Read Kapampangan Ding Bilang 32 Bible Online

Ding Bilang 32 - Kapampangan bible

Ding Bilang 32

¹Dakal la sese animal ding tribu nang Ruben at Gad. Ikit da ing masanting yang pastulan ing gabun ning Jazer at Gilead para karing sese rang animal.

²Inya pintalan de i Moises at i Eleazar a pari ampon ding manimuna na ning balen.

³Ngara karela, Ing Atarot, Dibon, Jazer, Nimra, Hesbon, Eleale, Sebam, Nebo, at Beon

⁴ding gabun a simbut ning GINU ban maging tuknangan da ring memalen na ning Israelmasanting lang lugal para pipagpastulan karing sese animal at dakal la ring kekaming kawan.

⁵Nung burian yu, ila na deting lugal ding ibie yu kekami ban maging bandi mi. E yu na ke sana padalakitan pa king Ilug ning Jordan ban karin ke manuknangan.

⁶Nganang Moises karela, Atanggap yu wari ing atyu kayu keti kabang makilaban la ding kamaganak yo?

⁷Obat paynan yo lub ding memalen na ning Israel ban e re adalakitan ing Ilug ning Jordan at e miras king gabun a binie na karela ning GINU?

⁸Makanyan munaman ing depat da ring makatua yu karin king Kades Barnea kanitang tinubud ku la ban siasatan de ing gabun a pangaku.

⁹Inyang miras la king Kapatagan ning Escol at ikit iting gabun, sinira da la lub ding Israelita ban e la munta ketang gabun a binie ning GINU karela.

¹⁰Inya king aldo ita mimua ya ing GINU at matimid nang sinabi:

¹¹Uling e la memintu kanaku king mabilug dang pusu, ala metung mang miras king gabun a pengaku kung ibie kang Abraham, Isaac, at Jacob karing lalaking ibat king Ehipto a magumpisa king idad aduang pulung banua.

¹²Ala metung mang miras karin subali mu i Caleb a anak nang Jefuneng Kenizeo at i Josue a anak nang Nun, uling memintu la kanaku, ing GINU, king mabilug dang pusu.

¹³Mikaluku ing mua na ning GINU karing Israelita at pepaburen na lang miglito-lito king ilang kilub ding apat apulung banua anggang e la mete ding dinapat e mayap king arapan na.

¹⁴At ngeni ikayu a pamilya rang palpikasala ing bisang makiapus king depat da ring makatua yo? Buri yung mibua na naman ing mabagsik nang mua ning GINU king Israel?

¹⁵Nung e kayu munaman mamintu king GINU, pasibayu na lang paburen maglito-lito king ilang ding Israelita at ikayu ing maki pakibatan king pangalipul da.

¹⁶Kanita pekalapit da kang Moises at ngara, Moises, paintulutan mu na ke pa mung gawang kulungan tupa at manalakad tuknangan a makabakud pader para karing pamilya mi.

¹⁷Kaybat talan kami namang sandata at makiabe karing kalupa ming Israelita king pamakilaban angga king miras la king maging tuknangan da king gabun. Pansamantala, manuknangan la ring mangalati ming anak karing italakad ming tuknangan a pader ban ligtas la karing tau keti.

¹⁸E kami muli karing tuknangan mi anggang e re ikua ding anak ning Israel ing gabun a mangaintulid king metung at metung karela.

¹⁹E kami kumang dake king sakupan da king lipat ning Jordan, uling tinggap mi na ing dake mi keti king dane aslagan ning Jordan.

²⁰Nganang mekibat Moises, Nung daptan yu ing sasabian yu, at talan kayung sandata ban makilaban para king GINU,

²¹at nung dalakit ya ing balang tatalan sandata king Jordan angga na king masambut la ring kalaban

²²at masakup ya ing gabun, malyari na kayung mibalik karing pamilya yu potang atuparan yu na ing kekayung katungkulan king GINU at king balen Israel. King makanyan a paralan ne paintulut maging bandi yu iting gabun dane nang aslagan ning Jordan.

²³Nung e yu tuparan ing sinabi yu, mikasala kayu king GINU at siguradu kayung mamayad king kasalanan a depat yu.

²⁴Sulung, gawa kayung tuknangan para karing pamilya yu at kulungan para karing sese yung animal. Kaybat tuparan yu ing pengaku yu.

²⁵Ngara ding pekakatawan da ring tribu nang Gad at Ruben, Tuparan mi itang inutus yu.

²⁶Lakuan mi la keti king Gilead ding kekaming asawa, anak, at sese animal,

²⁷oneng ikaming talasuyu yung pakasandata at makasadiang lumaban para king GINU dalakit kami king Ilug ning Jordan ban makilaban, antimo ing iyutus yu.

²⁸Inya minie yang utus i Moises kang Eleazar a pari at kang Josue a anak nang Nun, at karing manimuna da ring tribu na ning Israel. Ngana,

²⁹Nung dalakitan de ring lalaki da ring tribu nang Gad at Ruben ing Ilug ning Jordan ban makilaban para king GINU at nung asakup ye ing gabun king saup da, kanita ibie ye karela ing sakup ning Gilead ban maging bandi ra.

³⁰Nung e re dalakitan ing Ilug ning Jordan at e makilaban kayabe yu, kanita tanggapan deng kalupa yu ing dake ra king gabun ning Canaan.

³¹Ngara ding pekakatawan da ring tribu nang Gad at Ruben, Tuparan mi itang utus na ning GINU.

³²King pamanimuna na ning GINU dalakitan mi ya ing Ilug ning Jordan angga king miras ke king Canaan at makilaban karin ban abandi mi ya iting lugal dane aslagan ning Jordan.

³³Inya binie neng Moises karing tribu nang Gad at Ruben at king kapitna nang dake ning tribu nang Manase ing kayarian nang Aring Sihon da ring Amoreo at Aring Og ning Bashan pati ding siudad, balen, at aliwa na pang sakup a lugal.

³⁴Telakad deng pasibayu ding pamilya nang Gad ing siudad ning Dibon, Atarot, Aroer,

³⁵Atrotsofan, Jazer, Jogbeha,

³⁶Betnimra, at Betaran. Bekuran da lang pader a matibe king makapaligid at ginawa la namang kulungan para karing sese rang animal.

³⁷Ding pamilya na namang Ruben ila naman ding menalakad karing siudad ning Hesbon, Eleale, Kiriataim,

³⁸Nebo, Baal-meon (miyalilan ya iting lagyu) at ing Sibma. Dininan da lang bayung lagyu ring siudad a telakad dang pasibayu.

³⁹Lisuban de ring pamilya nang Makir a anak nang Manase ing gabun ning Gilead; sekupan de at tinabi ding Amoreo a manuknangan karin.

⁴⁰Inya binie neng Moises ing Gilead karing pamilya nang Makir at karin la menuknangan.

⁴¹I Jair, ing anak na namang Manase, lisuban na la at abihag ding baryu at pemalagyuan na lang Ding Baryu nang Jair.

⁴²Lisuban na ne mang Noba ing Kenat at ding baryu na at abihag na la. Kaybat pemalagyu na la king sarili nang lagyu.