Read Kapampangan 1 Macabeo 1 Bible Online

1 Macabeo 1 - Kapampangan bible

1 Macabeo 1

¹Magumpisa ya iting istoria inyang i Aring Alexander, ing anak nang Felipe ning Macedonia, ibat ya Macedonia[1] at minta ya at mekilaban kang Dario, ing ari ning Persia at Media. Simbut ne at simsam kang Dario ing tronu na. Uli na niti, meragul ya ing kayarian na ning Grecia.

²Dakal a labanan ing inarapan na, sekupan na la ding siudad a paka kuta at pete ding karelang ari.

³Miras ya angga king wakas na ning yatu at kinua na ing bandi da ring dakal a bansa. Kanitang tahimik ne ing yatu king lalam nang pamamahala meging matas ya lub at palalu.

⁴Tinatag ne ing metung a maragul at mayupayang grupu da ring sundalus, at ya ngeni ing mamahala karing sablang bansa at kayarian; at mamayad lang buis ding sabla.

⁵Misan a aldo mesakit ya at sablang isip na ing mate ne.

⁶Inya pepayaus na la ring heneral da ring sundalus na, ding taung nobli a akasing anak na, at piparti-parti ne karela ing kayarian na.

⁷Mete ya i Alexander kaybat ning labing aduang banua nang pamag-ari.

⁸Kamate na, megumpisa na lang memahala ding heneral

⁹at pitunganan neng korona ning balang metung karela ing sarili na bilang ari ning lugal a sasakupan na, at selisian da la ring anak da king makabang panaun. Pepasari lang karumaldumal a e ustu king yatu.

¹⁰Karing lahi da ring heneral nang Alexander, mibait ya ing e mayap a suli, i Antiocus Epifanes a anak nang Aring Antiocus. Meging bihag ya king Roma bayu ya mig-ari king Siria ketang banuang dinalan atlung pulu at pitu.[2]

¹¹King panaun a ita linto la king bansang Israel ding Judio a ginulut king Kautusan. Inagkat da la ring dakal a tau. Ngarang sasabi, Makikasundu tamu karing paganu, uli na ning e tamu pamakiabe karela pawa mung gulu ing miras kekatamu.

¹²Inisip da ring tau king atin lang matulid.

¹³Ating mapilan karela a agad minta king ari at tinanggap lang kapaintulutan tukian da ing panugali da ring paganu.

¹⁴Pepagawa lang maragul a lugal a pipamialungan[3] king Jerusalem kalupa da retang atyu karing siudad da ring Griego.

¹⁵Leko da la ring bakas ning panga-sirkunsisyun da at gilutan de ing banal a kasunduan. Mekiasawa la karing paganu at mekiabe la karing e mayap a dapat.

¹⁶Inyang matatag na ing pamag-ari nang Antiocus, inari na king lub na ing sakupan ne ing Ehipto ban maging ari ya naman karin subali pa king Siria.

¹⁷Tinatag na la ding dakal a barku at dakal a sundalus, kayabe la naman ding karung panggera, elepante, at sundalus a pakakabayu.

¹⁸Inyang miras ing labanan, mitakutan ya ing Aring Tolomeo ning Ehipto at tinakas ya at dakal la karing sundalus na ding mesugat at mete.

¹⁹Sekupan na la ding pakakutang siudad ning Ehipto at kinua na ing dakal a pibandian king mabilug a Ehipto.

²⁰King pamagbalik na kaybat neng simbut ing Ehipto king banuang dinalan apat apulu at atlu[4] inarapan neng Antiocus Epifanes, a kayabe ding dakal nang sundalus, ing Israel at ing siudad ning Jerusalem.

²¹Balamu mo nung ninu na ya; liban ne ing Templo at dela ne ing gintung altar, ing tumpakan-sulu, at ing sablang gamit na niti,

²²ing lamesa para king tinape a Panga-atyu ning Ginu, ding sagradung tasa at silyo, ding gintung pidurulukan insenso, ding tabing, at ding korona. Bikbak na naman ing sablang gintung palamuti king arap ning Templo

²³at kinua na ing sablang pilak at gintu at ing sablang maulaga, pati na ing sablang pibandian a makasinup.

²⁴Inuli na ngan iti king sarili nang bansa. Dakal la naman ding pepapate na at pagmaragul na ing sablang depat na.

²⁵Mika maragul a kalungkutan king mabilug a Israel.

²⁶Ding pamuntuk at manimuna sinaingsing la ngan king maragul a kalungkutan. Mengaina la ngan ding kayanakan a babai at lalaki. Kinupas ing lagu ding babai.

²⁷Melungkut la ding lalaking kakasal, at makalukluk lang makapaldas king kuartu da ring babaing kakasal.

²⁸Maging ing bansa mengalgal ya alang-alang kareting manuknangan. Makabalut ya king kamarinayan ing mabilug a bansa.

²⁹Kalabas ning aduang banua peparala ne ning ari karing siudad na ning Juda ing metung a matas a opisyal. Dinatang ya Jerusalem at ding tutung dakal a sundalus.

³⁰Maganaka yang migsalita, oneng mitmu yang pamaglinlang. Inyang ikua na ing tiwala da ring atyu king siudad, bigla neng selakayan. Penasakit neng masolu ing siudad at pete na la ding dakal a Israelita.

³¹Kinua na ing bandi da ring tau at silaban ne ing siudad.

³²Lesakan na la ding bale at pader king balang lugal. Dekap na la at sinukul ding babai at anak at simsam ding baka.

³³Kilungan neng Antiocus ing Siudad nang David karing mangatibe pader at mangatas a bantayan at

³⁴meging kuta yang sasakupan da ring berdugung dayuan at ding Judiong ginulut king kautusan.

³⁵Migdala la namang armas at pagkabie at tinipun da karin ing ikua da king Jerusalem. Meging pitatakutan ne ning Israel.

³⁶Ing kuta meging kalaban ne ning Templo, metung yang kalaban ning Israel king balang penandit.

³⁷Bilus da ing daya da ring alang balu at alang kasalanan king makapadurut ning altar; lepastangan de ing Banal a Lugal.

³⁸Tinakas la king takut ding memalen ning Jerusalem, at ing siudad meging tuknangan de ring dayuan. Meging dayuan ya ing Jerusalem karing mismung memalen na uling mepilit lang karela yang lakuan.

³⁹Lubas ya ing Templo, ilang ing kalupa na; meging mistula lang kalungkutan ding mangasaya nang piesta; meging kamarinayan ya ing tula ning Sabbath; meging bage pikaylian ya ing dangalan na.

⁴⁰Nung makananu ya katas ing dangalan na king minuna, makanyan munaman ngeni ing dagul ning kamarinayan a kimtan na.

⁴¹Pepalual yang kautusan ing Aring Antiocus karing sablang bansa king kayarian na,

⁴²king maging metung lang memalen at ing balang metung karela lakuan na ing matua rang kautusan at relihiun. Tinggap da ring sablang bansa ing kautusan ning ari.

⁴³Maging king Israel dakal la ding tinanggap king pamanyamba da ring dayuan, miyain lang ain-sakripisyu karing idolo at e ra ne ginalang ing Aldo ning Sabbath.

⁴⁴Peparala ya namang tubud a magdalang pakasulat a kautusan king Jerusalem at karing sablang balen ning Juda. Yuyutus na karing memalen ing tukian ing panugali da ring dayuan.

⁴⁵Binawal na lang miyain ain-a-durulukan, ain-a-binutil o ain-a-inuman king Templo at ibilang da lang pangkaraniwan a aldo ding Sabbath at ding piesta ra.

⁴⁶Inutus na naman ing tuknangan da na ing pamanggalang king Templo at karing pari.

⁴⁷Miyutusan lang mitalakad altar at pisamban para karing idolo, ing miyain babi at aliwa pang marinat a animal.

⁴⁸Mibawal munaman karela ing pasirkunsisyun da la ring anak da at mipaintulutan lang gawan da ing sablang karinatan king sarili ra

⁴⁹ban kalinguan da na la ding Kautusan a binie ning Ginu king kapamilatan nang Moises, at alilan da la ding palatuntunan na.

⁵⁰Kamatayan ing parusa king e pamamintu king kautusan ning ari.

⁵¹Ing kautusan na ning ari metung ya mu para king mabilug a kayarian. Tilduan na la naman ding opisyal ban mamahala karing tau, at inutus na karing sablang balen na ning Juda ing miyain lang sakripisyu.

⁵²Dakal la ding Judiong ginulut king Kautusan ding mekiabe karela, at gewa ra ing e ustu king bansa.

⁵³At uli na ning depatan da reti, mepilit lang sinalikut nu man karin ding tapat karing Judio.

⁵⁴King kalabing lima nang aldo ning bulan ning Kislev king banuang dinalan apat apulu at lima[5] telakad neng Aring Antiocus ing metung a Karumaldumal a Kalapastangan king altar ning Templo. Mitalakad la namang paganung altar karing makapadurut nang siudad ning Juda,

⁵⁵at dinuluk lang insenso karing pasbul da ring balang bale at karing dalan.

⁵⁶Pinyira da la at silaban ding libru ning Kautusan a meyakit.

⁵⁷King utus ning ari, miyatulan yang kamatayan ing ninumang kayakitanan king Libru ning Kasunduan o mamintu king Kautusan.

⁵⁸Inya karing mituki-tuking bulan ginamit da ing upaya da reting taung e mayap laban karing Israelitang arakap da karing balen da.

⁵⁹King kaduang pulu't limang aldo ning bulan, miyain lang ain-sakripisyu king paganung altar a telakad da babo ning altar ning Ginu.

⁶⁰Agpang king kautusan ning ari, paten la ding ima a pepasirkunsisyun karing anak da.

⁶¹Ding bingut da at pamilya, at pati na ding migsirkunsisyun karela isabit da la karing batal da.

⁶²Makanyan man, dakal la king Israel ding menalakaran matatag laban king kautusan ning ari, at tinggian da ing mangan lang pamangan a e malinis agpang king kautusan.

⁶³Pinili ra ing mate la bayu re labagan ing banal a kasunduan at mangan king e malinis; at dakal la ding mete.

⁶⁴Migdusa ya ing Israel uli na ning mua ning Dios.