Read Kapampangan Levitico 10 Bible Online

Levitico 10 - Kapampangan bible

Levitico 10

¹Kinua na lang Nadab at Abihu a anak nang lalaking Aaron ding karelang insensaryu; dininan da lang baya at saka ra biburan insenso ing baya. Kaybat, inain da iti arapan na ning GINU. Oneng e makayagpang iting api king kautusan; ala yang kautusan ing GINU tungkul kaniti.

²Kabud-abud peparatang yang api ing GINU, at mesilab la ding mikapatad; mete la king arapan na ning GINU.

³Nganang migsalitang Moises kang Aaron, Oyan ing amanuan na ning GINU kanitang sinabi nang Sukat dang kilalanan ding sablang lalapit kanaku king banal ku, at ihayag ku ing kamalan ku arapan da ring tau. Oneng menatili yang e bubulad i Aaron.

⁴Kanita inaus neng Moises i Misael at i Elzafan, ding anak nang lalaking Uziel a bapa nang Aaron. Ngana karela, Meko keni at ilako yu la ding bangke ra ding pisan yu keting banal a Tolda at idala la lual ning kampu.

⁵Linapit la at telan da la baru ding bangke; binwat da la at linual king kampu, antimo ing inutus nang Moises karela.

⁶Ngana kanitang sinabing Moises kang Aaron at karing anak nang i Eleazar at Itamar, E yu gugutgutan ing buak yu at e yu pangabakan ing susulud yung imalan para pakit yu ing kalungkutan yu. Nung daptan yu yan, mate kayu naman at mimua ya ing GINU king kabilugan a balen. Pero malyari nang pagpaldasan ning balen ing pangamate ra ding kamaganak yu a meging biktima na ning api a pepagpa na ning GINU.

⁷E kayu mamako king tulid na ning pasbul ning Tolda pota mate kayu, uling mitalaga na kayu king kapamilatan na ning larung paglania na ning GINU. Inya e la meko karin, antimo ing inutus nang Moises karela.

⁸Nganang migsalita ning GINU kang Aaron,

⁹Ika ampon ding anak mu, e kayu miminum alak o nanumang bage makalasing bayu kayu lungub king Toldang tuknangan ku, pota mate kayu. Iti tuntunan yang sukat ipatupad karing lahi yu king kapilan pa man.

¹⁰Kailangan ing balu yu ing pamiyaliwa na ning banal at ing e banal; ing malinis at ing e malinis.

¹¹Sukat yu lang ituru karing memalen na ning Israel ding sablang kautusan a binie ku kekayu king kapamilatan nang Moises.

¹²Ngana namang migsalitang Moises kang Aaron at karing adua nang anak a mitagan, i Eleazar at i Itamar, Kuanan yu itang arinang mitagan king ain-a-pamangan a miyain king GINU. Gawan yu iting tinape alang lebadura at kanan yu king lele na ning altar uling iti binang banal.

¹³Kanan yu iti king lugal a banal; iti ya ing dake mangaintulid kekayu at karing anak yung lalaki ketang pamangan a miyain king GINU. Iti ya ing utus a tinggap ku king GINU.

¹⁴Ikayu ampon ding pamilya yu malyari kayung mangan king salu at king bitis a tauli a miyain bilang makapasubaling regalu king GINU at bilang makapasubaling regalu munaman para karing pari. Kanan yu iti ketang lugal a malinis. Ila deti ring dake miyabie kekayu at karing anak yu karing ain-ning-pamisulusulu a inain da ring memalen na ning Israel.

¹⁵Idala ya ing salu at ing bitis a tauli king altar at pati na ing taba a dulukan at iyain king GINU. Ila deti ring dake a mangaintulid kekayu at karing anak yu king kapilan pa man, agpang king inutus na ning GINU.

¹⁶Kaybat na nita, kitang neng Moises ing kambing a sukat iyain bilang ain-a-kapamayaran-king-kasalanan, at abalu na king iti dilukan da ne pala. Inya mimua ya kari Eleazar at Itamar. Sebianan na la. Ngana,

¹⁷Obat e ye pengan ing ain-a-kapamayaran-king-kasalanan ketang banal a lugal? Banal ya ita at binie ne ning GINU kekayu para makalako king kasalanan na ning balen Israel.

¹⁸Anti na ning e yu alub ing daya king banal a Tolda, sana pengan yu karin ing karni na ning animal a miyain, antimo ing inutus ku kekayu.

¹⁹At mekibat ya i Aaron kang Moises, Agyang king aldong iti ding memalen inain da ing karelang ain-a-kapamayaran-king-kasalanan at ing ain-a-durulukan king arapan na ning GINU, makanyan man deti ila pang mepalyari kanaku. O nu mong mengan ku king karni na ning ain-a-kapamayaran-king-kasalanan a miyain king aldong iti, ita kaya maging katanggap-tanggap king GINU?

²⁰Mipanatag ya lub i Moises inyang dimdam na iting sinabi nang Aaron.