Read Kapampangan 1 Macabeo 3 Bible Online

1 Macabeo 3 - Kapampangan bible

1 Macabeo 3

¹Inalilan neng Judas Macabeo i Matatias a tata na king pamanimuna na.

²Ding sabla nang kapatad at tapat a talatuki nang tata na binie da ngan ing kasaupan da kang Judas Macabeo, at matula rang sindu ing pamakilaban ning Israel.

³Binie nang Judas ing mas maragul a ligaya karing memalen na. Anting higanti sinulud ne ing baluti na; misulud ya karing sandata ning pamakilaban. Misalasalisi la ding labanan a inarapan na; kayabe na pigdipensa na la king sarili nang espada.

⁴Anti yang matapang a leon gagaleung yang daratang king labanan.

⁵Penintun na la at selugsugan ding e mamintu king Kautusan, at silaban ding sablang liligalig karela.

⁶Mangapaurung la king takut ding e mamintu king Kautusan; mangalgal la king takut da ring sablang e mayap a dapat; migtagumpe ing pamagligtas king pamanimuna na.

⁷Pepamua na la ding aring dakal, oneng tula naman ing miras karing memalen ning Israel. Purian mi yang alang angga uli ning depat na.

⁸Liban na la ding siudad ning Juda; gisan na la ding taung alang Dios. Makanyan nang tinabi king Israel ing mua a tune kabagsik.

⁹Mibantug ya angga na king wakas ning yatu, ikua na lang apisanmetung memalen a makabingit king kamatayan.

¹⁰Tinipun na lang Apolonio ding paganu at ding dakal a sundalus a ibat Samaria ban labanan ne ing Israel.

¹¹Kabud abalu nang Judas iti, seganan ne at simbut ne ampon pete. Dakal la ding mete karing paganu at tinakas la ding mitagan.

¹²Inyang tinipun da ing asamsam da kaybat ning labanan, kinua neng Judas ing espada nang Apolonio at iti ya ing ginamit na king pamakilaban king kekaban na ning bie na.

¹³Abalitan nang Seron, ing pekapun da ring sundalus ning Siria, king tinipun na lang Judas ding dakal a sundalus na a tapat at makasadia lang lumaban lalam ning pamanimuna na.

¹⁴Nganang Seron king lub na, Gawa kung lagyu para king sarili ku at maniambut karangalan para king kayarian. Labanan ke i Judas at ding kayabe na a linaban king inutus na ning ari.

¹⁵Pasibayu, mekiabe ya kang Seron ing metung a maragul a grupu ding Judiong ginulut karing kautusan da ban saupan deng mablas king Israel.

¹⁶Inyang malapit ne king pidadalanan ning Bet Horon selubungan neng Judas at ding mapilan a lalaki.

¹⁷Ngara kang Judas inyang ikit da ring kayabe na king dakal la ding daratang a sundalus, Ditak tamu mu. Makananu tamung lumaban kareng dakal a ren? Mangaina kami pa uling e ke mengan kilub ning patingapun.

¹⁸Nganang mekibat Judas, E masakit karing ditak ing sambutan da la ring dakal, uling alang pamiyaliwa king Ginu ing magligtas ya king kapamilatan ding dakal o ding ditak.

¹⁹Alayu king bilang ing tagumpe, bukud mung manibat king Ginu ing sikanan.

²⁰Daratang la ding kalaban tamu king maragul a bigsikan; buri da katamung panakawanan at pamaten ding asawa tamu at anak;

²¹oneng ing pakilaban ya ing kekatamung bie at relihiun.

²²Lasawan na la mismu ning Ginu king arapan tamu. Inya e kayu sukat mitatakutan karela.

²³Kayari nang migsalitang Judas, ya at ding sundalus na bigla reng lisuban i Seron ding sundalus na at simbut da la.

²⁴Tegalan deng pababa ketang Pidadalanan ning Bet Horon angga na king kapatagan. Apate da la ring walung dalan at tinakas la ding aliwa king bansa da ring Filisteo.

²⁵Manibat na kanita megumpisa lang mika takut ding paganu kang Judas at karing kapatad na.

²⁶Miras ing kabantugan na kang Aring Antiocus, at pisasabian de ring memalen ding sablang bansa i Judas at ding tagumpe na.

²⁷Mimua ya ing Aring Antiocus inyang abalitan na ing milyari. Mitubud ya at pepatipun na la ding sablang sundalus na ning kayarian ban piyabayan ing sikanan da.

²⁸Manibat king silid-pibandian beyaranan na lang pabanuang sueldu ring sundalus, at minie yang utus king magsadia la king nanumang oras a kailangan la.

²⁹Oneng ikit na kanita king magigisan ya laman ing silid-pibandian. At ditak mu ing lulub a buis uli na ning kaguluan at kagutgutan king yatu inyang leko na la ding kautusan a mimiral manibat na king minunang panaun.

³⁰Antimo ing milyari na e mu misan king migaganaka ya ngeni ing ari a magkulang yang salaping pamayad na para king karaniwan a pigastusan at para karing regalung penugalian nang pamie maygit king kenu man karing inalilan na king tronu.

³¹Megulu ya isip, oneng king katataulian inari na king lub na king munta ya Persia, at kuanan na la ding buis karing probinsia karin, at tumipun ya at isadia na la ding dakal a salapi.

³²Likuan ne bilang kayalili na i Lisias, ing metung a pikabaluan a tau at lahing ari ban mamahala king kayarian manibat king Ilug ning Eufrates angga na king angganan ning Ehipto.

³³Tilduan nia namang talaingat king anak na, i Antiocus, ing Kalima, angga king pamagbalik na.

³⁴Likuan na la kang Lisias ding kapitna karing sundalus na at ding elepante, at milakuan yang bilin king sablang buri nang marapat lalu na karing manuknangan Juda at Jerusalem.

³⁵Laban kareti, kailangan yang paralang sundalus i Lisias ban gisanan na la at siran ing upaya ning Israel pati na ding mitagan king Jerusalem ban ala nang mitagan nanumang tanda karela.

³⁶Kuanan na ing gabun da, at pipartian-partian na karing dayuan ban karin la manuknangan.

³⁷Kaybat, kayabe ding kapitna karing sundalus na, miglakbe ya ing ari papunta Antiokia, ing kabisera na, king banuang dinalan apat apulu't pitu.[9] Delakitan ne ing Ilug ning Eufrates at migmartsa king Mesopotamia.

³⁸Pinili neng Lisias i Tolomeo a anak nang Dorymenes, i Nicanor, at i Gorgias ban maging pamuntuk ding sundalus na. Tau lang masikanan deting atlu at kabilang la karing Kakaluguran na ning Ari.

³⁹Binili na lang manimuna karing apat apulung libung sundalus a maglakad at pitung libung sundalus a pakakabayu, at inutus na lang luban de at lasawan ing Juda, antimo ing inutus ning ari.

⁴⁰Miglakbe la deting pekapun a kayabe ding dakal dang sundalus at migkampu la karas da king kapatagan malapit Emmaus.

⁴¹Atin munamang dakal a sundalus a ibat Idumea[10] at Filistia a mekiabe karela. Inyang abalitan da ring mangalakal king lugal a ita ing puersa ding sundalus, dinatang lang magdalang tanikala at dakal a salapi king kampu; bisa lang saling mapilan a Judio a gawan dang ipus.

⁴²Ikit da ri Judas at ding kapatad na king sasakit ing kabilian da, at ding sundalung dayuan makakampu la kilub ning bansa da. Abalitan da naman king inutus na ning ari ing lubus da lang gisanan paten.

⁴³Inya inari da king lub da ing italakad de ing melasak dang bansa at ipakilaban ya ing bansa ra at ing Templo.

⁴⁴Kanita mitipun la ding sablang memalen ban magsadia king pamakigera at ban manalangin at maniawad lunus at saup king Dios.

⁴⁵Ing Jerusalem melakuan yang alang tau; mengari ya king metung a ilang; karing memalen na alang daratang at ala munamang mamako. Selaula de ring dayuan ing banal a Templo, at migkampu la ding paganu king siudad a makakuta; mewala ing tula karing memalen ning Israel, e na la maramdam pa ding tigtigan ding plauta at alpa.

⁴⁶Uling atin yang lugal a pipanalanginan ing Mizpa, mitipun la ri Judas at ding tauan na at karin la minta.

⁴⁷Ketang aldong ita mig-ayunu la, misulud lang imalan a magaspang, biburan dang abu ing buntuk da, at ginabak ing imalan da.

⁴⁸King anti kaniting kabilian mangutang la ding paganu karing karelang idolo, oneng biklat de ring Israelita ing libru ning Kautusan ban abalu ra king Dios nung nanu ing sukat dang daptan.

⁴⁹Dela da la ring imalan a susulud da ring pari, ding ain da king mumunang pupul, at ding sikapulu, at tiki da la naman ding mapilan a Nazareo a mekaganap na king karelang panata.

⁵⁰Masikan lang menangis kukutang king Banua. Ngara, Ginu, nanu ing gawan mi kareting Nazareo? Nu mi la dalan?

⁵¹Lepastangan de at dinatan ing banal mung Templo, at kalungkutan at kamarinayan ing miras karing pari.

⁵²At ngeni, dinatang la at mitipun ding paganu ban luban da kami at paten. Balu mu ing paintungulan mi agpang king planu ra.

⁵³Makananu kaming makalaban karela nung e mu kami saupan.

⁵⁴Kanita tiniup da lang masikan ding karelang trumpeta at kinulisak lang masikan.

⁵⁵Kaybat na nita, gewa na lang Judas tia pulu, tia limang pulu, tia dinalan, at tia libu katau, at mibili yang manimuna ra king balang grupu.

⁵⁶At bilang kapamintuan king Kautusan, pepaulian na la ding sablang bayung kasal o ding manalakad bayung bale o mananaman karing ubasan, antimu rin ding tatakut.

⁵⁷Linakad na la kanita ring sundalus at migpuestu la dane mauli ning Emmaus.

⁵⁸Nganang Judas karela, Isadia yu ing sarili yu ban makilaban at magpakalalaki kayu. Kailangan ing makasadia kayu bukas abak a maranun ban labanan deting paganu a miyabe-abe laban kekatamu ban paten da katamu at lasakan ing Templo.

⁵⁹Mas mayap kekatamu ing mate tamung makilaban kesa king makatalakad tamung lalawan ing kasiran ning kekatamung bansa at ning kekatamung Templo.

⁶⁰Oneng matupad ing kaburian ning Ginu.