Read Kapampangan Ding Bilang 27 Bible Online

Ding Bilang 27 - Kapampangan bible

Ding Bilang 27

¹Di Mahla, Noe, Hogla, Milka, at Tirza babai lang anak nang Zelofehad a anak nang Hefer. I Hefer anak neng Gilead a anak nang Makir a anak nang Manase a anak nang Jose. Pintalan de reting babai i Moises.

²Ngarang sinabi inyang atyu na la king arapan nang Moises at Eleazar a pari, at ding manimuna ning balen karin king pasbul ning Toldang tuknangan ning GINU,

³Mete ya i tata mi karin king disyerto at ala kaming kapatad a lalaki. E ya kayabe i tata mi karetang abe nang Kora a mekisanmetung laban king GINU. Mete ya uli na ning sarili nang kasalanan.

⁴Uli mo wari ning ala yang anak a lalaki i tata mi leko ye lagyu king listahan ning Israel? Ibie yu kekami itang dake na kalupa na ning karing kamaganak na.

⁵Dela neng Moises king GINU iting kasu.

⁶Ngana ning GINU,

⁷Moises, maki matulid la ring anak nang babaing Zelofehad. Sukat yang mika dake gabun ing karelang tata. Ibie mu itang dake na kareting anak na.

⁸At sabian mu karing memalen na ning Israel king nung mete ya ing metung a lalaki a alang anak a lalaki, ing anak nang babai ya ing maging talapagmana king pibandian na.

⁹Nung ala yang anak a babai, ibie ing pibandian na karing kapatad nang lalaki.

¹⁰Nung ala yang kapatad a lalaki, ding maging talapagmana ila ring kapatad nang lalaking tata na.

¹¹Nung ala yang kapatad a lalaki i tata na, ibie ing pibandian na king pekamalapit nang kamaganak, at maging bandi na iti. Iti kautusan ya at tuntunan a sukat ipatupad karing memalen na ning Israel antimo ing inutus ku kang Moises.

¹²Ngana ning GINU kang Moises, Mukiat ka king Bunduk ning Abarim at batiawan me ing gabun a babie ku karing Israelita.

¹³Kaybat meng linawe, mate ka anti ing milyari kang Aaron at karing makatua mu.

¹⁴E ka naman memintu kanaku karin king ilang ning Zin, e mu kilala ing kanakung kayupayan arapan da inyang mig-rebeldi lang laban kanaku ring Israelita karin king Meriba. (Ing Meriba ya ing sibul king Kades karin king ilang ning Zin.)

¹⁵Nganang Moises king GINU,

¹⁶Paburen ya ing GINU, ing Dios a sibul ning bie, ing tuldu king lalaking mamahala king balen

¹⁷at manimuna king pamakilaban ban ing kekang balen e ya mitulad karing tupang alang pastul.

¹⁸Ngana ning GINU kang Moises, Ausan me i Josue a anak nang Nun. Tau yang apanaligan; itumpak mo ring gamat mu king buntuk na. Ausan me i Josue a anak nang Nun. Tau yang apanaligan...(27:18)

¹⁹Patalakaran me arapan nang Eleazar a pari at king mabilug a balen at sabian karela king ya ing kayalili mu.

²⁰Ilipat mu kang Eleazar ing mapilan karing katungkulan mu ban pamintuan ne ning mabilug nang balen ning Israel.

²¹Asahan ne i Eleazar a pari a makabalu king kaburian ku king kapamilatan na ning pamangamit na king Urim at Tumim.[49] King anti kaniting paralan ne tairan Eleazar i Josue at ing mabilug a balen king sabla rang dapat.

²²Memintu ya i Moises king inutus na ning GINU. Inaus ne i Josue at pepatalakaran king arapan nang Eleazar a pari at ning mabilug a balen.

²³Timpak na la ring gamat nang Moises king buntuk nang Josue, at pisiag na king balen king ya ing kayalili na, antimo ing inutus na ning GINU.