Read Kapampangan Ding Bilang 33 Bible Online

Ding Bilang 33 - Kapampangan bible

Ding Bilang 33

¹Iti ing istoria na ning pamaglakbe da ring memalen na ning Israel manibat inyang meko la Ehipto, agpang karing karelang tribu, lalam nang pamanimunang Moises at Aaron.

²Antimo ing inutus na ning GINU, sinulat nang Moises ing pamitukituki na ning pamaglakbe ra manibat na inyang magumpisa la. Ya iti:

³Megumpisa lang miglakbe inyang likuan de ing Rameses ning Ehipto inyang kalabing limang aldo na ning mumunang bulan, itang aldo kaybat ning Pamaglagpus.[55] King akakit da ring tau Ehipto, meko lang mitmung tepangan.

⁴Ding tau Ehipto naman kukutkut da la ring anak dang pangane a mete uli na ning kayatulan na ning GINU karing kikilalanan dang dios.

⁵Meko la Rameses ning Ehipto ding memalen na ning Israel at miras la Sucot. Karin la migkampu.

⁶Meko la king Sucot at miras la king wakas ning disyerto ning Etam. Karin la migkampu.

⁷Meko la king Etam at mibalik la king Pi Hairot, king dane aslagan na ning Baal Zefon, at migkampu la malapit king Migdol.

⁸Meko la king Pi Hairot at delakitan de ing dagat papunta king disyerto. Miglakbe lang atlung aldo king disyerto ning Etam at migkampu la karin king Mara.

⁹Meko la king Mara at miras la king Elim nung nukarin ating labing aduang sibul at pitung pulung tanaman a palma. Karin la migkampu.

¹⁰Meko la king Elim at miras la king lele na ning Dagat da ring Timbu,[56] at karin la migkampu.

¹¹Meko la king Dagat da ring Timbu at miras la king ilang ning Zin, at karin la migkampu.

¹²Meko la karin at miras la king Dopka, at karin la migkampu.

¹³Meko la Dopka at king Alus la migkampu.

¹⁴Likuan de ing Alus at migkampu la king Refidim nung nukarin ala lang ainum a danum ding tau.

¹⁵Meko la karin king Refidim at migkampu la king disyerto ning Sinai.

¹⁶Meko la king disyerto ning Sinai at miras la at migkampu king Kibrot Hattaava.

¹⁷Likuan de ing Kibrot Hattaava at miras la at migkampu king Hazerot.

¹⁸Meko la Hazerot at migkampu la king Ritma.

¹⁹Meko la king Ritma at migkampu la karin king Rimon-perez.

²⁰Likuan de ing Rimon-perez, at miras la at migkampu king Libna.

²¹Meko la king Libna at miras la ampon migkampu king Risa.

²²Meko la karin Risa, at miras la ampon migkampu king Kehelata.

²³Meko la king Kehelata at miras la ampon migkampu king Bunduk ning Sefer.

²⁴Meko la karin at miras la ampon migkampu king Harada.

²⁵Meko la Harada at miras la ampon migkampu king Makelot.

²⁶Meko la Makelot at miras la ampon migkampu king Tahat.

²⁷Meko la king Tahat at miras la ampon migkampu king Tera.

²⁸Meko la king Tera at miras la ampon migkampu king Mitka.

²⁹Meko la king Mitka at miras la ampon migkampu king Hasmona.

³⁰Meko la king Hasmona at miras la ampon migkampu king Moserot.

³¹Meko la Moserot at miras la ampon migkampu king Bene-jakan.

³²Meko la Bene-jakan at miras la ampon migkampu king Hor Hagidgad.

³³Meko la Hor Hagidgad at miras la ampon migkampu king Jotbata.

³⁴Meko la Jotbata at miras la ampon migkampu king Abrona.

³⁵Meko la Abrona at miras la ampon migkampu king Eziongeber.

³⁶Meko la Eziongeber at miras la ampon migkampu king ilang ning Zin (a alang aliwa nune ing Kades).

³⁷Meko la king Kades at miras la ampon migkampu king Bunduk ning Hor dane nang wakas ning gabun ning Edom.

³⁸King utus na ning GINU, minukiat ya i Aaron king Bunduk ning Hor at karin ya mete. Mete ya kanitang mumunang aldo na ning kalimang bulan na ning kapat apulung banua kaybat ning paglako da ring Israelita king Ehipto.

³⁹Idad yang dinalan aduang pulu't atlung banua inyang mete ya.

⁴⁰Abalitan na ning ari ning Arad a manuknangan king Negeb ning Canaan ing paniatang da ring Israelita king Bunduk ning Hor.

⁴¹Meko la ring Israelita king Bunduk ning Hor at miras la ampon migkampu king Zalmona.

⁴²Meko la Zalmona at miras la ampon migkampu king Punon.

⁴³Meko la king Punon at miras la ampon migkampu king Obot.

⁴⁴Meko la Obot at miras la ampon migkampu king Iyeabarim a sakup na ning Moab.

⁴⁵Meko la Iyeabarim at miras la ampon migkampu king Dibon-gad.

⁴⁶Meko la Dibon-gad at miras la ampon migkampu king Almon-diblataim.

⁴⁷Meko la Almon-diblataim at miras la ampon migkampu king kabundukan na ning Abarim bayu ing Bunduk ning Nebo.

⁴⁸Meko la king kabundukan na ning Abarim at miras la ampon migkampu king kapatagan ning Moab lele na ning Ilug ning Jordan at tulid ning Jerico.

⁴⁹Telakad da la ring tolda rang tuknangan lele na ning Ilug ning Jordan, pilatan na ning Beth Jesimot at Abel-sittim karin king kapatagan ning Moab.

⁵⁰Migsalita ya ing GINU kang Moises karin king kapatagan ning Moab lele ning Ilug ning Jordan malapit Jerico.

⁵¹Ngana, Moises, oyni ing sabian mu karing Israelita. Potang dalakitan yu ne ing Jordan ban milub king gabun ning Canaan,

⁵²kailangan ing itabi yu la ring sablang taung manuknangan karin, siran yu la ngan ding gewa rang rebultung batu at bakal at lasakan ding sablang lugal nung nu la sasamba.[57]

⁵³Sakupan ye ing gabun at karin kayu manuknangan uling binie ke iti kekayu.

⁵⁴Pirakerakayan ye ing gabun agpang king pamangailangan[58] na ning balang tribu at ding pamilya ra. Dinan yang maragul a dake itang maragul a tribu, at malating dake itang malating tribu. King kapamilatan na ning bagutan karin yu gawan ing pamamie king dake na king gabun ning metung at metung.

⁵⁵Nung e yu la itabi king paglub yu ding sablang taung manuknangan karin, maging anti lang dui king kekayung akmulan o puling king kekayung mata detang malakuan. E la tuknang gawang kaguluan kekayu.

⁵⁶Nung e yu la itabi, daptan ku kekayu itang buri kung daptan karela.