Read Kapampangan Ecclessiasticu 47 Bible Online

Ecclessiasticu 47 - Kapampangan bible

Ecclessiasticu 47

¹Ing sinalisi kang Samuel ya i Natan, ing propeta kanitang kapanaunan nang David.

²Nung makananung mapipili ing taba ning ain-sakripisyu makanyan yang mepili i David karing lalaki na ning Israel.

³Mekialung ya karing leon at oso; anti la waring biserung tupa o kambing neng pakialungan na la.

⁴Binatilyu ya pa mu inyang pete ne ing higanti ban iligtas ne kamarinayan ing balen nang Israel. King kapamilatan na ning tiradol na bigsak ne ing mayabang a i Goliat.

⁵Menalangin ya king Ginung Kakataskatasan, at midinan yang sikanan ban apate ne iting beteranung sundalung kalaban at galangan da ring bansa ing upaya ning bansa na.

⁶Perangalan de ring tau uling pete na la ding laksa-laksang kalaban, at pinuri de uling ya ing pinili nang ari ning Ginu.

⁷Gisan na la ngan ding kalaban a Filisteo at lubus na lang sildak angga ngeni ban e na la manggulu.

⁸Pasalamat ya king Dios king sablang depat na; binie na ing dangalan king Bukud mung Banal, ing Kakataskatasan. King mabilug nang pusu migkanta ya king Miglalang ban ipakit na ing lugud na.

⁹Mibili yang talapagkanta king altar ban magkantang malagung kanta kabang matitigtig lang alpa.

¹⁰Gewa nang masanting at masaya ing pamagselebra karing piesta, at tikda na la ding aldo pagselebran kilub ning pabanua. Kakabling aldo-aldo king Templo ing kantang kapurian king Ginu.

¹¹Petawaran na la ning Ginu ding kasalanan nang David at dininan neng kayupayan king kapilan pa man. Ginawa yang kasunduan ing Dios kang David: king ya at ding maging lahi na mag-ari la king maningning nang tronu ning Israel.

¹²Biasa yang anak ing menalili kang David, inya mig-ari yang masalese i Solomon king uli nang tata na.

¹³Mig-ari ya king panaun na ing kapayapan uling pepatahimikan na la ning Dios ding angganan ning kayarian ban makatalakad yang Templo para king Ginu a maging tuknangan na king kapilan pa man.

¹⁴Kabiasnan mo, Solomon, inyang kayanakan ka. Mengari ing kabiasnan mu king ilug a maglapo danum.

¹⁵Linaganap ing kabiasnan mu king mabilug a yatu; pikabaluan la ding kekang kasebian at talimhaga.

¹⁶Miras ing kabantugan mu angga karing marayung pulu at liguran da ka uli ning payapa mung pamag-ari.

¹⁷Pupurian na la ning mabilug a yatu ding kekang kanta, kasebian, talimhaga, at ing pakibat mung mitmung kabiasnan karing kutang.

¹⁸King lagyu ning Ginung Dios a ausan da namang Dios ning Israel, mekatipun kang dakal a gintu at pilak a balamu wari lata la mu at tinggaputi.

¹⁹Oneng meging mahilig ka karing babai at pepailalam ka karela.

²⁰Mimantsan ing dangalan mu at ding lahi mu. Migdusa la at misakitan uli ning depat mung kamangmangan.

²¹King uli mu mepitna ya ing kayarian ning Israel; manibat king Efraim linto ya ing metung a mig-rebelding kayarian.

²²Oneng alang kayangganan ing lunus ning Dios at e ne siran itang pangaku na. E ne gisan ing lahi nang David a pinili na, at e ne pagkaimutan lahi ing pamilya na ning lalaking pakamalan na. Inya atin yang binie tagan king Israel[83] at peintulut na ing manatili yang mabie ing pamilya nang David.

²³Mete ya i Solomon antimo ding makatua na. Metung ya karing anak na ing menalili kang Solomon; Rehoboam ing lagyu na. Oneng mangmang ya at ala yang balu. King uli na mig-rebeldi la ding memalen.

²⁴Kaybat i Jeroboam a anak nang Nebat. King uli na mikasala ya ing Israel at tinake ne ing Efraim king e mayap. Alang kalupa ing depat dang pamikasala ding memalen, at king katataulian miyugse la king aliwang bansa.

²⁵Depat da ing miyayaliwang kasalanan, inya bigsak na karela ning Dios ing parusa.