Read Kapampangan Ecclessiasticu 39 Bible Online

Ecclessiasticu 39 - Kapampangan bible

Ecclessiasticu 39

¹Oneng makayaliwa ya ing taung magaral king Kautusan ning Kakataskatasan. Sasaliksikan na ing kabiasnan ning milabas a panaun, at pagaralan na lang ula ding propeta.

²Pakatandanan na la ban e na la kalinguan ding kasebian da ring pikabaluan a tau, at pagaralan na la kabaldugan ding talimhaga.[63]

³Sasaliksikan na la kabaldugan ding makasalikut dang kabaldugan ding kasebian, at balu na lang malinawan ding masakit dang kabaldugan ding talimhaga.

⁴Pakiduang da ring marangal ing kasuyuan na at kayabe de ring pamuntuk ning balen. Pupunta ya karing aliwang bansa at ababalu na ing kayapan na at ing e mayap ning tau.

⁵Kabuklat ning masala manalangin ya king Ginung Linalang king sabla; aduan na king Kakataskatasan king patawaran na sana ing arapat nang pamikasala.

⁶Nung burian ning maragul a Ginu, mikatmuan yang kabiasnan. Kanita lumual la king asbuk na ding amanung mitmung kabiasnan, at munie yang kapasalamatan king Ginu.

⁷Mika kabiasnan ya; ing kabiasnan a idake na karing aliwa, at beluan tungkul karing lihim ning Ginu.

⁸Papayabut na ing beluan na king kapamilatan na ning tuturu na, at ing pagmaragul na ya ing Kautusan ning Ginu at kasunduan.

⁹Purian da ring tau ing kabiasnan na at e makalinguan kapilan man. Manatili yang mabie king kaisipan da ring tau, at banggitan de ring tuki-tuking lahi ing lagyu na.

¹⁰Maging pikabaluan ya karing bansa[64] at purian de karing karelang katipunan.

¹¹Nung kumaba ya bie maygit yang maging pikabaluan kesa karing aliwa, nung maranun yang mate sapat na itang meging pikabaluan ya.

¹²Antimo ing bulan a maslag neng mabilug ya, atin kung dakal a isipan a buri kung sabian.

¹³Makiramdam kayu kaku, ikong anak kung tapat kaku, mamukadkad kayung anti ding rosas lele ning danuman.

¹⁴Salingalngal kayung anti ing mabanglung sampagang liryu; ikalat yu nukarin man ing banglu yung anting insenso. Magkanta kayung kapurian king Ginu at pasalamatan ye king sabla nang depatan.

¹⁵Ipamalita ye ing maula nang lagyu; purian yeng kayabe ing kanta at ning lira. Anti kaniti ing ikanta yu:

¹⁶Makapagmulala ing sablang lelang ning Ginu, matupad ngan king takdang panaun ing sablang inutus na.

¹⁷E sukat sabian ing anti kaniti: Nanu ya ini? Obat makanyan? Mipakibatan la deting kutang king takdang panaun. Minutus ya at migbuntun ing danum, megawa la ding pititipunan danum.

¹⁸King utus na ing sablang buri na metupad, at alang makasabat king dapat nang magligtas.

¹⁹Akakit na ing sablang daraptan ding tau; ala kang asalikut karing mata na.

²⁰Akakit na ngan ing sablang kapanaunan manibat king kapupurmeruan angga na king kawakasan; at alang bage a pagmumulalan na.

²¹Inya e sukat sabian: Nanu ya ini? Obat makanyan? Uling ing sablang melalang ating parasan.

²²Maglapo ing kalam na a anti ing Ilug ning Nilo a didilig at pataba king malanging gabun.

²³Gagawan nang malat ing danum, at ing mikakaluku nang mua bubugnus na karing bansa.

²⁴Patag la ding dalan na para karetang taung banal, oneng mitmu lang sagabal karetang darapat e katuliran.

²⁵Manibat na kanitang minuna, lelang na ing bage mayap para karing taung mayap, at ing makatakut para karing e mayap.

²⁶Ding kailangan ning tau ila deti: danum, api, bakal, at asin, arina, mayumu, at gatas, alak, imalan, at laru.

²⁷Mayap la deti karing tapat, oneng maging e la mayap karing taung e mayap.

²⁸Atin yang lelang a angin ban parusan na lang makasalanan, masikan a angin a mamabut karing bunduk. King oras ning pamanukum, ibugnus dang sikanan da ban ipakit na ing mua ning karela linalang.

²⁹Ing api, ing uran-lipat, ing danup, at ing salut melalang la ban magamit king pamamarusa.

³⁰Antimu rin, ding animal a mabagsik, ding alakdan at ubingan, at ing espada a manablas magagamit la naman ban parusan lang makasalanan.

³¹Deti matula la ngang tupad king iyutus na, parati lang makasadiang sumuyu king Ginu keti king yatu. Potang ing oras da datang, e la tumutul kapilan man. (

³²Maluat ku nang paniwalan iti, inya sinulat ku kaybat kung pekaisipan.)

³³Mayap ing sablang lelang ning Ginu; ibabie nang sablang kailangan king takdang panaun.

³⁴E na sukat sabian ning ninuman: Iti e ne kasing santing nita. Uling ing metung at metung atin yang kayapan potang datang na ing takdang panaun.

³⁵Inya, meko keni, magkanta kong masaya, at purian ya ing lagyu ning Ginu.