Read Kapampangan Ding Bilang 15 Bible Online

Ding Bilang 15 - Kapampangan bible

Ding Bilang 15

¹Ngana ning GINU kang Moises,

²Sabian mu ing anti kaniti karing memalen na ning Israel: Potang miras na kayu king gabun a babie ku ban maging tuknangan yu,

³munie kayung ain kanaku. Miyain kayung ain-a-durulukan a ibat karing sese yung animal o ain-sakripisyu o ain a sarili yung kusa o ain neng piesta bilang pamanupad king panatang gewa yu. Babie tula kanaku, ing GINU, ing bau da reting ain.

⁴Itang munie ain bilang sarili nang regalu king GINU, sukat neng abayanan ain-a-binutil: apat a litrung mapinung arina a sinamut king larung olibo at

⁵aduang litrung alak king balang metung a biserung tupa.

⁶Abayanan yang ain-a-binutil ing balang tupa a iyain: pitung litrung mapinung arina a sinamut king apat a litrung larung olibo

⁷at atlung litrung alak. Babie tula kanaku, ing GINU, ing bau da reting ain-sakripisyu.

⁸Potang iyain ne king GINU ing toro bilang ain-a-durulukan o bilang pamanupad king panata o bilang ain-ning-pamisulusulu,

⁹abayanan yang aduang pulung litrung arina a sinamut king maygit atlung litrung larung olibo

¹⁰at atlu munamang litrung alak. Babie tula kanaku, ing GINU, ing bau na niting ain-sakripisyu.

¹¹Makanyan ing daptan neng miyayain kayung toro, lalaking tupa, biserung tupa o biserung kambing.

¹²Dakal ing iyain a pamangan nung dakal la ring ain-a-durulukan.

¹³Makanyan ing daptan da ring tune memalen na ning Israel neng miyayain lang ain-a-durulukan, babie tula kanaku, ing GINU, ing bau na niti.

¹⁴At nung ating dayuan a makipamalen pansamantala kekayu o kabang panaun a bisang miyain ain-a-durulukan a babie tula kanaku, ing GINU, sukat nang tukian ing tuntunan a tutukian yu.

¹⁵Mika metung mung tuntunan para kekayu at karing dayuan a tukian king kapilan pa man. Ikayu at ila parehu kayu mu king arapan na ning GINU.

¹⁶Inya makapatungkul la ngan kekayu at karela ding kautusan at ding tuntunan.

¹⁷Ngana pa ning GINU kang Moises,

¹⁸Sabian mu karing memalen na ning Israel ing anti kaniti: Potang miras na kayu king gabun a babie ku kekayu

¹⁹at mamangan na king apupul yu, mikalilua kayung metung a dake ban iyain king GINU.

²⁰Mikalilua kayung metung a tinape a megawa king mumunang arinang apalto yu, at iyain ya iti bilang ain ibat king pupul.

²¹Iyain ye king GINU ing mumunang diling masang arina at daptan iti king kapilan pa man.

²²Nung sakaling akalimbatawan yeng tiparan ing metung kareting kautusan na ning Dios a binie na king kapamilatan nang Moises,

²³ding kautusan manibat na kanitang minuna angga na king daratang a panaun,

²⁴nung e yu sasarian, kanita ing mabilug a balen miyain yang metung a toro at ain-a-binutil at ain-a-inuman bilang ain-a-durulukan, babie tula kanaku, ing GINU, ing bau na niti, at metung a lalaking kambing bilang ain-a-kapamayaran-king-kasalanan.

²⁵Ing pari ya ing ganap king seremonia ning pangapatawaran ning kasalanan para king mabilug a balen, at mipatawaran la uling e ra sasarian at uling miyain lang ain-a-kapamayaran-king-kasalanan bilang ain-a-pamangan king GINU.

²⁶Mipatawaran la kanita ring memalen na ning Israel at ding dayuan a makipamalen karela, uling kayabe la ngan king kasalanan a e sasarian.

²⁷Nung mikasala ya ing metung a tau king e na sasarian, sukat yang miyain metung a kambing a babai bilang ain-a-kapamayaran-king-kasalanan.

²⁸Ing pari ya ing miyain king ain para king mikasala king e na sasarian, at mipatawaran ya.

²⁹Metung ya mu ing kautusan a tukian para king mikasala king e na sasarian, Israelita ya man o ali ya.

³⁰Paten ya ing ninumang taung seria na ing pamikasala na, Israelita ya man o ali ya,

³¹uling lepastangan ne ing GINU. Ya ing bukud pepasari king sarili nang kamatayan.

³²Inyang atyu la king ilang ding memalen na ning Israel, atin lang ikit a taung maniutung king Aldo ning Sabbath.[26]

³³Dela re iting tau kari Moises, Aaron, at king balen.

³⁴Kilung de pa uling e malino karela nung nanu ing daptan da keting tau.

³⁵Kanita ngana ning GINU kang Moises, Sukat yang paten iting tau. Ilual ya king kampu at karin de basibasan batu ding memalen angga king mate ya.

³⁶Inya liwal de king kampu at besibas deng batu at mete ya, agpang king inutus na ning GINU kang Moises.

³⁷Ngana ning GINU kang Moises,

³⁸Magsalita ka karing memalen na ning Israel at iyutus mu karela ing mibili lang borlas karing gilid da ring karelang imalan at dinan da lang taling kule asul. Daptan da iti king kapilan pa man

³⁹ban deting borlas, neng akakit da la, e la mangalinguan karing Kautusan na ning GINU at pamintuan da la at aliwa ing sarili dang kapagnasan.

⁴⁰Inya e yu la kalinguan ding kautusan ku at pamintuan yu la at maging banal kayu king arapan ku, ing Dios.

⁴¹Aku ing GINUNG kekayung Dios; aku ing milual kekayu king Ehipto ban aku ing maging Dios yu. Aku ing GINUNG kekayung Dios.