Read Kapampangan Ding Bilang 17 Bible Online

Ding Bilang 17 - Kapampangan bible

Ding Bilang 17

¹Ngana ning GINU kang Moises,

²Magsalita ka karing memalen na ning Israel at sabian mu karing manimuna ning balang tribu king munie lang metung a tukud keka. Isulat ne ing lagyu na ning metung at metung king tukud a ibie na.

³Isulat me ing lagyu nang Aaron ketang tukud ning tribu nang Levi, uling sukat yang ating tukud ing balang manimuna ning tribu.

⁴Kaybat ibili mu la deti king Toldang tuknangan ku king lugal nung nu ra ka pakitagpuan king arapan na ning Kaban ning Kasunduan.

⁵Itang tukud na ning manimuna a pilinan ku ya ing tumubu. King anti kaniting paralan tuknang ing bulung-bulungan at reklamu laban keka.

⁶Inya migsalita ya i Moises karing memalen na ning Israel at ding manimuna ning balang tribu dininan deng tungga-tunggalan a tukud. Heganagana labi lang adua ring tukud; kayabe ya kareti itang tukud nang Aaron.

⁷At dela na lang Moises ding tukud king Tolda arapan na ning GINU, karin ketang Kaban ning Kasunduan nung nu la mitatagpu.

⁸Itang kabukasan, minta ya i Moises king Toldang tuknangan ning GINU at ikit neng tinubu itang kang Aaron ning tribu nang Levi. Mika bulung ya at memulaklak ya at mika malulut yang bungang almendras.

⁹Kanita linual na la ngan Moises ding tukud at pepakit na la karing memalen na ning Israel. Siniasat da la at kinua ne ning metung at metung ing sarili nang tukud.

¹⁰At ngana ning GINU kang Moises, Ibalik me ing tukud nang Aaron king arap ning Kaban ning Kasunduan ban maging palatandanan ya karing Israelitang mapaglaban ban tuknang na lang magreklamu,[30] nung ali mangamate la.

¹¹Inya tiparan nang Moises itang inutus na ning GINU.

¹²Ngara ding memalen na ning Israel kang Moises, Mangamate na kami kanyan! Ala na keng talagang akarapat!

¹³Mate ya ing ninumang lumapit king Tolda ning GINU. Mangamate na ke ngan wari?