Read Kapampangan Ding Bilang 16 Bible Online

Ding Bilang 16 - Kapampangan bible

Ding Bilang 16

¹ I Kora a anak nang Izar at apu nang Kohat at apu na king tud Levi ampon di Datan at Abiram a anak nang Eliab, at i On a anak nang Pelet, at apu na king tud Ruben

²at ding aduang dalan limang pulung lalaking pikabaluan a manimuna a pinili na ning balen Israel, mig-rebeldi la laban kang Moises.

³Misanmetung la laban kang Moises at kang Aaron. Ngarang sinabi, Moises, Aaron, sobra na ing pamaniaptan yu! Banal ya ing mabilug a balen at e ne lalakuan ning GINU. Obat tatas yung matas ing sarili yu kesa king balen na ning GINU?

⁴Inyang dimdam nang Moises iti, migsakab ya king gabun ban manalangin.

⁵Kaybat ngana kang Kora at karing kayabe na, Bukas abak, ipakilala na ning GINU nung kaninu ya makapanig, nung ninu ing pinili na at nung ninu ing makalapit arap na.

⁶Oyni ing gawan yo: bukas kuanan yu la ring insensaryu at

⁷dinan yu lang uling a mibabaya ampon insenso at dalan yu la king arap na ning GINU. Kanita tamu akit nung ninu ing banal a pilinan na ning GINU. Ikayung Levita ing sosobra na king pamaniaptan yu!

⁸Ngana pang Moises kang Kora, Makiramdam kayu, ikayung Levita!

⁹E kayu pa wari matula king pinili na kayu ning Dios ning Israel kesa karing aliwang Israelita ban sumuyu king Toldang tuknangan ning GINU at karing memalen na ning Israel?

¹⁰Pinili na kayu at ding kalupa yung Levita ban sumuyu king GINU, obat ngeni buri yu pa ing maging pari?

¹¹King kamatutuanan ing GINU ya ing kekayung pakilabanan king pamisanmetung yu laban kang Aaron.

¹²Pepayaus na lang Moises di Datan at Abiram a anak nang Eliab, oneng ngarang sinabi, E ke bisa!

¹³E pa wari sapat ing leko mu kami king bansa ning Ehipto a labis-labis king kabiayan[27] at dela keti king ilang ban paten mu kami mu king danup? Ngeni, bisa ka pang maging panginuan me?

¹⁴Karagdagan kaniti, e mu ke pa dela ketang gabun nung nukarin labis-labis ing kabiayan o dininan gabun at mulahan ubas. Bala mu galang alinlang mu kame? E ke bisang makikit keka!

¹⁵Inya mimua ya i Moises at ngana king GINU, E yu tatanggapan, GINU, ing yayain da reting tau. Ala kung kinua metung mang asno karela o diptananan e ustu.

¹⁶Kaybat na nita, nganang Moises kang Kora, Bukas marap kayu king GINU, ika at ding aduang dalan limang pulung abe mu at i Aaron.

¹⁷Magdala kayung tungga-tunggalan a insensaryu at dinan yu lang insenso. Makanyan munaman ing idala nang Aaron.

¹⁸Inya itang kabukasan, ing metung at metung dela ne ing sarili nang insensaryu; dininan neng uling a mibabaya ampon insenso at minta la at tinalakad a kayabe da ri Moises at Aaron king arap ning Tolda.

¹⁹Kanita tinipun na lang Kora ding sablang memalen[28] at tinalakad la arapan da ri Moises at Aaron karin king pasbul ning Toldang tuknangan ning GINU. Kabud-abud sinlag ing makasilo nang panga-atyu ning GINU karing sablang atyu karin.

²⁰Ngana ning GINU kang Moises at Aaron,

²¹Dumayu kayu kareng taung deti, uling paten ku na la ngeni mu rin.

²²Migsakab la king gabun di Moises at Aaron. Kaybat ngara, O Dios a sibul ning sablang bie, paten yu la wari ding sablang tau uli na mu ning kasalanan na ning metung a tau?

²³Nganang mekibat ning GINU,

²⁴Sabian yu king mabilug a balen king lumaut la karing tuknangan da ri Kora, Datan, at Abiram.

²⁵Kanita tinalakad ya i Moises at pintalan na la ri Datan at Abiram; tikian de ring manimuna da ring Israelita.

²⁶Ngana king mabilug a balen, Ipakisabi kung mayap kekayu king lumaut kayu sana karing toldang tuknangan da reting e mayap a lalaki at ala kayung tatagkilan king nanuman king bandi ra, pota mate kayung kayabe ra uli na ning kasalanan da.

²⁷Inya linaut la karing toldang tuknangan da ri Kora, Datan, at Abiram. Linual la ri Datan at Abiram karing toldang tuknangan da at tinalakad la arap da ring pasbul da; kayabe da la ring pamilya ra.

²⁸Nganang Moises karing memalen, Abalu yu ngeni king tinubud na ku ning GINU ban daptan ku la deting bage at iti e king sarili kung kaburian.

²⁹Nung mate la deting tau king karaniwan a kamatayan, at ala nanumang parusang ibat king Dios, iti mangabaldugan king e na ku tinubud ning GINU.

³⁰Nung dapat ya ing GINU ketang e yu pa bitasang dimdam, at nganga ya ing gabun at akmulan na lang mabie at ing sablang bandi ra, at manabu la ngan mabie king tuknangan da ring mete, iti mangabaldugan king tinggian de ing GINU.

³¹Kayari nang migsalitang Moises, mignganga ya ing gabun tulid da ri Datan at Abiram,

³²at inakmul na lang mabie pati na ding talatuki nang Kora at ing sablang pibandian da.

³³Inya mikutkut la ngan mabie at ing sablang pibandian da at dinulung la king tuknangan da ring mete.[29] Kaybat na nita, misara ya ing gabun king akakit na ning balen. E da na la ikit pasibayu.

³⁴Memulayi la ring sablang memalen na ning Israel a atyu karin inyang dimdam da ing saingsingan. Ngara, kabang pupulayi la, Mako kayu ken, pota pati itamu akmulan na ning gabun!

³⁵Kaybat, pepauran ne mang api ing GINU karing aduang dalan limang pulung lalaki at mesilab la ngan kabang duruluk lang insenso.

³⁶Kanita ngana ning GINU kang Moises,

³⁷Sabian mu kang Eleazar, ing anak nang Aaron a pari, king kuanan na la ring insensaryu uling sagradu la, at iyugse na king marayung lugal ing baya.

³⁸Meging sagradu la kanitang mitalaga la king altar ning GINU. Inya kuanan yu la ring insensaryu da ring lalaking mesilab king api uli na ning karelang kasalanan at pukpukan yu lang maimpis ban gawan panakap king altar. Maging tanda lang babie babala karing memalen na ning Israel.

³⁹Inya kinua na lang Eleazar a pari ding insensaryung tangsu. Pepapukpuk na lang maimpis ban magawang panakap king altar.

⁴⁰Paganaka na niting takap altar karing memalen na ning Israel king ing e pari a e ibat king lahi nang Aaron e ya sukat lumapit king altar ning GINU ban duluk insenso, pota mangari ya kang Kora at karing kayabe na. Tiparan na ngan Eleazar ing sablang parapat na ning GINU king kapamilatan nang Moises.

⁴¹Itang kabukasan, migreklamu la ring memalen na ning Israel laban kari Moises at Aaron. Ngara, Pete yu la ring mapilan karing talasuyu na ning GINU.

⁴²Inyang ikua ra nang mitipun ding memalen laban kang Moises at kang Aaron, melikid la king Toldang tuknangan ning GINU at ikit de ing biga at tatakpan ne iti, at ikit da ing makasilo nang aslag ning panga-atyu na ning GINU.

⁴³Minta ya i Moises at i Aaron king arap ning Toldang tuknangan ning GINU

⁴⁴at kaybat ngana ning GINU kang Moises,

⁴⁵Dumayu kayu kareng taung deti uling paten ku na la ngeni mu rin! Migsakab ya king gabun i Moises at i Aaron.

⁴⁶Kaybat, nganang Moises kang Aaron, Malagua ka, kuanan me ing kekang insensaryu, dinan meng uling a mibabaya ibat king altar, dinan meng insenso, at kaybat dalan me karing taung deti ban ipaniawad mu lang tawad king GINU uli na ning mikalabkab na ing mua na at megumpisa na ing salut.

⁴⁷Memintu ya i Aaron at pupulayi yang minta libutad da ring tau. Ikit na ing kakalat na ing salut, inya dinuluk yang insenso at meniawad yang kapatawaran king GINU para karing tau.

⁴⁸Kaybat na nita, tinalakad ya pilatan da ring mete king salut at ding mabie pa at tinuknang ing salut.

⁴⁹Labi lang apat a libu at pitung dalan ding mete king salut, subali pa karetang mete kayabe nang Kora.

⁵⁰Inyang ala ne ing salut, mibalik ya i Aaron kang Moises karin king pasbul ning Toldang tuknangan ning GINU.