Read Kapampangan Susana 1 Bible Online

Susana 1 - Kapampangan bible

Susana 1

¹Atin kanitang lalaking manuknangan king Babilonia a ausan dang Joakim.

²Mekapakiasawa ya king metung a babaing milagyuan Susana a anak nang Hilkia. Malagu ya i Susana; atin yang takut at kagalangan king Ginu.

³Mayap lang tau ding pengari na at peparagul de i Susana, agpang king Kautusan nang Moises.

⁴I Joakim, ing asawa na, mabandi ya. Makapadurut ya ing bale na king malualas a hardin. Karin la maralas mitatagpu at mipupulung ding Judio uling maragul ing panlalawe ra kang Joakim.

⁵Ing pibalebale nang Joakim ya ing meging opisina da ring aduang ukum ning balen, at karin la pupunta deng tau neng ating lang pisasabian keng husgadu. Kanitang banuang ita la mitulduan ukum ding aduang tau. Ila ding sasabian na ning Ginu inyang sinabi na: Mika ating e mayap king Babilonia uli da ring makatuang mitulduan ukum uling e la tapat king karelang katungkulan.

⁶

⁷Mamako la deng tau neng oras maugtu at kanita ne man mamasyal i Susana king hardin na ning asawa na.

⁸Aldo-aldo, ding aduang ukum akakit deng mamasyal i Susana king hardin at mika lub la king asawa nang Joakim.

⁹Meragul ing kapagnasan da kang Susana at kelinguan da na ing pamanalangin at ing katungkulan da antimong ukum.

¹⁰Parehu deng buring-buri i Susana, oneng linihim na ning metung at metung karela,

¹¹uling marine rang ipagtapat king metung at metung ing pamagnasa da kang Susana.

¹²At sindu ra aldo-aldo ing karelang kasabikan a akit deng mamasyal king hardin i Susana.

¹³Misan a aldo, ngana ning metung at metung karela, Tara, muli ta na. Oras nang maugtu.

¹⁴Mikawani lang dalan, oneng migbalik ya ing metung at metung. King e ra sasarian mikit lang pasibayu. Mikutnanan la at e ra alisian ipagtapat king metung at metung ing kapagnasan na kang Susana. Pikayari da ing pakitagpuan de i Susana potang magdili-dili ya.

¹⁵Misan, kabang manenaya lang masanting a oportunidad, i Susana antimo ing meging kaugalian na, dinatang ya king hardin a kayabe ding aduang dalagang abe na. Malisangan kanita inya bisa yang mandilu karin king hardin.

¹⁶Alang aliwang tau karin nune mu ding aduang ukum a manyilip kang Susana.

¹⁷Nganang Susana karing adua nang abe, Kuanan yu itang pabanglu at larung olibo at isara ye ing pasbul ban maka pandilu ku.

¹⁸Memintu la ding abe at sera de ing pasbul na ning hardin. Linual la ketang aliwang pasbul ban kuanan itang papakua nang Susana. E da la ikit ding aduang ukum uling makasalikut la.

¹⁹Inyang meko na la ding abe, linual la ding aduang ukum at pintalan de i Susana.

²⁰Ngara, Susana, makasara la ding pasbul at alang manakit kekatamu. Sabik kaming makisiping keka. Paintulut mu na sana ing buri mi.

²¹Nung tanggi ka, ipalto mi at patutuanan mi king ukuman king makitagpu ka king metung a kayanakan, inya pepalakuan mu la ding abe mu.

²²Mengisnawa yang saldak i Susana at ngana, Gipit ku nukarin ku man magkabili. Nung paintulut ku ing buri yu, magdusa kung kamatayan; nung e ku ipaintulut, gipitan yu na ku man.

²³Oneng inari ku na king lub ku ing e ku paintulut ing aduan yu. Mas buri ku pa ing gipitan yu ku kesa king mikasala ku king Dios.

²⁴Kanita kinulisak yang masikan i Susana; oneng kinulisak la naman ding aduang ukum laban kang Susana.

²⁵Milayi ya ing metung karing ukum at biklat ne ing pasbul.

²⁶Inyang dimdam da ring kasaup king bale ing kulisakan king hardin, memalagua lang linub king pasbul katalindikingan na ning hardin ban lawan nung nanu ing milyari kang Susana.

²⁷Selita da ring aduang ukum ing gewa rang istoria laban kang Susana. Inya mebigla la ding kasaup king bale king karelang dimdam, uling balu ra king e na gawan Susana ing makanyan a bage.

²⁸Itang kabukasan, inyang makatipun na la ding tau king bale nang Joakim, ing asawa nang Susana, dinatang la ding aduang ukum. Makasadia la king e mayap dang planung miyatulan yang kamatayan i Susana.

²⁹King daramdaman da ring tau, ngarang minie utus, Ausan ye i Susana, ing anak nang Hilkia at asawa nang Joakim.

³⁰Dinatang ya i Susana a kayabe ding pengari na, ding anak na at kamaganak.

³¹Tune yang malagu at mahinhin i Susana.

³²Makatakap yang belu ing lupa na, oneng ding aduang e mayap a ukum pepalako re ban magpakasawa lang lalawe king leguan nang Susana.

³³Oneng menangis la ding pamilya na at pati na ding sablang atyu karin.

³⁴Kanita tinalakad la ding aduang ukum at timpak da la ring gamat da king buntuk nang Susana, at sinabi ra ing sumbung dang laban kang Susana.

³⁵Kikiak ya i Susana at makalawe ya banua uling king kabubusalan na ning pusu na manalig ya king Ginu.

³⁶Ngara ding ukum, Lalakad kami kanita king hardin inyang i Susana linub ya at ding aduang babaing abe na. Sera ne ing pasbul ning hardin at kaybat pepalakuan na la ding abe na.

³⁷E melambat linual ya ing metung a kayanakan a lalaki ketang pisasalikutan na at ya ampon i Susana migkera lang misiping.

³⁸Atyu kami kanita ketang metung nang suluk ning hardin at lepitan mi la inyang ikit mi ing e ustung gagawan da.

³⁹Ikit mi la king akto, oneng e mi ya ikuang arakap ing lalaki uling mas masikan ya kesa kekami. Memulayi ya; biklat ne ing pasbul at tinakas ya.

⁴⁰Ikua mi yang arakap ing babaing ini at kitnan mi ya nung ninu itang lalaking ita, oneng e ne buring sabian kekami. Tutung-tutu ing sasabian mi kekayu.

⁴¹Meniwala la ding taung atyu karin uling pikabaluan la ding ukum bilang pamuntuk at ukum ning balen. Inya inatulan deng kamatayan i Susana.

⁴²Uli na niti, menangis yang e mu nanu i Susana at ngana, O Dios a Alang Angga a makibalu king sablang lihim at manakit king bage bayu pa mapalyari,

⁴³balu mu king e tutu ing sumbung da ring ukum laban kanaku. Ngeni mate ku king kasalanan a e ku gewa.

⁴⁴Dimdam ning Ginu ing panalangin nang Susana.

⁴⁵Inyang darala da ne i Susana ketang lugal nung nukarin de paten, king taid ning Dios migsalita yang masikan ing metung a kayanakan a lalaking milagyuan Daniel. Ngana, E ku bisang mika pakibatan king atul yung kamatayan king babaing iti.

⁴⁶

⁴⁷Linawe re ngan at ngarang kinutang, Nanu ing buri mung sabian?

⁴⁸Miglibutad ya karela i Daniel at ngana, Kabalen kung Israelita, tune na kayu waring mangmang inya inatulan yeng kamatayan ing babai a e kayu pa mu ginawang pamaniasat at pamanimbang king katutuan?

⁴⁹Kailangan ing ulitan ing pamaglitis uling alang bitasang katutuan king sinabi da ring aduang testigung ukum.

⁵⁰Memalagua lang migbalik ding tau. Ngara ding pamuntuk kang Daniel, Me keni. Makiluklukan ka kekami at anti na ning midinan kang kabiasnan a kalupa na ning karing makatua, saupan mu keng matul king karampatan a paralan kaniting pisasabian.

⁵¹Nganang Daniel, Pikawanian yu la deng aduang ukum a ren at siasatan ku lang liwas-liwas.

⁵²Inyang apikawani da na la, inaus neng Daniel ing metung at ngana, Matuang talapaniapat e mayap, ding mismung kasalanan a kekang gewa karing milabasan a panaun ilang dinakap keka.

⁵³E la makatuliran ding kayatulan a binie mu, uling ding alang kasalanan ilang perusan mu at ding mikasala ilang pepawalan mung sala. E na wari sinabi ning Dios, E ye atulan kamatayan ing taung alang kasalanan at mayap?

⁵⁴Ngeni, nung tune ping ikit mu ing bibintang mu laban king babaing i Susana, sabian mung tutu: nukarin lalam tanaman mu la ikit king akto? Pekibat na, King lalam na ning tanaman a mastik.[1]

⁵⁵Nganang Daniel, A karen! Makataya ngeni ing bie mu kapamilatan na ning pakibat mu, uling sinabi na na ning Dios karing anghel na ing atul para keka at mapidua ka.

⁵⁶Linaut de ing ukum at kaybat inawad nang Daniel king idala re king arap na ing aliwa pang ukum. Inyang atyu ne, nganang Daniel, Ika anak na kang Canaan; e na ka anak Juda! Mebihag ka king leguan na ning babai at melinlang king e mayap nang nasa ning kekang laman.

⁵⁷Balu mi na ngeni nung nanu ing pemanggawa mu karing kebabainan na ning Israel. Pematakutan mu la ban apanusignan mu ing nasa mu. Oneng e na ayamyam ning metung karing kebabainan ning Juda ing panusignan na ka.

⁵⁸Sabian mu ing tutu: nukarin lalam tanaman mu la ikit king akto ing babaing ini at ing kalaguyo na? Nganang mekibat, Lalam na ning tanaman a ensina.

⁵⁹Nganang Daniel, A karen! Makataya ing bie mu uling malaram ka naman. Manaya ne ing anghel na ning Dios at ing tabak na ban pamirasuan na kang mangalati. Parehu na kayung mawala kanita.

⁶⁰Uli na niti, kinulisak lang masikan ding dakal a taung atyu karin, at pinuri de't pepasalamatan ing Dios a magligtas karetang manalig king katapatan na.

⁶¹Dekap da la ring aduang ukum. Uli nang Daniel, mipatunayan lang malaram king mismung amanung pepalual da king asbuk da.

⁶²Gewa da ring tau itang gewa da retang ukum karela. Inatulan da lang kamatayan, agpang king aduan na ning Kautusan nang Moises. Inya king aldo mu ring ita miligtas ya king kamatayan ing taung alang kasalanan.

⁶³Pinuri de't pepasalamatan ing Dios di Hilkia at ing asawa na uling miligtas ya i Susana. Makanyan munaman ing gewa nang Joakim, ing asawa na, at ding sablang kamaganak na, uling mipatunayan king ala yang gewang makarine ing asawa na.

⁶⁴Manibat na kanita, mitas la paglalawe ding tau kang Daniel.