Read Kapampangan Levitico 16 Bible Online

Levitico 16 - Kapampangan bible

Levitico 16

¹Migsalita ya ing GINU kang Moises kaybat na ning pangamate da ring adua nang anak a lalaking Aaron uli na ning pamaglapit da king GINU king paralan a e karapatdapat.

²Ngana ning GINU kang Moises, Sabian mu kang Aaron a kapatad mu king e nia kabud lulub king tabing ning Kabanal-banalan a Lugal nune mu king mitakdang panaun, uling karin ku papakit libutad ning metung a biga tulid ning takap ning Kaban ning Kasunduan. Mate ya, nung e ya tupad kaniti.

³Oneng malyari yang lungub king Kabanal-banalan a Lugal pota mung kaybat nang mekayain metung a biserung toro bilang ain-a-kapamayaran-king-kasalanan, at metung a lalaking tupa bilang ain-a-durulukan.

⁴Sukat ya pa mung mandilu i Aaron bayu ya lungub king Kabanal-banalan a Lugal, at kaybat isulud na la ring imalan-pari; ing barung linen a makaba takde ampon ding salol a makuyad, ing paha at ing linen a turban.

⁵Dinan ne ning balen Israel aduang kambing a lalaki i Aaron bilang ain-a-kapamayaran-king-kasalanan at metung a lalaking tupa bilang ain-a-durulukan.

⁶Miyain ya namang metung a toro bilang ain-a-kapamayaran-king-kasalanan para king sarili nang kasalanan, at para karing kasalanan da ring pamilya na.

⁷Kaybat na nita, idala na la ring aduang kambing king tulid nang pasbul ning Toldang tuknangan ku, ing GINU.

⁸King kapamilatan na ning bagutan[22] abalu na nung isanu kareting aduang kambing ing mangaintulid kanaku, at nung isanu ing mangaintulid kang Azazel.[23]

⁹Paten ne ing kambing a para kanaku, at iyain neng Aaron bilang ain-a-kapamayaran-king-kasalanan.

¹⁰Iyain neng mabie Aaron kanaku, ing GINU, ing kambing para kang Azazel at saka ne ibulus king disyerto papunta kang Azazel ban ilako na niti ing kasalanan da ring tau.

¹¹Paten neng Aaron ing toro at iyain ne bilang ain-a-kapamayaran-king-kasalanan para king kasalanan na at ning pamilya na.

¹²Kaybat, kuanan ne ing insensaryung mitmung mibabayang uling king altar. Kuma ya namang aduang kasakmal a mabanglung insensong mapinu at idala na iti kilub na ning Kabanal-banalan a Lugal.

¹³Karin king arapan ku, ing GINU, ibili na king uling a mibabaya ing insenso ban pampanan ne ning asuk ning insenso ing takap na ning Kaban ning Kasunduan ban e ne akuang akit at e ya mate.

¹⁴Kuma yang ditak king daya na ning toro at king kapamilatan na ning taliri na ipisik na king tulid ning takap, at kaybat ipisik na namang pitung besis ing daya king arap na ning Kaban ning Kasunduan.

¹⁵Kaybat na nita, paten ne ing kambing para king ain-a-kapamayaran-king-kasalanan da ring tau. Idala na ing daya na niti kilub na ning Kabanal-banalan a Lugal, at ipisik na king babo na ning takap, at kaybat king arap ning Kaban ning Kasunduan, antimo ing depatan na king daya ning toro.

¹⁶King anti kaniting paralan na gampanan ing seremonia na ning pamaglinis na king Kabanal-banalan a Lugal ketang nanumang dinat a ibat karing memalen na ning Israel at king sabla rang kasalanan. Makanyan munaman ing sukat nang gawan king Tolda, anti na ning iti makatalakad ya libutad na ning kampu a karaniwan lugal a e malinis.

¹⁷Alang aliwang taung lulub king Tolda king penandit a lungub ya i Aaron king Kabanal-banalan a Lugal ban gampanan na ing pamaglinis king kasalanan na, king pamilya na, at para king kasalanan na ning balen.

¹⁸Kalual na munta ya king altar a pidurulukan karing ain at saka ne linisan iti. Kuma yang ditak king daya na ning toro at ditak king daya na ning kambing, at saka na ikaskas karing sagu a makapaligid king altar.

¹⁹King kapamilatan na ning taliri na pisikan neng pitung besis king daya ing altar ban maging sagradu ya at luminis ya ketang sabla rang pamikasala ding memalen na ning Israel.

²⁰Potang agampanan na nang Aaron ing pamanain para king pamaglinis king Kabanal-banalan a Lugal, king aliwa na pang dake ning Toldang tuknangan ku, ing GINU, at para king altar, iyampang na ne kanita ing kambing a mabie a mepili para kang Azazel.

²¹Itumpak na la ding adua nang gamat king buntuk na ning kambing at sabian na tulid na ning kambing ing sablang dapat dang e ustu at kasalanan ding memalen na ning Israel. King makanyan a paralan milipat king buntuk na ning kambing ing sablang iti. Kaybat na nita, itabi ne ning metung a lalaking mitulduan ganap kaniti ing kambing papunta king disyerto.

²²Idala na ngan mako ning kambing ing sabla rang kasalanan, at idala na king lugal a e na panuknanganan ning ninumang tau.

²³Kaybat na nita, lungub ya i Aaron king Tolda; ilukas na ing imalan nang pari a sinulud na bayu ya linub king Kabanal-banalan a Lugal at lakuan na karin.

²⁴Mandilu ya king metung a lugal a sagradu at isulud na ing sarili nang imalan. Kaybat na nita, lumual ya at iyain ne ing ain-a-durulukan para king sarili nang kasalanan at para karing memalen.

²⁵Dulukan na naman king altar ing taba na ning animal para king ain-a-kapamayaran-king-kasalanan.

²⁶Ita namang lalaking mitabi king kambing papunta kang Azazel king disyerto, sukat yang mandilu at saka na pipian ing susulud nang imalan bayu ya magbalik lungub king kampu.

²⁷Ing toro at ing kambing a magamit para king ain-a-kapamayaran-king-kasalanan a dela ra daya kilub ning Kabanal-banalan a Lugal ban makalako king kasalanan sukat lang idala lual na ning kampu at dulukan la karin. Sukat ngan silaban ing balat, ing karni, at ing bituka.

²⁸Sukat nang pipian ing susulud nang imalan ning taung manyilab kaniti, at saka ya mandilu bayu ya magbalik lungub king kampu.

²⁹Iti ya ing tuntunan a sukat tuparan king kapilan pa man. Balang kapulung aldo ning kapitung bulan, ding Israelita at ding dayuan a makipamalen karela sukat lang mag-ayunu at e bitasang magobra.

³⁰King aldong ita marapat ing pamaglinis karela king sabla rang kasalanan ban maging malinis la arapan ku, ing GINU.

³¹Ing aldong ita sukat yang maging sagradu, uling aldo ne ning pamag-ayunu at ganap a pamagpaynawa king obra. Tuparan ye iting tuntunan king sablang panaun.

³²Ing Pamuntuk da ring Pari a miyordinan at mitalaga kayalili nang tata na, ya ing ganap king pamaglinis king kasalanan. Isulud na ing imalan-pari

³³at gampanan na ing pamaglinis king kasalanan karin king Kabanal-banalan a Lugal ning Toldang tuknangan ku, ing GINU, king altar para karing pari, at karing sablang memalen.

³⁴Manatili ya iting tuntunan king sablang panaun; tuparan ya misan kilub ning pabanua ban mipatawaran ing sabla rang kasalanan. At tiparan nang Moises ing sablang inutus na ning GINU.