Read Kapampangan Baruk 4 Bible Online

Baruk 4 - Kapampangan bible

Baruk 4

¹Ing Kabiasnan ya ing libru ning Dios tungkul karing kautusan, ing Kautusan a manatili king kapilan pa man. E ya mate ing ninumang tutupad[5] kaniti, oneng mate ya ing ninumang gumulut kaniti.

²O memalen ning Israel, magbalik kayu king Kabiasnan at tuparan ye. Lumakad kayu king aslag a babie na.

³E yu sana babie karing aliwa ing dangalan yu at karapatan.

⁴Memalen ning Israel, mapalad tamu uling balu tamu itang makaibie tula king Dios.

⁵Kabalen ku, e yu painan ing lub yu. Mabie ya pa lagyu ing Israel king uli yu.

⁶Mepisali kayu karing dayuan e ban gisanan da kayung paten. Mesakup kayu karing kalaban yu uling pepamua ye ing Dios.

⁷Pepamua ye ing Dios a linalang kekayu inyang minie kayung ain karing demonyu at e king Dios.

⁸Kelinguan ye ing Dios a miningat kekayu manibat na king kapupurmeruan; pepalungkut ye ing Jerusalem a menese kekayu.

⁹Ikit ning Jerusalem ing parusan na kayu ning Dios. Ngana ning Jerusalem karing kasiping nang siudad, Lawan yu ing maragul a kasakitan a pepagpa ning Dios kanaku.

¹⁰Ikit ku lang midala king pangabihag at king pangayugse ding anak kung lalaki at babai. Iti parusang pepagpa na karela ning Alang Anggang Dios.

¹¹Peparagul ku la ding anak ku king mitmung tula, oneng kiniak ku at melungkut inyang kinua da la kanaku.

¹²E yu ku sana pagsisti king milyari kanaku ngening mebalu na ku at kewalan dakal a anak. Ginulut la king Kautusan ning Dios, at ing kasalanan da ya ing pepasari king pangalako na tau ning siudad.

¹³E da la buring pamintuan ding kautusan na ning Dios at e bisang tuntun karing tuntunan na. E la bisang pataid king Dios at e bisang paturu king dalan ning kabanalan na.

¹⁴Kasiping kung siudad, 'me ko keni at pibulayan nung makananu na lang inugse ning Alang Anggang Dios karing aliwang bansa ding memalen kung anak.

¹⁵Dela ne karela ing metung a bansang atyu king marayu; mabagsik ya at e mu aintindian ing salita na at ala yang galang ampon lunus karing makatua at anak.

¹⁶Binihag da la ring anak kung pakamalan a lalaki at babai. Ngeni magdili-dili ku king kalungkutan.

¹⁷Kakung anak, e da kayu asaupan.

¹⁸Ita mung minie kekayu kaniting parusa ya ing malyaring makapagligtas kekayu karing kalaban yu.

¹⁹Sulung, mako na kayu; ikayu nang bala king bie yu. Magdili-dili na ku.

²⁰Likas ku ne ing imalan a susulud ku karing aldo ning kapayapan, at sinulud ing imalan a magaspang ning pamagpaldas. Kabang mabie ku, e ku tuknang maniawad saup king Alang Anggang Dios.

²¹Tatagan yu, anak ko, ing lub yu. Maus kayu king Dios, at iligtas na kayu karing kalaban a manggipit kekayu.

²²Atin kung kapanaligan a ikabus na kayu ning Alang Anggang Dios. Ing Bukud mung Banal, ing alang anggang Talapagligtas yu, gawan na kung maligaya potang ipakit na ing lunus na kekayu.

²³Kiniak ku at menagulele inyang meyakua kayung bihag, oneng pasibayu na kayung ibalik kanaku ning Dios at gawan maligaya king kapilan pa man.

²⁴Ikit da ring kasiping kung siudad ing pangabihag yu, at e lumuat akit da naman ing pamagligtas na kekayu ning Alang Anggang Dios at ning maragul nang ligaya at kamalan.

²⁵Kakung anak, pibatan yu ing binie nang kasakitan kekayu ning Dios. Wa, pepasakitan da kayu ding kalaban yu, oneng e lumuat akit yu lang mate at magpakalunus la kekayu.[6]

²⁶Kakung anak, penusignan da kayu king lugud, oneng kailangan kayung dumalan karing baku-bakung dalan. Mengari kayu king metung a kawan a tupang simsam da ring manlub a kalaban.

²⁷Kakung anak, e yu painan ing lub yu. Maniawad kayung saup king Dios. Wa, perusan na kayu, oneng e na kayu malyaring kalinguan.

²⁸Linaut kayu king Dios kanitang milabasan a panaun, oneng ngeni mibalik kayu at suyuan ye ing Dios king mitmung pamagkapilit.[7]

²⁹Itang pepagpa kekayu kareting kasakitan ya ing magligtas kekayu at minie king kaligayan a alang kapupusan.

³⁰Jerusalem, e mu painan ing lub mu. Ing Dios a minie lagyu keka ya ing munie tula keka.

³¹Misakitan la detang menggipit kekayu a metula inyang mibagsak kayu.

³²Datang ing kasakitan karing siudad a menipus karing anak mu. Kasakitan ing maging kalma ning Babilonia, iting siudad a linaklak karing anak mu.

³³Kanita migsaya ya iting siudad inyang mibagsak ka at metula king pangalasak mu, ngeni ya naman ing kumiak potang malakuan yang magdili-dili.

³⁴Gawan kung kalungkutan ing ketasan na at pamagmayabang, at ilako ku la ding dakal a taung pagmaragul na.

³⁵Aku, ing Alang Anggang Dios, ing miparalang api a silab keting bansa. Masilab ya kilub ding dakal a aldo. Panuknanganan da nia mu ring demonyu king kekaban ning panaun.

³⁶Jerusalem, lumawe ka king aslagan; lawan mu ing tula a darala na keka ning Dios.

³⁷Lawan mu, mumuli na la ding anak mu a kinua da keka. Mitipun-tipun la ibat king aslagan at king albugan uli na ning utus ning Dios, ing Bukud mung Banal. Mumuli na la ngening ating kapurian king ligaya na ning Dios.