Read Kapampangan 1 Macabeo 13 Bible Online

1 Macabeo 13 - Kapampangan bible

1 Macabeo 13

¹Miras ing balita kang Simon king mekatipun yang dakal a sundalus i Trifo para luban ne at lasakan ing Judea.

²Miras karing tau ing maragul a takut. Inyang ikit nang Simon iti, minta ya Jerusalem. Kaybat, minaus yang pulung. Pepasiknangan na la lub king kapamilatan da reting amanu:

³E na kailangan pang ipaganaka ku kekayu ing sablang gewa da ring kapatad ku at aku, at ing pamilya ku para king Kautusan nang Moises at king Templo, ding labanan a lebanan mi, at ding kasakitan a pibata mi.

⁴Para kaniting parasan, mete no ngan ding kapatad ku king pamakilaban da para king Israel, at aku nang dili ing mitagan.

⁵E na sana paintulut ning banua king aku mag-alinlangan keng ibie ing bie ku karing penandit ning kaligaligan uling e na ku man maygit pa kaulaga karing kapatad ku.

⁶Ali! Makilaban ku para king bansa ku at king Templo, para karing asawa yu at anak yu, uling king mua da ring sablang paganu mitipun la ban gisanan da katamung paten.

⁷Mesikan la lub ding memalen kareting amanu

⁸at kilisak da, King lugal nang Judas at ning kapatad mung i Jonatan ika ing manimuna mi.

⁹Labanan mu ing labanan mi at daptan mi ing nanumang sabian mu kekami.

¹⁰Inya tinipun na lang Simon ding sablang lalaking makilaban at pemiraplan ne ing pangayari na ning pader ning Jerusalem at pekatibe ne misusumangid.

¹¹Tinubud ne i Jonatan, ing anak nang Absalom, kayabe ding dakal a sundalus king Jopa, at tinabi na la ding memalen a atyu karin at sekupan ne ing balen.

¹²Linakad yang manibat Tolemaida i Trifo at ding dakal a sundalus ba neng lusuban ing Judea. Tiki ne ing bihag nang i Jonatan.

¹³Migkampu ya i Simon king Adida king gilid na ning kapatagan.

¹⁴Inyang abalitan nang Trifo king dinatang ya i Simon bilang kayalili ning kapatad nang i Jonatan at malapit na lang miyarap king labanan, peparala yang tubud kang Simon a kayabe iting makatuking mensahi:

¹⁵Kukulung ke ing kapatad mung i Jonatan uli na ning e na la beyaran ding salaping utang na king pondu na ning ari kabang manungkulan ya.

¹⁶Ban asiguru mi king e ne mag-rebeldi, nung palualan mi ya king pangakulung na, parala kang anam a libung librang pilak at adua karing anak na anting garantia. Ibulus mi ne kanita.

¹⁷Aintindian nang Simon king iti metung ya mung pamaglinlang. Makanyan man mekiduang yang salapi at dela da la keya ding anak na,

¹⁸uling migaganaka ya a pamarsalanan de ring tau at sabian da, E mu la kasi peparala ding salapi at ding anak inya mewala ya ing bie nang Jonatan.

¹⁹Inya peparala na la ding anak at ding anam a libung librang pilak, oneng sinira nang Trifo ing pangaku na at e ne binulus i Jonatan.

²⁰Kaybat na nita, migsadia ya i Trifo ban lusuban ne ing bansa at lasakan ne. Dinalan yang makapadurut king Adora. Oneng makatuki ya tulid na i Simon at ding sundalus na nu ya man munta i Trifo.

²¹Samantala, peparala lang tubud ding sundalus king kuta ning Jerusalem kang Trifo; agkatan deng munta karela king kapamilatan na ning pamandalan na king disyerto, at king paralan na la king sablang kailangan da.

²²Sidia na lang Trifo ding sundalung pakakabayu ban parala no ngan, oneng itang bengi na nita dinatang ing masikan a uran yelu, inya e la mekapunta; minurung ya Gilead.

²³Karas na Baskama pepapate ne i Jonatan at karin ya mikutkut.

²⁴Mibalik ya kanita i Trifo king sarili nang bansa.

²⁵Pepadala neng Simon ing bangke ning kapatad nang i Jonatan king Modein, at pepakutkut ne king balen da ring pengari na.

²⁶Pigkalungkutan na at pigpaldasan iti ning mabilug a Israel karing dakal a aldo.

²⁷Pepatalakad yang matas a monumento babo ning kutkutan nang tata na at ding kapatad na a malyaring mayakit angga king marayung lugal. Makabalut ya iti king arap at gulut karing kikintab a batu.

²⁸Mitalakad yang pitung misiping-siping a pyramid para kang tata na, kang ima na, at karing apat nang kapatad a lalaki.

²⁹Kayabe ding pyramid, mitalakad lang mangatas a asias a maki dinukit a baluti at barku. Metung yang monumento ning tagumpe ra a malyari dang akit ding sablang maglayag king dagat.

³⁰Atyu ya angga ngeni iting mosoleong pepatalakad na king Modein.

³¹Samantala, pete neng Trifo ing anak a Aring Antiocus a Kanam.

³²Ya ing linukluk bilang ari ning Siria. Ya ing sangkan obat dakal ing gulu king bansa.

³³Telakad na lang pasibayung Simon ding kuta na ning Judea. Dininan na lang mangatas a tore, mangatibe pader, at pasbul a ating kabat. Kaybat na nita, mibili ya king sablang kailangan da karin.

³⁴Peparala yang tubud kang Aring Demetrio a Kadua ban ilako na ing buis a babayaran na ning bansa uli na ning ala neng gewa i Trifo nune mu ing panakawanan na la.

³⁵Mebisa ya i Aring Demetrio at peparala ne ing makatuking sulat bilang pakibat na:

³⁶Ing Aring Demetrio kang Simon, ing Pekapun ding Pari, ing kakaluguran ding ari, king bansa da ring Judio at karing karelang talapanimuna. Kukomustan da kayu.

³⁷Tinggap mi ya ing gintung korona at ing gintung sanga na ning palma a peparala mu, at makasadia kaming gawang permanenting kapayapan kekayu at panabilinan mi la ding talapanibala king pamanyingil buis ban e da na kayu aduananan pa.

³⁸Manatili la ding sablang pikasunduan tamu at manatili lang kekayu ding sablang kuta a telakad yu.

³⁹Manibat na ngening aldo a megawa ya iting sulat, patawaran mi na la ding gewa yung pamaglabag o pamagkulang yu king kasunduan. Patawaran da kayu king sablang utang yu king ari at e na kayu mamayad pang nanumang buis a sadiang mapapanaya king Jerusalem.

⁴⁰Malyari lang palista king pamanyuyu king ari detang Judiong karapatdapat. Manatili sana kekatamu ing kapayapan.

⁴¹Inya king banuang dinalan pitung pulu[29] milako ya karing Judio ing paud da ring mapanalipustang paganu.

⁴²Pegumpisan da nang sinulat karing kasulatan da at kasunduan ding memalen ding anti kareting amanu: King mumuna nang banuang Simon, ing mayupayang Pekapun ding Pari, ing pekapun at manimuna da ring Judio.

⁴³King panaun a ita kibkuban neng Simon ing Gezer. Pepadurutnan ne karing sundalus na. Pepagawa yang kasangkapan a pangubkub at dela ne iti siping ning balen. Mekagawa yang dalanan na king metung karing tore at abihag ne.

⁴⁴Ding taung atyu king kasangkapan a pangubkub mabilis lang linub king balen at migdala lang maragul a kaguluan.

⁴⁵Ding memalen at ding asawa ra ampon anak da ginabak da ing imalan da uli ning kalungkutan da at minukiat la king babo ning pader ning balen. Masikan la lub mekisabi kang Simon ban ituknang da na ing labanan.

⁴⁶Ngara, E yu kami parusan! Malunus kayu kekami.

⁴⁷Mekikasundu ya i Simon karela at mituknang ing labanan. Pepalakuan na la ding tau king balen; lininis da la ring bale a ating idolo. Kayari na nita, ya at ding tauan na linub la king balen; migkanta lang kapurian at kapasalamatan.

⁴⁸Lininis na ing sablang dinat at milakuan yang lalaki a patupad karing kautusan. Pepatibe ne ing kuta at menalakad yang tuknangan na kilub na niti.

⁴⁹Mibawal karing lalaking manuknangan king kuta a atyu Jerusalem ing lual la king siudad ban maniali o mamisaling nanuman. Dinatang ing danup karela at dakal la ding mete.

⁵⁰Inawad da kang Simon ing tanggapan na ing pamaniuku ra at mebisa ya. Tinabi na la king kuta at lininis ne iti king sablang karinatan.

⁵¹King kaduang pulu't atlung aldo ning kaduang bulan ning banuang dinalan pitung pulu at metung[30] kanita ya linub king siudad; ating kantang kapurian at wawagwag da la ring sangang palma at titigtigan da la ring alpa, pandereta, lira, at aliwa pa ban pagselebran da ing katataulian a pangatabi ning metung a matatag a kalaban.

⁵²Inutus nang Simon king ing aldong ita dapat deng pagselebran balang banua. Pepatibe ne ing dipensa na ning bunduk-bundukan ning Templo king sumangid ning kuta at menuknangan ya at ding tauan na karin.

⁵³Uling maragul ne ing anak nang i Juan gewa ne iting pekapun da ring sabla nang sundalus, at gewa ne ing Gezer bilang kwartel na.