Read Kapampangan Baruk 2 Bible Online

Baruk 2 - Kapampangan bible

Baruk 2

¹Inya tituanan na ning Ginu itang bela na kekatamu, karing ukum tamu at ari, karing pamuntuk tamu, at karing sablang memalen ning Israel at Juda.

²Ala pang bansa a mekatakman king kasakitan a pepagpa ning Ginu king Jerusalem kanitang tituanan ne ing tagle nang babala ning Kautusan nang Moises.

³Uli na ning danup pengan ta la ding sarili tamung anak.

⁴Kinalat na katamu ning Ginu karing miyayaliwang bansang makapadurut kekatamu, at pepailalam na katamu karing upaya da ring ari da. Mengapakarine tamu at meging pikakasaman ampon kasebian.

⁵Lugal king itas na katamu kabilian, beba na katamu uling mikasala tamu king Ginu. E tamu pekiramdaman ing siwala na. Inya mesambut ya ing bansa tamu lugal king manyambut tamu.

⁶Makatuliran ya ing Ginung kekatamung Dios, oneng itamu at ding makatua tamu kababayatnan tamu angga ngeni uli na ning depat tamung pamikasala.

⁷Metupad la kekatamu ding sablang sumpa a binggitan ning Ginu.

⁸Makanyan man, e ta pa mu rin linapit menalangin king Dios at e tinuknang king dapat a e mayap.

⁹Mahigpit na katamung binten ning Ginu. Binie na la kekatamu ding utus na,

¹⁰oneng e ta ya pekiramdaman o e tinuntun karing tuntunan a binie na kekatamu. Inya digpa la kekatamu deting parusang migdalang kasakitan uling makatuliran ya.

¹¹Ika, O Ginung Dios ning Israel, ing milual karing memalen mu king Ehipto king kapamilatan na ning mayupaya at makayatiat mung gamat, ning milagru ampon tanda, at maragul a upaya. Pepakit mu ing kekang sikanan inya akilala da ka angga ngeni ding bansa.

¹²O Ginung kekaming Dios, mikasala kami keka; e kami meging tapat keka, lebagan mi la ding sablang kautusan mu.

¹³E na ka sana mimimua kekami uling ditak na la mu ding mitagan kekami keting bansa nung nu mu ke inugse.

¹⁴Pakiramdaman mu sana, O Ginu, ing panalangin mi at iligtas mu kami alang-alang king kekang dangalan. Gawan mu lang maganaka kekami ding memihag kekami

¹⁵ban kanita abalu na ning mabilug a yatu king ika ing Ginung kekaming Dios, at king ing Israel ya ing pinili mung maging sarili mung balen.

¹⁶O Ginung makalukluk king banuang tuknangan mu, lawan mu kami at pakiramdaman mu kami.

¹⁷Ibuklat mu la ding mata mu at lawan mu kami. E na la makaibie pang kapurian keka ding mete o makapamalita king kekang e pamangabiran.

¹⁸Ding makaibie mung kapurian keka o makapamalita king kekang e pamangabiran ila ding mabie agyang pang daralan lang maragul a kasakitan, agyang pang mebukut la at maina o danupan at mapula mata.

¹⁹O Ginung kekaming Dios, ipakisabi ming mayap, malunus ka sa kekami, e uli na ning nanumang depat dang mayap ding makatua mi at ding ari mi.

²⁰Kekami mu bigsak ing maragul mung mua antimo nung makananu mung sinabing kekang daptan kanitang migsalita la ding talasuyu mung propeta kekami. Ngamu kekami king kapamilatan da,

²¹Duku[3] kayu king ari ning Babilonia at suyuan ye at papanatilian da kayu king bansang binie ku karing makatua yu.

²²Nung e kayu mamintu king utus kung suyuan ye,

²³kanita ku na pututan ing tula at ing pamagpiesta karing siudad ning Juda at Jerusalem. E na kanita maramdam pa ing inge ning kasalan. Malasak ya ing bansa at milako ya tau.

²⁴Oneng e mi pemintuan ing utus mung suyuan mi ya ing ari ning Babilonia. Uli na niti, tituanan mu itang sinabi mu king kapamilatan da ring propeta a kulkulan da la at ikalat ding butul da ring mete ming ari at makatua.

²⁵Oyta pakakalat la at makatangad king pali ning aldo at king dimla neng bengi. Mete lang magkakasakit king danup, king gera, at king sakit.

²⁶Lesak me ing Templo uli na ning kasalanan da ring memalen ning Israel at Juda, at menatili yang lasak angga ngeni.

²⁷Makanyan man, O Ginung kekaming Dios, penupaya mu kami at melunus ka kekami

²⁸antimo ing pengaku mu kang Moises a talasuyu mu inyang king akakit da ring tau pepasulat mu la ding utus mu.

²⁹Ngamu, Nung e yu ku pamintuan, dumitak kayu at iyugse da kayu karing aliwang bansa.

³⁰Balu ku king e yu ku pamintuan uling masias kayu buntuk. Oneng makapi-isip-isip kayu potang mebihag na kayu at miyugse.

³¹Kanita yu akilala king aku ing Ginung kekayung Dios, at dinan da kayung pamisip at balugbug a biasang makiramdam.

³²Kanita yu ku purian at ganakan king bansa nung nu kayu miyugse.

³³Sisian yu ing kesiasan yung buntuk at tuknang na kayung darapat e ustu, uling aganaka yu ing milyari karing makatua yu inyang mikasala la kanaku.

³⁴Kaybat na nita, ibalik da kayu king bansa a tapat kung pengakung ibie karing makatua yung i Abraham, Isaac, at Jacob. Maging kekayu yang pasibayu. Parakalan ku ing bilang yu at e na kayu kapilan man dumitak.

³⁵Gawa kung alang anggang kasunduan kekayu; aku ing maging Dios yu at ikayu ding maging memalen ku. E ku na la kapilan man ilako ding memalen ku king bansang binie ku karela.