul king alaga ning panialwan o king maniali tungkul king kekang pamisali o king mabagsik tungkul king pamamie kapasalamatan o king maimut a tau tungkul king ganaka o king matamad tungkul king obra o king karaniwan a magobra tungkul king obrang sukat mayari o king ipus a matamad tungkul king dakal a obra. E ka lalapit maniawad turu kenu man kareti.

¹²Ing daptan mu ya ing lumapit ka king taung ating takut at kagalangan king Dios at pikabaluan king kapamintuan karing kautusan na, itang ating malasakit para king ikakayap mu at manamdaman nung mayala kang suerti.

¹³Oneng magtiwala ka naman king kekang sariling kapamalakan uling ita ing matimbang dili.

¹⁴Neng misan ing kekang kapamalakan mas dakal ya balung sabian kesa karing pitung makabante king matas a toreng batiawan.

¹⁵Maygit king sabla, manalangin ka king Kakataskatasan ba nang ituru keka ing sukat mung daptan.

¹⁶Ing nanumang babalakan tamung daptan magumpisa keng pamakipagsalita, at nanumang daptan pakaisipan ya pa.

¹⁷Magumpisa king kaisipan ning tau ing buri nang daptan at miyangganan iti karing apat a bage:

¹⁸king mayap o king e mayap, king bie o king kamatayan. Kareti ngan ing dila ya ing babie kalutasan.

¹⁹Ating taung maki kagiwan turu kareng aliwa, oneng ala ne mang kasilbian king mismung sarili na.

²⁰Ating biasang mamagsalita, oneng dakal la ding masosora, inya ing kayangganan na ya ing daranup ya.

²¹Iti mapalyari nung e ne dininan gelingan ning Ginu tungkul king pamakiparang tau.

²²Nung balu neng manewan ning metung a tau ing bie na iti mayakit, at paniwalan ya neng magsalita ya.

²³Nung tuturu na la ning taung biasa ding kabalen na, kanita apanaligan ing kabiasnan na.

²⁴Purian de ring tau at sabian da ring manakit king masuerti yang tau.

²⁵Makuyad ya mu ing bie ning tau, oneng e mu la abilang ding aldo ning Israel.

²⁶Pagkatiwalan de ring kabalen na ing taung biasa, at e ya makalinguan ing lagyu na king kapilan pa man.

²⁷Anak ku, maningat ka keng pamamangan mu kabang bie mu; e mu kakanan itang balu mung makasira king kekang katawan.

²⁸E na balang pamangan maniaman king tau; ating pamangan a e tamu buring kanan.

²⁹E mu pagnasan ing kanan mu ngan ing sablang pamangan a balamu ala kang pikabsian.

³⁰Sakit ka king labis a pamamangan, uling ing katakawan mamungang sakit atian.

³¹Dakal la deng mamate uli ning katakawan; mingat ka ban kumaba ing kekang bie.