Read Kapampangan Ing Kanta Ding Atlung Kayanakan A Lalaki 1 Bible Online

Ing Kanta Ding Atlung Kayanakan A Lalaki 1 - Kapampangan bible

Ing Kanta Ding Atlung Kayanakan A Lalaki 1

¹Linakad la ding atlung kayanakan a lalaki libutad ning mikakalabkab a api; magkanta lang kapurian king Dios at parangalan de ing Ginu. Deting atlung kayanakan ila di Hanania, Misael, at Azaria.

²Tinuknang yang lalakad i Azaria libutad ning mapaling ornu at nganang menalangin masikan:

³Sasamban da ka at pupurian, O Ginung Dios da ring makatua mi. Karapatdapat yang purian ing lagyu mu king sablang panaun

⁴uling makatuliran la ding dapat mu at tune kang tapat king sablang dapat mu at alang pamangabiran ing kayatulan mu.

⁵Mangaintulid ya ing parusa mu kekami at king Jerusalem, ing banal a siudad da ring makatua mi. Karapatdapat ing parusang pepagpa mu kekami uling mikasala kami.

⁶E ke memintu keka, lebagan mi la ding kautusan mu at linaban ke keka.

⁷E mi la depatan detang parapat mu kekami. Nung depat mi ing kaburian mu siguradung mayan ing bie mi.

⁸Inya karapatdapat la ding parusang pepagpa mu kekami.

⁹Binie mu kami karing maigpit ming kalaban a alang kikilalanan a kautusan at tune mabagsik, at pepa-ipus mu kami king metung a aring e mayap dili keti king yatu.

¹⁰At ngeni, ala keng lupang makiarap kenu man at e kami makapagsalita agyang kataya mung amanu uli na ning mengapakarine kami, ikaming sasamba keka.

¹¹Oneng alang-alang king kekang dangalan, e mu kami lalakuan kabang panaun at e me pupututan ing kasunduan mu kekami.

¹²E mu sa pagkaymut ing lunus mu kekami. Tuparan mu la sana ding pengaku mu king pakamalan mung i Abraham, i Isaac a talasuyu mu, at kang Jacob a ibpa na ning banal a balen mung Israel.

¹³Pengaku mu karela king dinan mu lang lahi a kasing dakal da ring batuin king banua o ning balas king pampang.

¹⁴Oneng ngeni, O Ginu, meging pekamalati kaming bansa keti king yatu. Mabibie kami ngeni king kamarinayan uli da ring kasalanan mi.

¹⁵Ala kaming ari, ala kaming propeta o manimuna. Ala ne ngeni ing Templo nung nu kami babie kekang ain-a-durulukan, ain-sakripisyu, lamak o insenso. Ala mang lugal a pidinan ming ain ban makapaniawad kaming lunus keka.

¹⁶Oneng ngeni lalapit kami keka king mitmung kapanisian at kapakumbaban. Tanggapan mu ke sana agyang pang ala keng daralan a ain-a-durulukan a baka o tupa o libu-libung pepatabang biserung tupa.

¹⁷Tanggapan mu sana ing kapanisian mi bilang ain-sakripisyu keka ban kanita makapamintu kami keka king mabilug ming pusu. Alang mabigu karetang manalig keka.

¹⁸Inya manibat ngeni, tukian da ka king mabilug ming pusu; samban da ka at purian.

¹⁹Maging maganaka ka sa at malunusan kekami. E mu kami paburen mangapakarine.

²⁰O Ginu, iligtas mu kami king kapamilatan na ning pamaniapat mung milagru, at kanita pasibayu yang miparangalan ing lagyu mu.

²¹Mangapahamak la sana at mangapakarine ding sablang pasari king kasakitan mi; ilako mu la sikanan at siran mu ing kayupayan da.

²²Ipakilala mu karela king ika mung bukud ing Ginu at Dios at ing marangal a mag-ari king mabilug a yatu.

²³Ding talasuyu ning ari a miyutusan miyugse karing atlung kayanakan king ornu e la pepatugut tatangab laru, alketran, kandila, at dutung.

²⁴Inya mikalabkab ing api at miras anggang pitung pulu't limang talampakan king katas.

²⁵Uli na niti, mesilab la detang tau Babilonia a makatalakad lele ning ornu.

²⁶Kanita tinipa ya ing metung a anghel ning Ginu king api nung nu la karin ding atlung kayanakan a lalaki. Linele na ing api

²⁷at balamu meramdam ing marimlang tiup ning angin, at e no disan ning api at e no ananu balang ding atlung kayanakan a lalaki.

²⁸Miyabe-abe lang migkantang kapurian king Dios ding atlung kayanakan a lalaking inugse ra king ornu. Ngara:

²⁹Pupurian da ka, O Ginu, ing Dios ding makatua mi. Karapatdapat kang parangalan king alang kapupusan.

³⁰Purian ya ing banal, at maligaya mung lagyu; karapatdapat yang parangalan ngeni at king kapilan pa man.

³¹Pupurian da ka king banal, at maligaya mung tuknangan; tune sana ding himno ikanta la keka.

³²Pupurian da ka king tronu mung luklukan king banua babo ding kerubin, at makalawe king tuknangan da ring mete. Karapatdapat kang purian, at parangalan king kapilan pa man.

³³Pupurian da ka, ika a makalukluk matas king tronung ari. Karapatdapat kang pagkanta, at parangalan king kapilan pa man.

³⁴Purian ka, ikang atyu king meto sikluban. Karapatdapat kang pagkanta, at paligayan king kapilan man.

³⁵Ikong sablang lelangan, ing Ginu yang purian; pagkanta yeng kapurian, at parangalan king kapilan pa man.

³⁶Meto sikluban,[1] ing Ginu yang purian; pagkanta yeng kapurian, at parangalan king kapilan pa man.

³⁷Ikong anghel ning Ginu, pagkanta yeng kapurian, at parangalan king kapilan pa man.

³⁸Ikong sablang sibul king banua, pagkanta yeng kapurian, at parangalan ing Ginu king kapilan pa man.

³⁹Ikong sablang sundalus na, pagkanta yeng kapurian, at parangalan king kapilan pa man.

⁴⁰Aldo at bulan, ing Ginu yang purian; pagkanta yeng kapurian, at parangalan king kapilan pa man.

⁴¹Ikong batuin ning banua, ing Ginu yang purian; pagkanta yeng kapurian, at parangalan king kapilan pa man.

⁴²Uran at ambun, ing Ginu yang purian; pagkanta yeng kapurian, at parangalan king kapilan pa man.

⁴³Angin a tutiup nu man karin, ing Ginu yang purian, pagkanta yang kapurian, at parangalan king kapilan pa man.

⁴⁴Api at pali, ing Ginu yang purian; pagkanta yeng kapurian, at parangalan king kapilan pa man.

⁴⁵Manduluk a pali at matinding dimla, ing Ginu yang purian; pagkanta yeng kapurian, at parangalan king kapilan pa man.

⁴⁶Ambun at yelung mababaldug, ing Ginu yang purian; pagkanta yeng kapurian, at parangalan king kapilan pa man.

⁴⁷Bengi at aldo, ing Ginu ing purian; pagkanta yang kapurian, at parangalan king kapilan pa man.

⁴⁸Sala at dalumdum, ing Ginu yang purian; pagkanta yeng kapurian, at parangalan king kapilan pa man.

⁴⁹Yelu at dimla, ing Ginu yang purian; pagkanta yeng kapurian, at parangalan king kapilan pa man.

⁵⁰Iladung danum at mananabung yelu, ing Ginu yang purian; pagkanta yeng kapurian, at parangalan king kapilan pa man.

⁵¹Kildap at ulap, ing Ginu yang purian; pagkanta yeng kapurian, at parangalan king kapilan pa man.

⁵²O yatu, purian yang Ginu; pagkanta meng kapurian, at parangalan king kapilan pa man.

⁵³Ikong sablang bunduk at bunduk-bundukan, ing Ginu yang purian; pagkanta yeng kapurian, at parangalan king kapilan pa man.

⁵⁴Ikong sablang king gabun tutubu, ing Ginu yang purian; pagkanta yeng kapurian, at parangalan king kapilan pa man.

⁵⁵Ikong sablang dagat at ilug, ing Ginu yang purian; pagkanta yeng kapurian, at parangalan king kapilan pa man.

⁵⁶Ikong sablang sibul ning danum ing Ginu yang purian; pagkanta yeng kapurian, at parangalan king kapilan pa man.

⁵⁷Ikong balyena at sablang kakawe king danuman, ing Ginu yang purian; pagkanta yeng kapurian, at parangalan king kapilan pa man.

⁵⁸Ikong sablang ayup, ing Ginu yang purian; pagkanta yeng kapurian, at parangalan king kapilan pa man.

⁵⁹Ikong baka at animal a malyap, ing Ginu yang purian; pagkanta yeng kapurian, at parangalan king kapilan pa man.

⁶⁰Ikong sablang tau ning yatu, ing Ginu yang purian; pagkanta yeng kapurian, at parangalan king kapilan pa man.

⁶¹O Israel, ing Ginu yang purian; pagkanta meng kapurian, at parangalan king kapilan pa man.

⁶²Ikong pari na, ing Ginu yang purian; pagkanta yeng kapurian, at parangalan king kapilan pa man.

⁶³Ikong talasuyu na, ing Ginu yang purian; pagkanta yeng kapurian, at parangalan king kapilan pa man.

⁶⁴Ikong sablang tapat a tau, ing Ginu yang purian; pagkanta yeng kapurian, at parangalan king kapilan pa man.

⁶⁵Ikong sablang banal at mababa lub, ing Ginu yang purian; pagkanta yeng kapurian, at parangalan king kapilan pa man.

⁶⁶Hanania, Azaria, at Misael, ing Ginu yang purian; pagkanta yeng kapurian, at parangalan king kapilan pa man. Uling segip na katamu king tuknangan da ring mete, at king upaya ning kamatayan. Linigtas na katamu king mapaling ornu, segip king aping mitatau.

⁶⁷Munie tamung kapasalamatan king Ginu, uling mayap ya; ing lunus na manatili king kapilan pa man.

⁶⁸Ikong sablang sasamba king Ginu, purian ye ing Dios da ring dios; pagkanta yeng kapurian ampon pasalamatan, uling ing lunus na manatili king kapilan pa man.