Read Kapampangan Hageo 1 Bible Online

Hageo 1 - Kapampangan bible

Hageo 1

¹King kadua nang banua ning pamag-ari nang Dario ning Persia, king mumunang aldo ning kanam a bulan, migsalita ya ing GINU king kapamilatan ning propeta Hageo. Ing mensahi para king gobernador ne ning Juda, i Zerubabel a anak nang Sealtiel at para king matas diling katungkulan a pari, i Josue a anak nang Jeozadak.

²Ngana ning GINUNG Mayupaya kang Hageo, Sasabian da reting tau king aliwa pa iti ing karampatan a panaun ban italakad yang pasibayu ing Templo ning GINU.

³Binie ne kanita ning GINU iting mensahi para karing memalen king kapamilatan na ning propeta Hageo:

⁴Kakung memalen, obat manuknangan kayu karing masanting a pibalebale kabang makalugmuk ya king kasiran ing kanakung Templo?

⁵E yu wari apapansinan ing malilyari kekayo?

⁶Tinanam kayung dakal, oneng ditak mu ing pinupul yu. Atin kayung pamangan, oneng e makagyu ban kumabsi kayu. Atin kayung alak, oneng e makagyu para lasing kayu! Atin kayung imalan, oneng e makagyung panlaban king dimla. At e makagyu ing panakitan na ning taung manintunan para king pangabiayan na.

⁷E yu wari akakit ing sangkan inya mapapalyari iti kekayo?

⁸Munta kayu karing bunduk-bundukan; kuma kayung dutung at italakad yeng pasibayu ing Templo; kanita ku mu tumula at misamban antimo ing karampatan.

⁹Penaya yu ing mika pupul kayung dakal, oneng ditak mu ing meging bunga. At inyang inuli yu ing pupul, kinalat ku king kapamilatan na ning angin. Obat depatan ku ita? Uling makalugmuk ya king kasiran ing kanakung Templo, samantalang samal neng pagobran ning balang metung kekayu ing bale na.

¹⁰Iti ya ing sangkan nung inya e mumuran at alang tutubu.

¹¹Aku ing pepalangi king bansa, karing bunduk-bundukan, karing marangle pitatamnanan binutil, karing mulahan ubas at olibo, karing balang tanaman a tutubu king gabun, karing tau ampon animal at king heganaganang buri yung patubuan.

¹²Kanita i Zerubabel at i Josue at ding sablang taung mibalik king pangayugse ra Babilonia, tiparan da itang sinabi na karela ning GINUNG karelang Dios. Miyatdanan lang takut at pemintuan de i propeta Hageo, ing tubud na ning GINU.

¹³Kaybat na nita, binie nang Hageo ing mensahi na ning GINU para karing memalen. Ngana, Mantabe ku kekayu; iti ya ing pangaku ku.

¹⁴Pepaisipan ne ning GINU ing balang metung ban magobra ya king Templo: i Zerubabel, ing gobernador ning Juda, i Josue, ing matas dili katungkulan karing pari, at ding sablang memalen a mibalik king karelang pangayugse. Megumpisa lang megobra king Templo ning GINUNG Mayupaya, ing karelang Dios,

¹⁵king kaduang pulu't apat a aldo ning kanam a bulan na ning kaduang banuang pamag-ari nang Dario.