Read Kapampangan Ecclessiasticu 7 Bible Online

Ecclessiasticu 7 - Kapampangan bible

Ecclessiasticu 7

¹Pangilagan mu ing dapat a e mayap at mayap ing miras keka.

²Lumaut ka king e ustung dapat at ing e ustung dapat mako keka.

³Anak, e ka sana sasalbag nanumang e makatuliran, pota pitung besis ing kekang pupulan.

⁴E mu aduan king Ginu ing maging mayupaya ka o maniawad matas a katungkulan king ari.

⁵E mu pipilit king Ginu ing matulid ka o papakit king ari king biasa ka.

⁶E mu pagnasan ing maging ukum ka nung ala kang sikanan lub ilako ing keyalan hustisia. Masira ka pangatau nung payamuyut ka karetang ating upaya.

⁷E ka darapat nanumang e ustu laban king balen mu, at e mu paintulut ing maging makarine ka karing kabalen mu.

⁸E mu ulitan ing kasalanan a depat mu. Makagyu ne ing metung at magbayu na kang agad.

⁹E mu sana sasabian, Kilalanan na ning Ginu ing dakal kung regalu a babie ku; tanggapan na la ning Kakataskatasan a Dios ding babie kung ain.

¹⁰E ka sa mangainipan king pamanalangin o kalinguan ing pamamie limus.

¹¹E me sa kaylian ing taung mengapakarine na. Ating Dios a pasari king pangasaldak ning tau, oneng kaybat italakad neng pasibayu.

¹²E ka sana mamigawang[13] kalaraman laban king kalupa mung tau o karing kakaluguran mu.

¹³E ka sana bitasang maglaram uling e mamungang mayap ing ugaling makanyan.

¹⁴King kapulungan da ring makatua, e ka sana sasalita nang sasalita; at e ka ulit-ulit king kekang pamanalangin.

¹⁵E mu pangilagan ing obra king marangle o ing nanumang mabayat a obra, uling iti tikda ning Kakataskatasan a Dios.

¹⁶E ka makikiabe king katipunan da ring makasalanan; e mu sa kakalinguan king ing mua ning Dios siguradung datang.

¹⁷Magpakumbaba ka sana, uling ing kamatayan[14] panenayan na kata ngan.

¹⁸E me panganiaya ing kekang kakaluguran uli na ning salapi; e me paglibe agyang pang ibie da keka ing sablang gintu.

¹⁹E mu palagpusan ing malagung oportunidad a makapakiasawa ka king biasa at mayap a babai. Maygit ya king gintu ing mayap a asawa.

²⁰E me sa panasakitan ing tapat at masipag mung ipus o ing makipagobrang tapat keka.

²¹Luguran me ing biasang ipus antimo ing lugud mu king kekang sarili, at ibie mu ing kalayaan[15] na.

²²Sesen mu lang masalese ding kekang animal. E mo lalako, nung keka lang pakinabangnan.

²³Nung atin kang anak a lalaki, papagaral mu la. Ituru mu karela ing mayap a ugali kabang daragul la.

²⁴Nung atin kang anak a babai, pakaingatan mu ing karelang puri, at e mu la panusignan king sablang karelang buri.

²⁵Potang makiasawa na la, ayari mu na ing katungkulan mu karela. Oneng e mu paintulut ing makapakiasawa la karing lalaking e karapatdapat.

²⁶Nung ating kang mayap a asawa, e me sa kakawanian; e mu pagkatiwala ing sarili mu king e mu kaluguran.

²⁷Igalang me i tata mu king mabilug mung pusu, at e mu kakalinguan ing kasakitan nang ima mu inyang beit na ka.

²⁸E mu bitasang kakalinguan king utang mu karela ing bie mu. E mu malyaring bayaran kapilan man ing depat da keka.

²⁹Pitakutan me't galangan ing Ginu king mabilug mung pusu, at igalang mu la ding pari a susuyu king Ginu.

³⁰Luguran me ing Dios a linalang keka king mabilug mung sikanan, at munie ka king pagkabie da ring ministru na.

³¹Pitakutan me ing Ginu at igalang mu la ding pari na. Ibie mu karing talasuyu na itang mangaintulid karela antimo ing miyutus kekayu: ing mumunang bunga, ing ain-a-kapamayaran-king-kasalanan, ing pago ning animal a iyain sakripisyu, at ing sablang karapatdapat ibie at iyain.

³²Saupan mu la ding kalulu at ibie na keka ning Ginu ing sakdal nang bendisyun.

³³Maging maganaka ka karing sablang tau at e ka magkait saup karing mete.

³⁴Makirame ka karing tatangis uling kematayan lang mal king bie.

³⁵E mu kakalinguan ing magbisita karing masakit, uling maging kalugud-lugud ka king anti kaniting dapat.

³⁶Nanuman ing daraptan mu, e mu sa kakalinguan king datang ing oras a mate ka, at e ka mikasala.