Read Kapampangan Ding Bilang 3 Bible Online

Ding Bilang 3 - Kapampangan bible

Ding Bilang 3

¹Ila deti ring pamilya nang Aaron at Moises kanitang migsalita ya karela ing GINU karin king Bunduk ning Sinai.

²Apat la ring anak nang lalaking Aaron: i Nadab, ing pangane, i Abihu, i Eleazar, at i Itamar.

⁴oneng mete ya i Nadab at i Abihu inyang minain lang api a e makayagpang king kaburian na ning GINU karin king Disyerto ning Sinai. Ala lang anak, inya i Eleazar at i Itamar ila ring meging pari kabang mabie ya pa i Aaron a tata ra.

⁵Migsalita ya ing GINU kang Moises. Ngana,

⁶Idala mu la keti ring miembru na ning tribu nang Levi at kaybat tulduan mu lang kasaup nang Aaron.

⁷Ila ring sumaup kang Aaron at karing memalen king pamaniuyu ra king Toldang tuknangan ku.

⁸Ila ring mingat karing kasangkapan na ning Tolda at tupad karing aliwa pang katungkulan para karing memalen na ning Israel.

⁹Bukud mung ding Levita ilang tulduan mung kasaup nang Aaron at ding anak na; mitutuk la para karela.

¹⁰Ibie mu ing obrang pari kang Aaron at karing anak na. Paten ya ing ninumang mangangas magobra king obra da.

¹¹Ngana pa ning GINU kang Moises,

¹²Pinili ku la ring Levita karing sablang lahi nang Israel bilang kayalili da ring anak a pangane mibait; inya bandi ku la ring Levita.

¹³Kanaku la ring sablang pangane uling kanitang pete ku la ring sablang pangane karin Ehipto telaga ke para kanaku ing balang pangane king Israeltau ya man o sese animal. Wa, kanaku la mangaintulid. Aku ing GINU.

¹⁴Migsalita ya ing GINU kang Moises karin king Disyerto ning Sinai. Ngana,

¹⁵Ilista mu la ngan ding lalaki king tribu nang Levi manibat king pabulan a tua at paitas agpang king karelang pamilya.

¹⁶At memintu ya king utus i Moises.

¹⁷Oreti ding lagyu da ring anak nang lalaking Levi: i Gerson, i Kohat, at i Merari.

¹⁸Mika adua yang anak a lalaki i Gerson: i Libni at i Simei.

¹⁹Ding anak nang lalaking Kohat ila ri Amram, Izar, Hebron, at i Uziel.

²⁰Ding anak na namang Merari ila ri Mahli at Musi. Ila deti ring pamilyang linto kang Levi agpang king sarasarili dang pamilya.

²¹Kang Gerson ya linto ing pamilyang Libni at Simei; ausan da lang Gersonita.

²²Ing kabilugan a mitala rang bilang ding lalaki manibat king idad a pabulan: pitu lang libu limang dalan.

²³Italakad da la ring tolda ra king dane albugan at kagulutan na ning Toldang tuknangan ning GINU.

²⁴I Eliasaf a anak nang Lael ya ing karelang pamuntuk.

²⁵Ila ring ating katungkulan king Tolda; karing tabing kilub, king kilual, at king palub;

²⁶karing tabing ning patyu a makapadurut king Tolda, king altar at king tabing palub king patyu. Ila naman ding maki katungkulan king pangagamit da reting mebanggit king kasuyuan.

²⁷Kang Kohat ya linto ing pamilyang Amram, Izar, Hebron, at Uziel.

²⁸Ing kabilugan a mitala rang bilang ding lalaki manibat king idad a pabulan: walu lang libu anam a ralan.

²⁹Italakad da la ring tolda ra king dane mauli na ning Toldang tuknangan ning GINU.

³⁰I Elizafan a anak nang Uziel ya ing karelang pamuntuk.

³¹Ila ring ating katungkulan king Kaban ning Kasunduan, ing lamesa, ing tumpakan-sulu, ding altar, ding kasangkapan a gagamitan da ring pari king Banal a Lugal, at king tabing palub king Kabanal-banalan a Lugal. Ila naman ding ating katungkulan king pangaingat da reting mebanggit king kasuyuan.

³²Ing pekapamuntuk da ring Levita ya i Eleazar, ing anak nang Aaron a pari. Ya ing mamahala karing ating katungkulan king Banal a Lugal.[1]

³³Kang Merari la linto ding pamilyang Mahli at Musi.

³⁴Ing kabilugan a mitala rang bilang ding lalaki manibat king idad a pabulan: anam lang libu aduang dalan.

³⁵Italakad da la ring tolda ra king dane norti na ning Toldang tuknangan ning GINU. I Zuriel a anak nang Abihail ya ing karelang pamuntuk.

³⁶Ila ding ating katungkulan karing balangkas na ning Toldang tuknangan ning GINU, karing barote, karing asias, karing talpakan, at karing sulpakan. Ila ding ating katungkulan king pangaingat da reting kagamitan.

³⁷Ila naman ding ating katungkulan karing asias, karing talpakan, karing tulus, at karing lubid na ning patyu.

³⁸King dane aslagan arapan na ning Toldang tuknangan ning GINU karin la manalakad tolda ri Moises at Aaron at ding anak na. Ila ding ating katungkulan mangasiwa king sablang kasuyuan king Banal a Lugal para karing memalen na ning Israel. Subali karela, paten ya ing ninumang lumapit king Banal a Lugal.

³⁹Ing kabilugan a bilang da ring lalaking Levita a alista da ri Moises at Aaron agpang king utus na ning GINU: heganagana, adua lang pulu't aduang libu.

⁴⁰Nganang migsalita ning GINU kang Moises, Ilista mu la ngan a lagyu ding sablang anak a lalaking pangane da ring memalen na ning Israel manibat king idad a pabulan at paitas.

⁴¹Ikalilua mu la ring Levita para kanaku bilang kalibe da ring pangane lalaking anak da ring Israelita. Aku ing GINU. Ikalilua mu la naman ding sese rang animal ding Levita bilang kalibe da ring pangane anak da ring sese rang animal.

⁴²Memintu ya i Moises king inutus na ning GINU. Linista na la ngan a lagyu ding anak a pangane

⁴³manibat king idad a pabulan at paitas. Heganagana, adua lang pulu't aduang libu at aduang dalan pitung pulu't atlu.

⁴⁴Ngana pa ning GINU kang Moises,

⁴⁵Italaga mu la kanaku ding Levita bilang kalibe da ring pangane anak a lalaki da ring Israelita, at antimu rin ding pangane anak da ring sese rang animal ding Levita bilang kalibe da ring anak dang pangane.

⁴⁶Uling mas dakal lang aduang dalan pitung pulu't atlu ring anak a pangane da ring Israelita kesa karing Levita, kailangan ing payatbus mu la ring labis a anak

⁴⁷king alagang limang pirasung pilak ing balang metung at metung, agpang king timbangan ning santuaryu.

⁴⁸Ibie la reting salapi kang Aaron at karing anak nang lalaki.

⁴⁹Inya memintu ya i Moises at kinua na la ring salaping panatbus karing labis a pangane anak da ring Israelita.

⁵⁰Libu atlung dalan anam apulu't lima lang pirasung pilak ding melikum.

⁵¹Binie na lang Moises kang Aaron at karing anak nang lalaki deting salaping panatbus, antimo ing inutus na ning GINU.