Read Kapampangan Ecclessiasticu 45 Bible Online

Ecclessiasticu 45 - Kapampangan bible

Ecclessiasticu 45

¹Linto ya i Moises king lahi nang Jacob. Lalaki yang maka Dios at maka tau at kalugud-lugud ya king kenu man. Bendisyun ing kapigaganakan kang Moises.

²Pekipante ne ning Ginu i Moises king dangalan da ring anghel na, at dininan kayupayan ban pitakutan de ring kalaban na.

³Karin king Ehipto, king kataya na mung amanu mekagawa yang milagru at misakitan la ding tau. Uli ning Ginu ginalang de ring ari. Binie na la ning Ginu kang Moises ding kautusan ban tukian da ring tau, at pepakit ne kang Abraham ing makasilo nang aslag ning panga-atyu ning Ginu.

⁴Karing dakal a tau pinili ne ning Ginu i Moises at telaga ne uli ning katapatan na ampon kapakumbaban.

⁵Peintulut na kang Moises ing damdaman ne siwala at tinaid ketang madalumdum a biga. At karin, lupa't lupa na lang binie kang Moises ding kautusan, ing Kautusan a babie bie at beluan ban ituru ne karing lahi nang Jacob ing kabaldugan ning Kasunduan layun abalu na la ning mabilug a Israel ding utus na.

⁶Pinili[76] ne ning Ginu i Aaron, ing kapatad nang Moises. Banal ya naman i Aaron at ibat ya naman king lahi nang Levi.

⁷Ginawa ya namang alang anggang kasunduan kang Aaron ing Ginu at gewa neng pari ning bansa na. Piniblas ne karing mal a imalan at aliwa pang kagamitan.

⁸Pepaimalanan ne king sakdal a leguan at dininan karing palatandanan na ning kayupayan antimo ing salol a makuyad angga karing butit, ing makabang baru, at ing efod.

⁹Dininan deng palamuting granada ing laylayan ning baru na at gintung kampanilya a kikililing kabang lalakad ya ban maramdam king Templo, ban aganaka na la ning Ginu ding memalen na.

¹⁰Dininan neng sagradung balabal ning Ginu i Aaron. Binurdahan yang gintu, asul, at muradu. Binie nia naman kang Aaron ing pektoral ning pamanatul at ing Urim at Tumim;[77]

¹¹ing kuldun a malutu a gewa ning magaling a pangamat; ding mal a batung iyas nung nu la makadukit ding lagyu a inenggasti na ning plateru king gintu ban aganaka na lang parati ning Ginu ding labing aduang tribu;

¹²ing gintung palamuti king turban a ating makatatak: Mitalaga ya king Ginu. Pulidu ya pangagawa at masanting yang lalawan. Dangalan ing isulud ya.

¹³Ala pang meyakit a makanyan a tutung masanting bayu ya linto i Aaron, at alang bitasang misulud kaniti king kapilan pa man nung aliwa mu ya at ding anak nang lalaki.

¹⁴Minie lang ain-a-binutil makatadua balang aldo at lubus dang dulukan iti.

¹⁵Telaga neng Moises i Aaron king kapamilatan na ning pamanugtug nang sagradung larung paglania king buntuk na. Inya mitatag ya ing alang anggang kasunduan kang Aaron at karing maging lahi na, king ila ding sumuyu king Ginu bilang pari na at bendisyunan ding memalen king lagyu na ning Ginu.

¹⁶Karing sablang tau, i Aaron ya ing pinili na ban miyain karing ain-sakripisyu, ban duluk mabanglung insenso, ban ipaganaka la king Ginu ding memalen na at patawaran na la king kasalanan da.

¹⁷Kang Aaron la mipagkatiwala ding kautusan at dininan neng kayupayan munie kayatulan at ituru la deti karing Israelita.[78]

¹⁸Misan ating taung mariria kang Moises at karin king ilang misabuatan lang laban kang Moises. Ila deti ri Datan, Abiram, Kora, at ding kapanalig da. Mua la inyang linapit la kang Moises.

¹⁹Ikit na iti ning Ginu at king mua na pete na la king kapamilatan na ning milagru ning mikakalabkab a api.

²⁰Digdagan na ning Dios ing ligaya nang Aaron inyang dininan neng makabukud a mana: ing katuliran karing ain ning mumunang pupul ban e la magkulangan ding pari king pagkabiayan da.

²¹Ing pamangan da ya itang ain-sakripisyu a miyabie king Ginu. Binie na iti ning Ginu kang Aaron at karing lahi na.

²²Oneng i Aaron e re kalupa ding aliwang taung tinanggap dake king gabun; ala yang dake. Ing dake na at mana ya ing Ginu.

²³Ing katlu karing pikabaluan a lalaking tapat ya i Fineas a anak nang Eleazar. Uli ning takut na at kagalangan king Ginu dipensa neng mitmung tapang inyang mig-rebeldi la ding memalen. King uli na niting depat nang Eleazar mipatawaran ing kasalanan na ning Israel.

²⁴Inya ginawa yang kasunduan ing Ginu kang Fineas. Ya ing mamahala king kapilan pa man king bale na ning Dios at karing memalen na, king ya at ding lahi na ila ding manatiling manungkulan bilang Pekapun ding Pari.

²⁵E ne kalupa ning kasunduan na kang David a anak nang Jese ning tribu nang Juda: king ing pamag-ari manan ne ning anak king tata; ing panga-pari manatili king kapilan pa man at milipat yang ibat kang Aaron angga na karing sabla nang lahi.

²⁶Ngeni purian ya ing Ginu uling mayap ya; pitungan na kayung korona ning dangalan. Sana dinan na kayung kabiasnan ban atulan lang memalen na king alang pamangabiran. Kanita e mabating ing kasaplalan da at ing kayupayan yu manatili king kapilan pa man.