Read Kapampangan 1 Macabeo 11 Bible Online

1 Macabeo 11 - Kapampangan bible

1 Macabeo 11

¹Tinipun na lang Aring Tolomeo a Kanam ning Ehipto ding dakal a sundalus. E la mabilang-bilang anti ing balas king lele ning dagat; mitatag ya namang dakal a barku. Ing tangka na ya ing samsaman ne king lihim ing kayarian nang Alexander at iyabe ne king sakup na.

²Inya minta ya Siria; migkunwari yang magdalang kapayapan at biklat da la ring memalen ding pasbul dang dalan at selubungan de. Iti utus nang Aring Alexander uling katuangan ne i Aring Tolomeo.

³Milalakuan yang sundalus na i Tolomeo kabang daralan ya karing balang balen.

⁴Karas na Asdod, pepakit de kang Tolomeo ing mesilab a templo nang Dagon, ing siudad at pati na ing melasak nang makapaligid nung nu la pakakalat ding bangke. Pakailera la king dadalanan na ing duluk dang bangke ding mesilab king labanan.

⁵Sinabi da ring memalen kang Aring Tolomeo ing depat nang Jonatan uling pagnasan da ing pamarsalanan ne, oneng e man bubulad ing ari.

⁶King angkup a seremonia marangal neng selubungan Jonatan king Jopa nung nu la mipangomusta at nung nu ra pepalabas ing kabengian.

⁷Inantabayanan neng Jonatan ing ari angga king Ilug ning Eleutero at kaybat mibalik ne Jerusalem.

⁸Makanyan na lang sinupil Tolomeo ding balen a makalele king dagat angga na Seleucia-a-makalele-king-dagat king e mayap nang tangka laban kang Alexander.

⁹Peparala yang tubud kang Aring Demetrio at ngana king mensahi na: Mumungkahi ku king ika ampon aku gawa katang kasunduan. Ibie ke keka ing anak kung asawa nang Alexander ngeni, at ika ing maging ari ning kayarian nang tata mu.

¹⁰Sisisian ku ngeni ing binie keng maging asawa na ing anak ku uling buri na kung paten.

¹¹Makanyan neng singkanan i Alexander uling pignasan ne ing kayarian na.

¹²Kinua ne ing anak na at binie ne kang Demetrio. Makanyan lang mikawani ilang aduang Alexander at meging lantaran na ing pamilaban da.

¹³Linub ya Antiokia i Tolomeo at linukluk bilang ari ning Siria. Adua lang korona ding atyu kang Tolomeo: ing korona ning Ehipto at ning Siria.

¹⁴Atyu Cilicia ing Aring Alexander uling mag-rebeldi la kanita ding memalen karin.

¹⁵Oneng inyang abalitan na ing depat nang Tolomeo linakad ne ban lusuban ne. Selubungan neng Tolomeo a kayabe ding dakal nang sundalus at simbut ne.

¹⁶Tinakas ya i Alexander ban salikut king Arabia. Migtagumpe ya ing Aring Tolomeo.

¹⁷Tibtab ne batal Zabdiel a pamuntuk da ring Arabo i Alexander at peparala ne ing buntuk na kang Tolomeo.

¹⁸Oneng kaybat ning aduang aldo mete ya ing Aring Tolomeo at pete da la ring memalen ding sundalus nang likuan a pakakuta.

¹⁹Inya king banuang dinalan anam apulu at pitu[26] meging ari ya i Demetrio a Kadua.

²⁰Tinipun na lang Jonatan ding Judio ban lusuban ing kuta ning Jerusalem at migdala lang dakal a kasangkapan a panglusub.

²¹Oneng ding Judiong kabalen dang ginulut king Kautusan nang Moises a meging kalaban da mismu ding kabalen da, minta la king ari at simbung da king kukubkuban neng Jonatan ing kuta ning Jerusalem.

²²Mimua yang e mu nanu ing ari king balita at agad-agad neng linipat king Tolemaida ing kwartel na. Sinulat ya kang Jonatan. Inutus na king tuknangan na pa ing pamangubkub na at pakikitan neng agad king Tolemaida ban makapisabi la.

²³Katanggap nang Jonatan king sulat minie yang bilin king isundu ing pamangubkub king Jerusalem. Kaybat memili ya karing makatua ning Israel at karing pari ban mantabe king mapanganib nang lakad.

²⁴Migdala yang pilak at gintu, balabal, at dakal a miyayaliwang lamak, at pekitagpuan ne ing ari king Tolemaida.

²⁵Ikua nang Jonatan ing mayap nang pilubluban Demetrio, agyamang misampa lang dalum laban king pangatau na ding Judiong ginulut king Kautusan nang Moises.

²⁶Oneng kalupa da ring minuna kang Jonatan parehu mu ing pamananggap nang Demetrio. Peparangalan ne king arapan da ring Kakaluguran ning Ari.

²⁷Kilala na ing panga Pekapun nang Pari at king sabla nang karangalan at tilduan neng pamuntuk da ring mumunang ranggo ding Kakaluguran ning Ari.

²⁸Inawad nang Jonatan king ari ing e ne papamayaran buis ing Judea at ding atlu nang distritu ning Samaria, at bilang kalibe mengaku ne mang aduang pulu't aduang libung librang pilak.

²⁹Mebisa ya ing Aring Demetrio at nganang sinulat kang Jonatan tungkul kareting bage:

³⁰Ibat ya iting sulat kang Aring Demetrio at miparala ya king kapatad nang i Jonatan at king bansang Judio; kukomustan da kayu ngan.

³¹Ban abalu yu, kopia ya iting sulat ketang peparala mi king gagalang ming kamaganak a i Lastenes tungkul keka:

³²Ibat ya iting sulat kang Aring Demetrio at para kang Lastenes ya, ing gagalangan nang kamaganak. Kukomustan da ka.

³³Uli na ning ing kaluguran tamung bansang Judio pepakit na ing tapat ya karing katungkulan na kekatamu, pikayari mi ing maging mapamie kami karela.

³⁴Kikilalanan mi ing katuliran da king bansa ning Judea, at ngeni mililipat la king Judea ibat king Samaria ding atlung distritu: ing Efraim, ing Lydda, at ing Arimatea at pati na ding aliwang lugal a kasiping da. Iti para king kapakanan da ring memalen a pupunta Jerusalem ban munie ain-sakripisyu uli na ning ing balang banuang buis king pupul da karing asikan at mulahan a sadia nang tatanggapan ning ari ngeni milipat king Templo.

³⁵Ing aliwang lulub, antimo ing sikapulu, arkila, buis king asin, at aliwa pang buis, ibabie mi na ngan karela.

³⁶E la malyaring mawalang bisa deting bage makalaman keting sulat manibat ngeni at angga na king kapilan pa man.

³⁷Gawa kang kopia na niting kasulatan a sukat miyabie kang Jonatan at ibili na la king Banal a Bunduk king lugal a agad lang mayayakit at mababasa.

³⁸Inyang ikit nang Aring Demetrio king payapa ne ing bansang sakup na at ala nang lalaban pa, silbag na na la ding sabla nang sundalus at pepaulian ding sablang sundalus na, subali mu ding dayuan a babayaranan na a ibat karing pulu da ring paganu. Uli na niti, pikasaman de ring sablang sundalus a sinuyu karing aring minuna uling milako la kapanintunan.

³⁹Uling e makalingad kang Trifo, ing metung karing sadia nang talasuyung Alexander, king e la matula kang Demetrio ding sablang sundalus. Minta ya kang Imalcue, ing metung a pamuntuk da ring Arabo a talaingat king anak a Antiocus a anak nang Alexander.

⁴⁰E ne pepatugutan aduan ing lalaking anak ban gawan ari a kayalili nang tata na. Belitanan nia naman i Imalcue king sablang planung gagawan nang Demetrio at nung makananung e re katulan ding sundalus na. Menatili ya mu ring malambat karin.

⁴¹Samantala, inawad na namang Jonatan kang Aring Demetrio king ilako na na la ding sundalus na king kuta ning Jerusalem at karing kuta king Judea, uling alang tuknang da lang liligaligan ding Judio.

⁴²Nganang mekibat Demetrio, E mu ing gawan ku ing aduan mu, nune kabud dinatang ing pamikatagun ibie ku keka at king bansa mu ing matas diling parangal.

⁴³Oneng king panaun ngeni malyari mu kung asaupan nung paralan mu kung sundalus ban lumaban para kanaku, uling mag-rebeldi la ding sabla kung sundalus.

⁴⁴Peparala na lang Jonatan king Antiokia ding atlung libung misane sundalus. Metula ya ing ari king paniatang da.

⁴⁵Dinatang la king siudad ding dinalan aduang pulung libung memalen at yari na king lub da ing paten de ing ari.

⁴⁶Sinalikut ya ing ari king palasyu samantalang ding memalen sekupan da la ring dalan at megumpisa na ing labanan.

⁴⁷Inaus na lang Aring Demetrio ding Judio ban saupan de at agad lang dinatang. Mikalat la king mabilug a siudad at mekapate lang anggang dinalan a libung tau king aldong ita.

⁴⁸Silaban de ing siudad at kinua ra ing dakal a pibandian. Makanyan deng linigtas ing bie ning ari.

⁴⁹Inyang ikit da ring memalen ing ganap neng atyu king gamat da ring Judio ing siudad, mesira la lub at inawad da king

⁵⁰ari ing tanggapan na ing pamanyuku ra at patuknangan na na la ding Judio a lulusub karela.

⁵¹Sinuku da la ring armas da at mekikasundu la. Manibat king ari at pati na ding sablang memalen a sakup na mika maragul la pamanggalang karing Judio. Minuli lang daralan da ing maragul a pibandian a ikua ra king labanan.

⁵²Oneng inyang panatag ne king tronu na i Aring Demetrio at payapa ing bansa king pamamahala na,

⁵³gilutan na ing sablang pangaku na at kelabanan ne i Jonatan. E na kilala ing kasuyuan nang Jonatan, bagkus ligalig ne pa.

⁵⁴Kaybat na nita, mibalik ya i Trifo; kayabe ne ing kayanakan a i Antiocus at gewa neng ari.

⁵⁵Mekiabe la king kayanakan a ari ding sablang sundalung pepalakuan nang Demetrio. Simbut de i Demetrio king labanan at tinakas ya.

⁵⁶Abihag na lang Trifo ding elepante at sekupan ne ing mabilug a Antiokia.

⁵⁷Sinulat ya ing kayanakan a Aring Antiocus kang Jonatan at kilala ne bilang Pekapun ding Pari a maki upaya karing apat a probinsia, at binie na kang Jonatan ing karangalan a mayaus Kakaluguran ning Ari.

⁵⁸Pepadala nia naman ing metung a gintung pinggan at dininan neng upayang minum king gintung kopa, ing misulud balabal a purpura, at misulud king gintung hibilia king pago na a miyabie kareng ausan dang Kamaganak ning Ari.

⁵⁹Tilduan ne i Simon a kapatad nang Jonatan bilang opisyal a pekapun ning lugal manibat king lele ning dagat king Fenicia angga na king angganan ning Ehipto.

⁶⁰Miglakbe ya i Jonatan king bansa sumangid ning ilug at karing balen da reti, at mekiabe la kang Jonatan antimong kakampi da ring sablang sundalus na ning Siria. Minta ya Askelon nung nu re tinggap mitmung dangalan ding memalen.

⁶¹Manibat karin minta ya Gaza oneng ding memalen sera da la ring pasbul dalan. Uli na niti, sebatan ne dalan ing siudad, at silaban na ing makapaligid king siudad, at kinua na ing pibandian da.

⁶²Meniawad lang kapayapan ding tau Gaza, at ginawa yang dalan ning pamikasundu i Jonatan. Kinua na la ding anak da ring talapanimuna at peparala na la Jerusalem antimong garantia. Kaybat, miglakbe ya angga king Damasco.

⁶³Abalitan nang Jonatan king ding opisyal nang Demetrio dinatang la Kedes ning Galilea a kayabe ning maragul a puersa ban e na agampanan ing saria na.

⁶⁴Inya likuan ne ing kapatad nang i Simon king Judea ban pakiarapan na la.

⁶⁵Kanita kibkuban neng Simon ing Betzur at mika malambat a labanan.

⁶⁶Katataulian, inawad da ring memalen na ning siudad king makikasundu na la king kapayapan. Mebisa ya i Simon; tinabi na la ding memalen at mitalaga yang mapilan a sundalus karin.

⁶⁷Samantala, i Jonatan at ding sundalus na a migkampu lele ning Dagat ning Galilea, maranun lang linakad itang abak papunta king kapatagan ning Azor.

⁶⁸Dinatang lang sasalubung ding sundalus da ring paganu king kapatagan. King e na kamalayan Jonatan milakuan lang sundalus ding kalaban karing bulubundukan ban sabatan de at paten.

⁶⁹Inyang lage la ding sundalus a maniabat at mekiabe king labanan, tinakas la ngan ding sundalus nang Jonatan.

⁷⁰Alang mitagan nune mu i Matatias a anak nang Absalom, at i Judas a anak nang Calfi; opisyal da la ring sundalus na.

⁷¹Ginabak nang Jonatan ing imalan na at mibili yang abu king buntuk na at menalangin.

⁷²Kaybat, inarapan na la ding kalaban at simbut na la at tinakas la.

⁷³Inyang ding mismung sundalus nang Jonatan a tinakas ikit da ing milyari, mibalik la at mekiabe lang tinagal karing kalaban angga na king karelang kampu king Kedes at sekupan de ing kampu.

⁷⁴Ating atlung libu karing kalaban a sundalus ding mete king aldong ita. Mibalik ya kanita Jerusalem i Jonatan.