Read Kapampangan Ecclessiasticu 4 Bible Online

Ecclessiasticu 4 - Kapampangan bible

Ecclessiasticu 4

¹Anak ko, e mo sana lalako pagkabie deng pakakalulu at e mo papapanayan detang mangailangan kasaupan keka.

²E mo sana lalawan mababa deng danupan o dirinan kalingasngasan ding atyu king kagipitan.

³E mu na daragdagan pa ing kasakitan da at e ka mikakunung munie limus karing magpalimus.

⁴E mo sa tatabi ding magpalimus a misna nang kasakitan o pangilagan saupan ding pakakalulu.

⁵E mo sa gugulutan ding mangailangan saup o dirinan dalan ban isumpa da ka.

⁶Nung king uli na ning kasakitan na isumpa na ka, pakiramdaman na ning Linalang ing panalangin na.

⁷Pakikuanan mung maging katanggap-tanggap ka karing kabalen mu. Igalang mu la ding atyu king kayupayan.

⁸Pakiramdaman mu ing saingsing da ring pakakalulu; pakibatan mung banayad a kayabe ing kapayapan.

⁹Iligtas mu la ding mayayalipit karing gamat da ring manalipit. At e ka mangabiran neng babie kang kayatulan.

¹⁰Maging anti ka sanang tata karing ulila; saupan mu la ding babaing mebalu ketang e ra na aibie ding mete asawa ra. Kanita maging anak na ka ning Kakataskatasan at luguran na kang maygit king lugud nang ima mu.

¹¹Ingatan na la ning Kabiasnan detang manintun kabiasnan; e mu ita, paragulan na la pa.

¹²Ing pamaglugud king Kabiasnan pamaglugud na king bie. Tune kaligayan ing mibabangun maranun neng abak ban panintunan ya.

¹³Tanggap yang maragul a dangalan ing ninumang manikuang kabiasnan. Bendisyunan ne ning Ginu nu ya man munta.

¹⁴Talasuyu na la nitang Bukud a Banal detang susuyu king Kabiasnan, at luluguran na la ning Ginu detang malugud king Kabiasnan.

¹⁵Mamatul la king matulid detang mamintu king Kabiasnan at panatag la kabilian detang makiramdam.

¹⁶Ibili mu ing kapanaligan mu king Kabiasnan at abandi me ampon amana de ring maging lahi mu.

¹⁷King mumuna, idala na ka ning Kabiasnan karing baku-bakung dalan. Pamatakutan na ka at painan a lub. Mabayat ya ing disiplinang patupad na at ibili na ka king kapagsubukan angga king lubus na kang apagkatiwalan.

¹⁸Kaybat na nita, datangan na kang agad ban ibulalag na la keka ding lihim na at gawan na kang masaya.

¹⁹Oneng lakuan na ka nung gumulut ka at paburen na kang miras king kasiran.

²⁰Anak ko, samantalanan mu ing malagung panaun, oneng pangilagan mu itang e mayap. E mu lalawan malati ing sarili mu.

²¹Kapurian at kagalangan ing kapakumbaban, oneng ing lawe malati king sarili ibaldug na ka king pamikasala.

²²E mu paintulut ing samantalanan da ka ring aliwa; e mu paburen madadamusak ing karapatan mu ban e ka masira.

²³E ka sa mikakunung magsalita neng kailangan kang magsalita. E mu sasalikut ing kabiasnan mu.

²⁴Makilala ing kabiasnan mu ampon pegaralan king kapamilatan na ning sasabian mu.

²⁵Oneng e ka magsalitang laban king katutuan uling e mu naman balu ing sabla.

²⁶E mu pikakarine ing pagtapat mu ing kasalanan mu; e mu sasalangsangan ing agus ning ilug.

²⁷E mu paintulut ing saulan na ka ning mangmang o ing magpanig ka karing ating upaya.

²⁸Talakaran mu ing matulid agyang pang mitaya ing bie mu, at pakiabayan na ka ning Ginung Dios king pamakilaban mu.

²⁹E ka pabigla-bigla king pamagsalita o matamad o magpabaya king obra mu.

³⁰E ka sa anting leon king pibalebale mu o mabagsik[8] karing ipus mu.

³¹E me papalad ing gamat mu ban tanggap, oneng e mu ne man sasara potang oras ning pamamie.