Read Kapampangan Ding Bilang 13 Bible Online

Ding Bilang 13 - Kapampangan bible

Ding Bilang 13

¹Ngana ning GINU kang Moises,

²Mamili kang metung a lalaki karing manimuna da ring balang tribu, at itubud mu lang anting ispia[20] king Canaan a babie ku karing memalen na ning Israel ban lawan ya iting lugal.

³Memintu ya i Moises at karin king ilang ning Paran tinubud na la king Canaan deting manimuna.

⁴Ila reti: i Samua, ing anak nang Zacur ning tribu nang Ruben,

⁵i Safat, ing anak nang Hori ning tribu nang Simeon,

⁶i Caleb, ing anak nang Jefune ning tribu nang Juda,

⁷i Igal, ing anak nang Jose ning tribu nang Isacar,

⁸i Hoshea, ing anak nang Nun ning tribu nang Efraim,

⁹i Palti, ing anak nang Rafu ning tribu nang Benjamin,

¹⁰i Gadiel, ing anak nang Sodi ning tribu nang Zebulun,

¹¹i Gadi, ing anak nang Susi ning tribu nang Jose at Manase,

¹²i Amiel, ing anak nang Gemali ning tribu nang Dan,

¹³i Setur, ing anak nang Mikael ning tribu nang Aser,

¹⁴i Nabi, ing anak nang Vofsi ning tribu nang Neftali,

¹⁵at i Geuel, ing anak nang Matsi ning tribu nang Gad.

¹⁶Ila deti ring lagyu da ring lalaking tinubud nang Moises ban mag-ispia king gabun ning Canaan. Inalilan ne lagyung Moises i Hoshea king lagyung Josue.

¹⁷Penabilinan na la bayu la meko. Nganang Moises karela, Dumalan kayu king Negeb ning mauli papunta norti at mukiat king bulubundukan a lugal.

¹⁸Lawan yu nung nanu yang uring gabun. Siasatan yu nung masikan la o maina ding taung manuknangan karin, nung dakal la o nung ditak la.

¹⁹Lawan yu nung masanting ya o ali ing gabun karin at nung makabakud lang pader o ali la ding tuknangan dang siudad ding tau.

²⁰Lawan yu namang masalese nung mataba o payat ing gabun karin, at nung ating dakal a tanaman o ala. Magdala kayung bunga da ring tanaman king pamagbalik yu. (Panaun na kanita ning pamamupul ubas.) E yu paynan ing lub yu.

²¹Inya meko la at selugsugan de ing lugal manibat king ilang ning Zin angga king Rehob lele ning pidadalanan palub king Hamat.

²²Minta la king dane mauli na ning gabun at miras la king Hebron nung nu la karin di Ahiman, Sesai, at Talmai a lahi nang Anakim. (Pitu neng banuang makatalakad ing Hebron bayu ya linto ing Zoan ning Ehipto.)

²³Miras la king Kapatagan ning Escol at karin la kinutud metung a sangang mitmung punggul-punggul a ubas, at pisanan de ring adua katau king kapamilatan ning tambayuk. Menagtal la namang bungang granada at higera. (

²⁴Inaus deng Escol ing lugal a ita uli na ning ikua rang punggul-punggul a ubas king metung mung sanga.)

²⁵Minuli la kaybat deng asalugsugan ing gabun kilub ding apat apulung aldo

²⁶at mekikit la kari Moises, Aaron, at karing sablang memalen na ning Israel a makatipun kanita king ilang ning Paran karin king Kades. Minie lang ulat tungkul king ikit da at pepakit da la ring bungang tanaman a darala ra.

²⁷Ngarang memalita kang Moises, Selugsugan mi ya ing gabun nung nu mu kami tinubud. Mataba ya at labis-labis ing kabiayan karin.[21] Oreni ding mapilan karing bungang tanaman karin.

²⁸Oneng masikan la ring taung manuknangan karin, mangaragul la ring siudad da at pakabakud lang pader. Subali pa kaniti, atyu la karin at ikit mi la ring higanting lahi nang Anak.

²⁹Manuknangan la ding Amalekita king dane mauli ning gabun; manuknangan no man ding Hiteo, Jebuseo, at Amoreo king bulubundukan. Manuknangan no naman ding Cananeo king lele na ning Dagat ning Mediteraneo at king lele ning Ilug ning Jordan.

³⁰Inawad nang Caleb ing magtahimik la ring tau king arapan nang Moises. Kaybat nganang migsalita, Lusuban ta na la ngeni mu rin at sakupan ing gabun. Mas masikan tamu kesa karela at agyu ta lang sambutan!

³¹Ngana ning metung karing ispia,[22] E ta la malyaring lusuban uling e ta la agyu; mas masikan la kesa kekatamu.

³²Inya kinalat da ing e tutung balita karing memalen na ning Israel tungkul king gabun a karelang selugsugan. Ngarang memagsalita, Ing gabun a pintalan mi at selugsugan gabun yang ala kang akuang pagkabie. Maragul la ring taung ikit mi karin.

³³Ikit mi la naman karin ding higanting lahi nang Anak. Mistula kami mung durun king palage mi inyang ikit mi la!