Read Kapampangan Ecclessiasticu 49 Bible Online

Ecclessiasticu 49 - Kapampangan bible

Ecclessiasticu 49

¹Ing e pamangalinguan kang Josias mengaring mabanglung insensong sinamut ning magaling a pangamat; mayumung anti ing pulut-panilan at anting mayubung tigtigan neng ating bangketi.

²Depat na itang matulid ban magbayu la pamibiebie ding tau at leko na ing e karampatan a pamanyamba karing idolo.

³Tune yang tapat king Ginu at pesiknangan na ing tune relihiun karetang makasalanan a panaun a deta.

⁴Makasalanan la ngan ding meging ari na ning Juda subali mu di David, Hezekia, at i Josias. Kelinguan de ing Kautusan na ning Kakataskatasan. Uli na niti, milako karela ing panga-ari.

⁵Sinuku ra ing karelang upaya at dangalan king dayuan a bansa

⁶a minyilab king banal a siudad, at likuan da lang alang katau-tau ding dalan na, antimo ing inula nang Jeremias.

⁷Pepasakitan de i Jeremias agyang mepili neng propeta inyang atyu ya pa king atian nang ima na ban mamutput, manlasak, at manyira, at antimu rin, ban manalakad at tanam.

⁸Ing propeta Ezekiel ya ing menakit king vision ning Ligaya ning Dios a ikit na king kapamilatan na ning karwahe at ding kerubin.[87]

⁹Binggitan nia naman i Job, ing lalaking menatiling tutuntun king dalan ning katuliran.[88]

¹⁰At mananu na sanang pasibayu lang mika bie ding butul da ring labing aduang propeta. Uli ning karelang katapatan at kapanayan pepasikan de lub at linigtas ing bansang Israel.

¹¹Makananu ta yang purian i Zerubabel? Anti ya king singsing a panatak king wanan nang gamat ning Ginu.

¹²Makanyan ya naman i Josue a anak nang Jeozadak. Ilang adua ding mitalakad pasibayu king Templo, ing telakad da para king Ginu, ing banal a memalen a mitalagang manatiling maligaya.

¹³Maragul ya naman ing katandanan tungkul kang Nehemias. Ya ing mitalakad pasibayu karing melasak nang pader ning Jerusalem at mibiling kabat karing pasbul dalan. Ya naman ing mitalakad karing bale tamu.

¹⁴Ala pang melalang keti king yatu a kalupa nang Enoc uling mitas ya banua.

¹⁵Ala ya pa munamang kalupa i Jose a pamuntuk ding kapatad na at sikanan ding kabalen na; miparangalan pati ding butul na.[89]

¹⁶Tune lang marangal di Sem, Set, at i Enos, oneng maygit ya i Adan king ninumang melalang.