Read Kapampangan Ding Bilang 23 Bible Online

Ding Bilang 23 - Kapampangan bible

Ding Bilang 23

¹Kanita nganang Balaam kang Balak, Pagawa kang pitung altar keti para kanaku at padalan mu kung pitung toro at pitung lalaking tupa.

²Binie nang Balak ing kayaduanan nang Balaam at ilang adua miyabe lang miyain metung a toro at metung a lalaking tupa king balang altar.

³Kaybat, nganang Balaam kang Balak, Talakad ka siping na ning kekang ain-a-durulukan; mako ku saguli at lawan ku nung pakitagpuan na ku o ali na ku ning GINU. Sabian ku keka ing nanumang ipabalu na kaku. Inya minta yang dili na ketang matas a lugal.

⁴At pekitagpuan ne ning GINU i Balaam. Nganang Balaam king GINU, Pepasadia kung pitung altar at miyain metung a toro at metung a lalaking tupa king balang altar.

⁵Atin yang sinabi ing GINU kang Balaam. Ngana, Balikan mu ne i Balak at sabian mu itang pasabi ku.

⁶Inya mibalik ya i Balaam kang Balak at disnan ne pa mu ring makatalakad siping na ning ain-a-durulukan na. Kayabe na lang Balak ding manimuna ning Moab.

⁷Migsalita yang ula i Balaam. Ngana: Inyang atyu king Aram a bulubundukan ning aslagan, peparakit na kung Balak a ari ning Moab. Me keni, ngana kaku, isumpa me ing Israel[42] at layun isakuil.

⁸Makananu keng isumpa itang e na simpa ning Dios? At makananu keng isakuil itang e na sikuil?

⁹Ketang taluktuk ning bunduk ababatiawan ke; neng makatalakad ku ketang bunduk-bundukan akakit ko ngan. Metung yang bansang magdili-diling manuknangan; balu ra king mas mapalad la kesa karing aliwang bansa.

¹⁰Ninu ing malyaring makabilang karing dakal nang lahing Israel? Abilang ya kaya agyang ing kapat nang dake? Paburen mate ku anti ing kamatayan na ning banal o kaya miwakasan iting bie kalupa da ring banal!

¹¹Kaybat na nita, nganang Balak kang Balaam, Obat depatan mu iti kanaku? Dela ra ka keti ban isumpa mu la ring kanakung kalaban, oneng ala kang aliwang gewa nune mu ing bendisyunan mu la.

¹²Nganang Balaam, Ala kung akarapat nung e mu ing sabian ku itang pasabi na ning GINU.

¹³Kaybat na nita, nganang Balak kang Balaam, Tara, tuki ka kanaku; munta kata ketang aliwang lugal nung nu mu la ababatiawan ding mapilan mu karing Israelita, at e mu la akit ding sablang Israelita. Karin mu la isumpa para kanaku.

¹⁴At tiki ne king marangle ning Zofim, ketang taluktuk ning Bunduk ning Pisga. Pepasadia ya namang pitung altar karin at miyain yang metung a toro at metung a lalaking tupa king balang altar.

¹⁵Nganang Balaam kang Balak, Talakad ka keni siping ning ain mung durulukan; munta ku banda keta ban pakitagpuan ing GINU.

¹⁶Pekitagpuan ne ning GINU i Balaam at sinabi na nung nanu ing sukat nang sabian. Kaybat ngana, Magbalik na ka at sabian mu kang Balak itang pasabi ku.

¹⁷Inya mibalik ya i Balaam kang Balak at disnan ne pa mu ring makatalakad siping ning ain-a-durulukan na. Kayabe na lang Balak ding manimuna ning Moab. Nganang kinutang Balak, Balaam, nanu ing sinabi ning GINU?

¹⁸At migsalita yang ula i Balaam. Ngana: Talakad ka, Balak a anak nang Zipor at makiramdam kening kakung sabian.

¹⁹E ne kalupa ning tau ing Dios, uling ing tau maglaram ya at pabayubayu kaisipan. Itang sasabian ning Dios daraptan na, at ing pengaku na tutuparan na.

²⁰Atin kung tinggap a utus ban mamendisyun; atin neng binendisyunan at ita e ku malyaring alilan.

²¹Ala yang ikit a kapahamakan king Israel o nanumang kaguluan a datang. Ing GINUNG karelang Dios kayabe re; ya ing karelang ari a karela matnube.

²²Ya ing milual karela king Ehipto; mas masikan ya kesa king malyap a toro.

²³Alang engkanto o anting-anting a malyaring panlaban king Israel. Ngeni na ing oras ban sabian: Lawan ing mayap a depat ning Dios king Israel!

²⁴Oyan ing balen a mengaring leon a e patugut anggang e na la apaglapak at apangan ding biktima na.

²⁵Kaybat nganang Balak kang Balaam, Anti na ning e mu la buring isumpa, e mu no man sana bibendisyunan!

²⁶Nganang mekibat Balaam, E ku wari sinabi keka king bukud ku mung sabian itang pasabi na kanaku ning GINU?

²⁷Kanita nganang Balak, Tara, tuki ka kanaku king aliwang lugal; pota karin ya mabisa ing GINU ban isumpa mu la para kanaku.

²⁸Inya tinuki ya i Balaam kang Balak karin king taluktuk ning Bunduk ning Peor nung nu ne ababatiawan ing disyerto.

²⁹Nganang Balaam kang Balak, Ipagawa mu kung pitung altar keti at papagdala mu kung pitung toro at pitung lalaking tupa.

³⁰Depat nang Balak itang kayaduanan nang Balaam. Miyain yang metung a toro at metung a lalaking tupa king balang altar.