Read Kapampangan Ding Tagulele 2 Bible Online

Ding Tagulele 2 - Kapampangan bible

Ding Tagulele 2

¹King mua ning GINU tikpan neng dalumdum ing Zion! Ing maligaya nang leguan inalilan nang kasiran. King aldo ning mua na pati Templo[1] na gilutan na.

²King alang lunus, ing GINU lesak na la ding sablang baryu ning Juda. At lesak na pati ding kuta a dipensa ning bansa. Ing kayarian at ding pamuntuk na kamarinayan binie na karela.

³King bigsikan ning mua na sikanan ning Israel bigsak na; e na katamu seupan inyang linusub lang kalaban. Mikakalabkab yang anting api laban kekatamu; ing sabla-sabla sinira na.

⁴Mengari ya king metung a kalaban, paslu na kekatamu bignus na la ngan; pete no ngan detang tula tamu't kaluguran. Keti king Jerusalem ing mua nang mikakaluku kekatamu yang tikman.

⁵Mengari ya king metung a kalaban, ing GINU ya ing linasak king Israel a bansa na. Ding kuta at palasyu lasak na la ngan. Dela na karing memalen ning Juda ing lungkut a alang kalupa.

⁶Linaso ne ing Templong kekatamung pititipunan nung nu ta ya sasamban; ding banal a aldo at ding Sabbath inangganan na na la. Ari at pari parehu dang tikman ing mua nang magdalang bigsikan.

⁷Pepaburen ne ning GINU ing altar na, at gilutan ne ing Templo nang banal. Peintulutan na lang kalaban pader na karela lang lasakan. Kinulisak la uli ning pamagtagumpe ra, king kakarinan a kanitang misan king mitmung tula karin ta ya sasamban.

⁸Buri ning GINU king ding pader ning Zion sukat lang idagsa; sikdan na la ban maging ganap ing pangalasak da. Ngeni ding tore at pader na makaragsa la uli ning pangalasak da.

⁹Ding pasbul dalan ning siudad mitambunan la, mepakli la ding kabat da. Ing ari at ding taung marangal miyugse la king marayung lugal. Ing Kautusan e ne mituturu at mipapasiag, at ding propeta naman king GINU ala na lang tatanggapan a vision.[2]

¹⁰Ding makatua nang lalaki ning Jerusalem tahimik lang pakalukluk king gabun, ating alikabuk karing karelang buntuk, at langgotsi ing makabalabal karing karelang katawan; ding dalaga king gabun pakaduku la ngan.

¹¹Mata ku mengaslak la, uli ning luang tutulu karela; ing lub ku saskup ya. Mepagal na ku kening lungkut,[3] uli ning kasiran a dinatang karing kakung kabalen. Ding anak at ding bingut mangaliu la karing dalan ning siudad.

¹²Danupan la at mau; ausan do ring karelang ima. Misakab la karing dalan; anti la waring sugatan at karing imang kandungan tunggal ditak daratang ing karelang kamatayan.

¹³O Jerusalem, Jerusalem a pakamalan, nanu ing kakung sukat sabian? Makananu da kang saupan? Ala pang mirasnan king makanyan a kabilian. Ing kekang kasiran anti ing dagat a malapad; ala nang asilip pang kapanayan.

¹⁴Ding kekang propeta kalaraman ing keka balu rang sabian; pirait da ka king karelang panaral. Kapilan man e ra pepakilala ing kekang pamikasala. Uli ra, e mu na aisip pa king kailangan ing sumisi ka.

¹⁵Ding taung daralan king siudad lalawan da kang ating sunu. Pipiling-piling da lang karelang buntuk, at kaylian da ing pangalasak ning Jerusalem: Iti ya wari ing siudad a malagu a pagmaragul ning yatu?

¹⁶Insultuan da ka ding sablang kekang kalaban, at ing lawe da keka mataram. Pilabilabi da ka at insultuan; karelang sasabian, Ikua ta ya mu ring alasak! Iti ya ing aldo a malambat ta nang panenayan!

¹⁷Ing GINU lubus na nang agampanan ing tingka nang daptan: king alang lunus sinira na kata ngan antimo ing bela na karing aldo milabasan. Tagumpe ing binie na karing kalaban tamu, at king kekatamung pangabigu tula ing karela binie ning GINU.

¹⁸O Zion, paburen mung ding mismung pader mu kulisak la king GINU! Bengi't aldo paburen mung ing lua mu magus anti ing danum ning ilug. Gisanan mu ing kekang sikanan king tangis at king kalungkutan.

¹⁹Mibangun ka king kekaban ning kabengian, king GINU ulit-ulit maniawad; pusu mu keka yang ibuklat, maniawad kang lunus para karing kekang anak, karing anak a mamamate king danup king balang suluk ning siudad!

²⁰Lawan mu, O GINU! Keka lang balikdan ding kekang pasakitan! Ding babai karela lang kakanan ding anak a karelang pakamalan! Ding pari at propeta king mismung Templo paten da la!

²¹Mete lang kayanakan at makatua, at karing dalan makalugmuk la; ding kabaintaunan at kadalagnan mete la karing espada da ring kalaban. King keyalang lunus pete mo ngan lubus king aldo ning kekang mua.

²²Kakung kalaban keka lang inagkat ban gawang bage makapangilabut king sablang kaku makapadurut. Ala metung mang mekaligtas king aldo ning kekang mua. Pete da lang kakung anak, ding kakung peparagul at pakamalan.