Read Kapampangan 1 Macabeo 2 Bible Online

1 Macabeo 2 - Kapampangan bible

1 Macabeo 2

¹King panaun a ita, linipat ya manibat Jerusalem at menuknangan ya Modein ing metung a pari king pamilya nang Jeoiarib. Ya i Matatias, ing anak nang Juan at apu nang Simeon.

²Atin yang limang anak a lalaki at ila deti: i Juan a ausan da namang Gaddi,

³i Simon a ausan da namang Tassi,

⁴i Judas a ausan da namang Macabeo,

⁵i Eleazar a ausan da namang Avaran, at i Jonatan a ausan da namang Appus.

⁶Inyang ikit na ing dakal a kasalanan a mararapat king Juda at Jerusalem,

⁷sinabi na, Baket mibait ku pa ban akit ku iting makatakut, ing kasiran ding kakung kabalen at ing kasiran ning banal a siudad? Makalukluk na ku mu waring alang akarapat kabang susuku re ing siudad karing kalaban, at ing banal a Templo mananabu ya karing gamat ding dayuan?

⁸Meging anti ya king lalaking alang dangalan ing Templo.

⁹Dela da lang penako ra ding masanting nang kasangkapan. Ding anak na pete da la king dalan, at ding lalaking kayanakan king espada ding kalaban.

¹⁰Ating bansa a e menuknangan karing palasyu na o memalen a e migsamantala king bandi na?

¹¹Linubas de king sablang palamuti na; e ne malaya,[6] mistula nia mung ipus.

¹²Ngening ikit mi nang mewala sabla nang lagu at ligaya ning banal ming Templo,

¹³at selaula da ring paganu ba't kailangan pa ing mibiebie kami?

¹⁴Uli na ning lungkut da, ginabak da ing imalan da ri Matatias at ding anak na, at misulud lang imalan a magaspang at melungkut lang e makanyan-kanyan.

¹⁵Dinatang la king balen ning Modein ding opisyal ning ari, at pipilitan da la ring tau ban munie lang ain paganu.

¹⁶Dakal la ding Israelitang mekikit karela. Makatalakad ya i Matatias at ding anak na king metung a lugal.

¹⁷Ngarang sinabi ding opisyal ning ari kang Matatias, Metung ka karing gagalang dang manimuna king balen a iti, at tutukian ding anak mu at kapatad mung lalaki.

¹⁸Muna ka ngening tupad king utus na ning ari antimo ing depat da na ring paganu at ding manimunang lalaki ning Juda, at ding taung melakuan king Jerusalem. Kanita ika at ding anak mu mibilang la karing Kakaluguran na ning Ari, at ika ampon ding anak mu miparangalan kayu kapamilatan na ning pilak at gintu, at dakal pang pakinabang.

¹⁹Kanita nganang mekibat Matatias king masikan a siwala, Agyang pamintuan de ring sablang bansa king sakup na ning kayarian na at gulutan ing pamanyamba da ring makatua da a pinili rang pamintuan,

²⁰makanyan man, aku at ding anak ku at kapatad ku mie kami king kasunduan a gewa ning Dios karing makatua mi.

²¹E mi ya malyaring gulutan ing Kautusan.

²²E kami mamintu king utus ning ari ni alilan agyang ditak mu man ing paralan na ning panyamba mi.

²³Kayari nang migsalita king daramdaman da ring sabla, linage ya ing metung a Judio ban mamie yang ain-sakripisyu king altar karin Modein bilang kapamintuan king utus na ning ari.

²⁴Inyang ikit nang Matatias iti, mikakalabkab ing mua na. Gagalgal ya at king bigsikan na ning mua na milayi yang pintalan ne at pete ing taksil king altar.

²⁵Pete nia naman ing opisyal na ning ari a minutus mamie ain-sakripisyu karing memalen, at lesak ne ing altar ding paganu.

²⁶Makanyan nang pepakit Matatias ing maragul nang pamagmalasakit king Kautusan antimo ing depat nang Fineas kanitang pete ne i Zimri a anak nang Salu.[7]

²⁷Minta ya kanita i Matatias king balen at king masikan a siwala sinabi na, Tuki ya kanaku ing tapat king Kautusan at bisang mamintu king kasunduan!

²⁸At ya at ding anak na memunduk la at likuan da ngan ing sablang pibandian da.

²⁹King panaun a ita detang bisang manatili king karelang relihiun at Kautusan minta lang mibiebie king ilang.

³⁰Tiki da la ring anak da at asawa at ding sese rang animal uli na ning e ra na agyung dalan ing maragul a kasakitan a daralanan da.

³¹Miras ing balita karing opisyal at sundalus na ning ari a atyu king Jerusalem, ing Siudad nang David, king ding taung e bisang mamintu king utus ning ari linual lang menuknangan king ilang.

³²Tinagal la karela ding dakal a sundalus at atagal da la; migkampu la deti king sumangid da at migsadia lang salakayan da la king Aldo ning Sabbath.

³³Ngarang kinulisak karela, Atin pang panaun. Lumual na kayu, mamintu kayu king utus ning ari at e kayu numanu balang.

³⁴Oneng ngarang mekibat, E kami lumual. E kami mamintu king utus ning ari at e mi ya labagan ing Aldo ning Sabbath.

³⁵Agad-agad da lang lisuban kanita ding sundalus,

³⁶oneng e la ginawang nanumang takbang ding Judio ban lumaban, e la man memasibas batu ni dininan mu man sabat ding karelang kueba.

³⁷Ngara, Arapan tamu ing kamatayan a ating malinis a konsiensia. Ausan mi ya ing banua at ing yatu ban maging saksi king alang hustisiang daraptan yung pamakamate kekami.

³⁸Linusub la ding kalaban king Aldo ning Sabbath at pete da la ring lalaki, ding asawa ra, ding anak da, at ding sese rang animal. Ating libu katau karing mete.

³⁹Maragul ing kalungkutan nang Matatias at ding kakaluguran na inyang abalitan da ing milyari.

⁴⁰Ngara king metung at metung, Nung daptan tamu ngan ing depat da reting kalupa tamung Judio at e tamu idipensa karing paganu ing bie tamu at ding Kautusan tamu at kaugalian, matda tamu king lupa na ning meto yatu.

⁴¹Uli na niti, inari da king aldo a ita king nung ating salake karela king Aldo ning Sabbath, idipensa ra ing sarili da kesa king mate la ngan antimo ing depat da ring kapatad dang atyu karing kueba.

⁴²Kaybat na nita, mekiabe ya karela ing metung a pangkat a Hasideano, ding tapat at matapang a Israelita. Migkusa la deting idipensa re ing Kautusan.

⁴³Mekaragdag la pa at mekasikan kareti detang tatakasan da ing karelang pangalupig.

⁴⁴Mekatatag lang metung a grupung sundalus, at bignus da ing mua ra karing palpikasala at karing ginulut karing Kautusan ning Dios. At detang mekatakas mepilitan lang menuknangan karing paganu ban miligtas la.

⁴⁵Pintalan na lang Matatias at ding kakaluguran na at lesakan ding altar da ring paganu nu la man karin;

⁴⁶at pinilit da lang sinirkunsisyunan detang kayanakan a e pa mesirkunsisyun a atyu king angganan na ning Israel.

⁴⁷Migtagumpe la naman king pamanagal da karing mapagmatas at palalung opisyal da ring paganu.

⁴⁸Makanyan deng iningat at aligtas ing Kautusan nang Moises karing paganu at karing ari da, at ikua reng abagsak ing upaya ning e mayap a i Aring Antiocus.

⁴⁹Ngana karing anak na inyang miras na ing oras ning kamatayan nang Matatias, Deti panaun na la ning bigsikan at kaligaligan. Ding taung palalu ila ding makababo at pituya-tuya da katamu; panaun ne ning kasiran at ning mua.

⁵⁰Oneng anak ko, maging tapat kayu king Kautusan at makasadiang mate king pamagdipensa yu king kasunduan na ning Dios karing makatua yu.

⁵¹Ganakan yu ing depat da ring makatua yu at nung nu anti karagul ing arapat da. Tukian yu ing alimbawa ra, at miyablasanan kayung maragul a ligaya at alang anggang kabantugan.

⁵²E wari meyakit yang tapat i Abraham inyang mesubuk ya, at uli na nita metula ya ing Dios at kilala ne bilang taung matulid?

⁵³King panaun na ning kaligaligan nang Jose pemintuan na la ding kautusan na ning Dios at meging pamuntuk ya Ehipto.

⁵⁴Ing kekatang makatuang i Fineas, uli na ning milalablab nang katapatan, miyabie ing pangakung manatili ya king pangapari ing lahi na.

⁵⁵Meging ukum ya i Josue uli na ning katapatan na king Kautusan.

⁵⁶Kabalik na minie yang masanting a ulat i Caleb king kapulungan at mirinan yang dake king gabun bilang kayablasan na.

⁵⁷Uli na ning ala nang kupas a katapatan king Dios meging ari ya i David, at miyabie ya ing pangaku kang David king ding lahi na manatili lang ari.

⁵⁸Uli na ning katapatan na king Kautusan midala ya banua i Elias.

⁵⁹Uli na ning atin lang kasalpantayanan, miligtas la king api di Hananias, Azaria, at i Misael.

⁶⁰Uli na ning kalinisan na pusu linigtas ne ning Ginu i Daniel king kamatayan karing leon.

⁶¹Inya lumawe kayu karing mituki-tuking lahi, karing taung binili ra ing kapanaligan da king Dios king kapilan man e la magkulang a sikanan.

⁶²E yu la pitatakutan ding amanu na ning taung makasalanan. Ganakan yu king kamate na muli mu king dinat a mabuluk at ulad ing tagumpe na.

⁶³Ngeni parangalan de, oneng bukas ala neng bakas man uling mibalik ya king alikabuk at mewala ngan ing sablang tingka na.

⁶⁴Oneng anak ko, maging matapang kayu sana at matatag king pamagdipensa yu king Kautusan uling king kapamilatan na ning Kautusan mika maragul kayung dangalan.

⁶⁵Balu ku king ing kapatad yung i Simon biasa ya king pamamie kausukan; makiramdam kayu at kilalanan ye i Simon bilang matua yu.

⁶⁶Manibat king kayanakan na masikan ya at matapang i Judas Macabeo. Gawan yeng pamuntuk yu king pamakilaban yu karing kalaban.

⁶⁷Agkatan yu lang makiabe kekayu ding sablang mapamintu king Kautusan at yablas yu ing e mayap a depat da karing kabalen yu.

⁶⁸Ablasan yu la ding paganu king sablang gewa ra kekayu, at maralas yung tutuparan ing aduan ning Kautusan.

⁶⁹Kaybat binie nang Matatias ing bendisyun na at mete ya.

⁷⁰Mete ya king banuang dinalan at apat apulu't anam[8] at melungkut la ding sablang memalen na ning Israel. Mikutkut ya king kutkutan ding pamilya na karin Modein.