Read Kapampangan Ding Bilang 26 Bible Online

Ding Bilang 26 - Kapampangan bible

Ding Bilang 26

¹Kaybat na ning salut a makamate, migsalita ya ing GINU kang Moises at Eleazar, ing anak nang Aaron a pari. Ngana,

²Ilista yu la ngan a bilang ding sablang lalaki na ning Israel agpang king karelang pamilya magumpisa karing maki idad aduang pulung banua at paitas a malyaring talan sandata ban makilaban karing kalaban.

³Inya i Moises at i Eleazar a pari tinipun da la ring memalen na ning Israel karin king kapatagan ning Moab lele ning Ilug ning Jordan tulid ning Jerico. Ngara karela,

⁴Ilista yu la ngan a bilang ding lalaki magumpisa king idad aduang pulung banua at paitas. Ila deti ring Israelitang meko king Ehipto:

⁵King tribu nang Ruben a pangane anak nang Israel, i Hanok at ding pamilya na; i Pallu at ding pamilya na;

⁶i Hezron at ding pamilya na; at i Carmi at ding pamilya na.

⁷Ila deti ring bibilug king tribu nang Ruben. Heganagana apat lang pulu't atlung libu at pitung dalan atlung pulung lalaki.

⁸King lahi nang Pallu i Eliab at

⁹ding anak na ila ri Nemuel, Datan, at i Abiram. Di Datan at Abiram a mekiabe kang Kora ila ring pinili ning balen ban mag-rebeldi laban king GINU, kang Moises, at Aaron.

¹⁰Mibuklat ya ing gabun at meyakmul la at mete kayabe nang Kora at ding talatuki na, inyang mesilab la king api ding aduang dalan limang pulu. Meging babala la karing sabla.

¹¹E la mete ding anak nang lalaking Kora.

¹²King tribu nang Simeon: i Nemuel at ding pamilya na; i Jamin at ding pamilya na; i Jakin at ding pamilya na,

¹³i Zera at ding pamilya na, i Saul at ding pamilya na.

¹⁴Ila deti ring bibilug king tribu nang Simeon. Heganagana adua lang pulu't aduang libu at aduang dalan a lalaki.

¹⁵King tribu nang Gad: i Zefon at ding pamilya na; i Haggi at ding pamilya na; i Suni at ding pamilya na;

¹⁶i Ozni at ding pamilya na; i Eri at ding pamilya na;

¹⁷i Arod at ding pamilya na, at i Areli at ding pamilya na.

¹⁸Ila deti ring bibilug king pamilya nang Gad. Heganagana apat lang pulung libu at limang dalan a lalaki.

¹⁹King tribu nang Juda: i Er at i Onan (mete la reti king Canaan);

²⁰i Sela at ding pamilya na; i Perez at ding pamilya na; i Zera at ding pamilya na.

²¹Ding anak nang Perez ila ri Hezron at Hamul at ding pamilya da.

²²Ila deti ring bibilug king tribu nang Juda. Heganagana pitu lang pulu't anam a libu at limang dalan a lalaki.

²³King tribu nang Isacar: i Tola at ding pamilya na; i Pua at ding pamilya na;

²⁴i Jasub at ding pamilya na ampon i Simron at ding pamilya na.

²⁵Ila deti ring bibilug king tribu nang Isacar. Heganagana anam lang pulu't apat a libu at atlung dalan a lalaki.

²⁶King tribu nang Zebulun: i Zered at ding pamilya na; i Elon at ding pamilya na; i Jahleel at ding pamilya na.

²⁷Ila deti ring bibilug king tribu nang Zebulun. Heganagana anam lang pulung libu at limang dalan a lalaki.

²⁸King tribu nang Jose, agpang karing adua nang anak a lalaki: i Manase at i Efraim.

²⁹Kang Manase: i Makir at ding pamilya na. I Makir ya ing tata nang Gilead; at linto la kang Gilead ding pamilyang ausan dang Gileadite.

³⁰Ding anak na namang Gilead ila reti: i Iezer at ding pamilya na; i Helek at ding pamilya na,

³¹i Asriel at ding pamilya na, i Sikem at ding pamilya na,

³²i Semida at ding pamilya na, at i Hefer at ding pamilya na.

³³E ya mikayanak a lalaki i Zelofehad a anak nang Hefer oneng mikayanak yang babai. Ila reti: i Mahla, i Noe, i Hogla, i Milka, at i Tirza.

³⁴Ila deti ring bibilug king tribu nang Manase. Heganagana lima lang pulu't aduang libu at pitung dalan a lalaki.

³⁵Ding kang Efraim naman ila reti: i Sutela at ding pamilya na, i Beker at ding pamilya na, i Tahan at ding pamilya na.

³⁶Ding anak nang lalaking Sutela ila reti: i Eran at ding pamilya na.

³⁷Ila ngan deti ring bibilug king tribu nang Efraim. Heganagana atlu lang pulu't aduang libu at limang dalan a lalaki. Ila deti ring anak nang Jose agpang karing karelang pamilya.

³⁸King tribu nang Benjamin: i Bela at ding pamilya na, i Asbel at ding pamilya na, i Ahiram at ding pamilya na,

³⁹i Sefufam at ding pamilya na ampon i Hufam at ding pamilya na.

⁴⁰Ding anak nang Bela ila ri Ard at Naaman at ding sarasarili dang pamilya.

⁴¹Ila deti ring bibilug king tribu nang Benjamin. Heganagana apat lang pulu't limang libu at anam a ralan a lalaki.

⁴²King tribu nang Dan: i Suham at ding pamilya na. Ila deti ring bibilug king tribu nang Dan.

⁴³Heganagana anam lang pulu't apat a libu at apat a ralan a lalaki.

⁴⁴King tribu nang Aser: i Imna at ding pamilya na; i Isvi at ding pamilya na; i Berias at ding pamilya na.

⁴⁵Ding pamilyang linto a ausan dang Heberite at Malkilite ibat la king makatua dang i Berias.

⁴⁶Atin yang anak a babai i Aser; ya i Sera.

⁴⁷Ila ngan deti ring bibilug king tribu nang Aser. Heganagana lima lang pulu't atlung libu at apat a ralan a lalaki.

⁴⁸King tribu nang Neftali: i Jazel at ding pamilya na, at i Guni at ding pamilya na;

⁴⁹i Jezer at ding pamilya na, at i Silem at ding pamilya na.

⁵⁰Ila deti ring bibilug king tribu nang Neftali. Heganagana apat lang pulu't limang libu at apat a ralan a lalaki.

⁵¹Ing kabilugan dang bilang ding sablang Israelita: anam a ralan at metung a libu at pitung dalan atlung pulu katau.

⁵²Ngana ning GINU kang Moises,

⁵³Pirakerakayan me ing gabun agpang king bilang da ring balang tribu.

⁵⁴Maragul ya dake itang tribung marakal a bilang, at malati ya ing dake na nitang ditak a bilang. Agpang king bilang na ning metung at metung karing tribu ing maging dake na.

⁵⁵Pirakayan ya ing gabun king kapamilatan ning bagutan, agpang king lagyu da ring tribu.

⁵⁶Pirakayan ya king kapamilatan ning bagutan agpang king degulan na o letian na ning balang tribu.

⁵⁷Deti naman ila ring bibilug king tribu nang Levi: i Gerson at ding pamilya na; i Kohat at ding pamilya na; i Merari at ding pamilya na.

⁵⁸Ding aliwa pang kayanib king tribu nang Levi ila reti: ding pamilyang ausan dang Libnita, Hebronita, Mahlita, Musita, at Korahita. I Kohat ya i tata nang Amram.

⁵⁹Mekapakiasawa ya i Amram kang Jokebed, ing anak nang babaing Levi a mibait king Ehipto. Ayanak da la ri Aaron, Moises, at ing kapatad dang babaing i Miriam.

⁶⁰Atin yang apat a anak a lalaki i Aaron: i Nadab, i Abihu, i Eleazar, at i Itamar.

⁶¹Pero mete la ri Nadab at Abihu kanitang minain lang api a e karapatdapat king GINU.

⁶²Heganagana adua lang pulu't atlung libu bilang ding lalaki king tribu nang Levi magmula king idad a pabulan at paitas. E la kayabe karetang milista, uling ala lang dake king nanumang pibandian na ning Israel.

⁶³Ila ngan deti ring pamilya da ring tribu a linista da ri Moises at Eleazar a pari kanitang atyu la karin king kapatagan na ning Moab sumangid ning Ilug ning Jordan, tulid ning Jerico.

⁶⁴Ala metung man a miyabe karetang Israelitang linista da ri Moises at Aaron a pari karin king disyerto ning Sinai;

⁶⁵mete na la uling sinabi na ning GINU, Mate la king disyerto. Bukud mung i Caleb a anak nang Jefune at i Josue a anak nang Nun ing e mete.