Read Kapampangan Ding Bilang 9 Bible Online

Ding Bilang 9 - Kapampangan bible

Ding Bilang 9

¹Migsalita ya ing GINU kang Moises karin king Disyerto ning Sinai kanitang mumunang bulan na ning kaduang banua na ning paglako ra king bansa ning Ehipto. Ngana,

²Moises, paburen mu lang pagselebran de ring memalen na ning Israel ing Pamaglagpus[9] king mitakdang aldo.

³Pagselebran ye ing bengi na ning kalabing apat a aldo na niting bulan, agpang karing kautusan at tuntunan.

⁴Inya sinabi nang Moises karing memalen na ning Israel ing pagselebran de ing Pamaglagpus.

⁵At pigselebran de king bengi na ning kalabing apat nang aldo ning mumunang bulan karin king Disyerto ning Sinai, agpang king inutus na ning GINU kang Moises.

⁶Pero ating mapilan a taung e malinis uli na ning mekatagkil lang taung mete; e re apagselebran ing Pamaglagpus king aldong ita. Inya mekikit la kang Moises at kang Aaron king aldo mu ring ita

⁷at sinabi ra, E ke malinis uli na ning mekatagkil keng taung mete. E na ke wari malyaring makaibie ain king GINU uli na niting sangkan?

⁸Nganang mekibat Moises karela, Manaya kayu saguli at lawan ku nung nanu ing sabian na ning GINU tungkul kekayu.

⁹Ngana ning GINU kang Moises,

¹⁰Oyni ing sabian mu karing memalen na ning Israel: Nung atin kekayu o karing lahi yu a e malinis uli na ning mekatagkil yang taung mete o maglakbe ya king marayung lugal, sukat nia mu ring pagselebran ing aldo ning Pamaglagpus ning GINU.

¹¹Pagselebran de king bengi na ning kalabing apat nang aldo ning tutuking bulan king kapamilatan ning tinape alang lebadura at gule mapait.

¹²Ala lang tatagan nanumang pamangan angga na itang abak, at ala lang papaklian a butul na ning animal. Pagselebran ya ing Pamaglagpus agpang king aduan na ning tuntunan.

¹³Nung e ne pagselebran ing Pamaglagpus ning taung malinis at e maglakbe king aliwang lugal itiwalag ya king kanakung balen, uling e ya minie ain kanaku king aldo a mitakda. Sukat nang pagdusan ing pamikasala na.

¹⁴Nung ing metung a dayuan a makipamalen kekayu buri neng pagselebran ing Pamaglagpus ning GINU, sukat neng pagselebran agpang karing kautusan at tuntunan. Para karing sabla ya iting patakaran, taga Israel ya man o dayuan ya.

¹⁵Tikpan ne ning biga ing Toldang tuknangan na ning GINU king aldo a mitalakad ya. Masala yang anti ing milalablab a api neng bengi angga king abak.

¹⁶Makanyan parati ing malilyari king Tolda: tatakpan ne ning biga neng aldo; anti ya king milalablab a api ing biga neng bengi.

¹⁷Potang mako ya king lugal na ing biga, kanita la maglakbe ding memalen na ning Israel. Nung nukarin ya magdatun ing biga karin la naman magdatun ding Israelita.

¹⁸Maglakbe la king utus na ning GINU at tatalakad da la ring tolda rang tuknangan ketang lugal nung nu ya magdatun ing biga.

¹⁹Nung nukarin ya ing biga karin la manatili tulid na agyang pang lumuat la karin. Mamintu la king utus na ning GINU.

²⁰Neng misan manatili yang mapilan a aldo ing biga king tulid ning Tolda. Inya manatili la karin; potang mako ne, mako na la naman. Makayagpang ngan iti king utus na ning GINU.

²¹Neng misan naman manatili ya mu neng bengi angga na itang kayabakan, inya maglakbe la itang kayabakan kabud mako ya ing biga.

²²Nung manatili yang aduang aldo o pabulan o pabanua o maygit pa, e la mako ding memalen na ning Israel kabang manatili ya ing biga tulid ning Toldang tuknangan ning GINU. Potang mako ne ing biga, kanita la pa maglakbe.

²³Manalakad lang toldang tuknangan da at kakalagan da la reti bilang kapamintuan king utus ning GINU king kapamilatan nang Moises.