Read Kapampangan 1 Macabeo 5 Bible Online

1 Macabeo 5 - Kapampangan bible

1 Macabeo 5

¹Mimua lang e mu nanu ding makapadurut a paganu inyang abalitan da king mitalakad yang pasibayu ing altar at mitalaga ne ing Templo.

²Inari da king lub da ing gisanan da lang paten ding lahi nang Jacob a atyu libutad da, at megumpisa na ing pamakamate karing Judio.

³Uling ding lahi nang Esau a manuknangan king Idumea paniabatan da la ring Israelita, lisuban na lang Judas king Akrabattene. Pepagpa ne karela ing mabagsik at makarine pangasambut at kinua na ing bandi ra.

⁴Aganaka na naman ing e mayap dang tangka ding tau Baean a menatiling panganib karing memalen na ning Israel uling manenaya la karing dalan ba ra lang sabatan at paten ding Israelitang maglakbe.

⁵Kilung na la ding tau Baean karing karelang kuta at migpuestu la laban karela. Inari na king lub na ing gisanan na lang paten at silaban ne ing kuta pati na ding sablang taung atyu kilub na.

⁶Kaybat, minta ya Ammon nung nune akasalubung ing metung a maragul at mayupayang grupu da ring sundalus lalam nang pamanimunang Timoteo.

⁷Dakal a labanan ing piyarap da oneng king katataulian simbut na lang Judas.

⁸Mibalik ya Judea kaybat neng abihag ing Jazer at ding makapaligid a baryu.

⁹Mitipun la kanita ding paganu king Gilead ban lusuban da la at paten ding Israelitang manuknangan king bansa da. Oneng ikua rang menuknangan deti king kuta ning Datema

¹⁰at peparala re kang Judas at karing kapatad na ing makatuking sulat:

¹¹Miyabe-abe la ding paganung makapadurut kekami ban gisanan da kaming paten. Magsadia lang datang at sakupan ing kuta nung nu kami menuknangan. Atyu la lalam nang pamanimunang Timoteo.

¹²Datang na ko sanang agad at iligtas yu kami king gamat da uling dakal na la ding mete kekami.

¹³Pete da na la ding sablang lalaking Judio king lugal ning Tob, at tiki da lang bihag ding asawa ra at ding anak ra, at kinua ra ing pibandian da. Ating libu katau karing mewala bie karin.

¹⁴Kabang babasan de pa ing sulat dinatang la ding aliwang tubud a ibat Galilea. Gabak ing imalan a susulud da.

¹⁵Ngara, Miyabe-abe la ding memalen na ning Tolemaida, Tiro, at Sidon, at king mabilug a Galilea ban gisanan da kaming paten.

¹⁶Inyang dimdam da ri Judas at ding memalen ing sablang bageng iti, mitipun la king maragul a kapulungan ba rang pikayarian nung nanu ing sukat dang daptan ban asaupan da la ring kabalen dang daralan kasakitan uli na ning pamaglusub da karela ding kalaban.

¹⁷Nganang Judas kang Simon a kapatad na, Mamili kang tau mu at puntalan mu la at iligtas ding kalupa tamung Judio king Galilea; ing kapatad tamung Jonatan at aku munta kami Gilead.

¹⁸Likuan na lang Judas ding makatagan pa karing sundalus na ban idipensa ing Judea at binili na la ban mamahala karing memalen ding aduang talapanimuna, i Azaria at i Jose a anak nang Zacarias.

¹⁹Ngana karela, Lalakuan da kayung manibala keti, oneng e kayu lulual at makilaban karing paganu anggang e ke mekapagbalik.

²⁰Tinuki la kang Simon ding atlung libu katau king lakad na papunta king Galilea, at walu lang libu ding kang Judas para king lakad na papunta king Gilead.

²¹Linusub ya Galilea i Simon at kaybat ding dakal a labanan simbut na la ding paganu.

²²Penagal na la angga king pasbul dalan ning Tolemaida, at pete na la ding atlung libu karela at kinua na ing bandi ra.

²³Kaybat tiki na lang migbalik ding Judio a atyu Galilea at Arbatta at ding asawa ra at anak at pati na ing sablang pibandian da, at inuli na lang kayabe na Judea. Mika maragul a pamagsaya.

²⁴Samantala, lipatan da ne man ding mikapatad a Judas Macabeo at Jonatan ing Ilug ning Jordan, at atlung aldo lang miglakbe king disyerto.

²⁵Atagpuan da la ring tau Nabatea a mapayapang sinalubung karela at memalita king sablang milyari karing kalupa rang Judio king Gilead.

²⁶Belita ra king dakal la ding Judiong sinukul da Bozra at Bosor, king Alema at Caspo, Maked, at Karnaim; pawa lang pakakuta at mangaragul a balen deti.

²⁷Sinukul da la ring aliwa karing mangalati nang balen ning Gilead. Belita ra naman king magsadia la ding kalaban ban lusuban de king tutuking aldo ing kuta ding Judio; magnasa lang paten da la ding sablang Judio kilub namu ning patingapun.

²⁸Bigla yang minarap i Judas at ding sundalus na king ilang at lisuban de ing Bozra; abihag de ing balen at pete da la ring sablang lalaking atyu karin. Kinua ra ing pibandian da at silaban de.

²⁹Likuan de iti at kabukas lang linakad papunta king kuta ning Datema.

³⁰Inyang ganingaldo na, i Judas at ding tauan na ikit da la ding maragul a grupung sundalus a lulusub king kuta; magdala lang eran at gamit pangubkub ban akua re at sambutan iting kuta.

³¹Inyang dimdam nang Judas ing inge, ing kulisak, ing siwala ding trumpeta ibat kilub ning siudad, balu na ing megumpisa na ing labanan.

³²Inya ngana karing tauan na, Makilaban kayu ngening aldong iti para karing kalupa tamung Judio!

³³Inutus na karing tauan na ing lumakad la king atlung grupu at lusuban da la ring kalaban manibat king kagulutan da. Kabang lalakad lang palapit, tutiupan da la ring trumpeta at manalangin lang masikan.

³⁴Inyang ikit de ring sundalus a panimunan nang Timoteo i Judas Macabeo, ginulut la at tinakas. Maragul a pangasambut ing pigpa nang Judas karela at king aldong ita pete na la ding ating walung libung sundalung kalaban.

³⁵Kaybat minta ya at lisuban ne ing Alema.[12] Abihag ne iting balen at pete ding sablang lalaki karin. Kinua na ing pibandian karin at kaybat silaban ne.

³⁶Manibat karin minta ya at abihag ne ing Caspo, Maked, Bosor, at ding aliwa pang balen ning Gilead.

³⁷Kaybat na nita, tinipun yang pasibayung dakal a sundalus i Timoteo at migkampu la sumangid na ning Rafon, ing sumangid ning ilug.

³⁸Tinubud na lang Judas ding mapilan a lalaki ban manmanan de ing kampu, at minie lang ulat king mekiabe la kang Timoteo ding sablang paganu king lugal a ita, at mekatatag lang dakal a sundalus.

³⁹Kinangwa ya naman karing makiupang sundalus a Arabo ban sumaup, at migkampu la deti king sumangid ning ilug at makasadia lang lumusub kang Judas. Inya linual ya i Judas ban arapan na la king labanan.

⁴⁰Kabang papalapit ya king danuman i Judas at ding sundalus na, nganang Timoteo karing opisyal na, Nung alang tuknang ing paniatang na at muna yang makadalakit king ilug, e ta ya apigil king pamaglusub na, siguradung sambutan na katamu.

⁴¹Nung tumakut ya at tuknang sumangid ning ilug, dalakit tamu at lusuban ta ya at sambutan ta ya.

⁴²Karas nang Judas king pampang ning ilug, minie yang utus karing opisyal na king ala lang paburen tutuknang nune sumulung la king labanan.

⁴³Minuna yang dinalakit king ilug i Judas at tikian de ring sundalus na. Apigil da la ring kalaban. Misalbag la ding paganung kalaban king arapan da; pemalugse da la ring armas da, at sinalikut la king templo da ring paganu king Karnaim.

⁴⁴Binihag neng Judas at ding tauan na ing siudad at silaban de ing templo at pati na ding sablang taung atyu karin. Lubus ing pangabihag ning Karnaim at e na la mekalaban pa kang Judas.

⁴⁵Kaybat na nita, tinipun na lang Judas ding sablang Judio king Gilead ban ituki na lang magbalik Judea. Meging metung yang maragul a grupu a miyayaliwa na uring tau a kayabe da ring asawa ra at anak at ing sablang pibandian da.

⁴⁶Linakad la angga king Efron. Iti metung yang maragul at matibe siudad. E na man malyari ing durutan de misusumangid; ing bukud mung malyaring dalanan ya ing dumalan kilub ning siudad.

⁴⁷Oneng ding tau karin e da la buring padalanan at sebatan da la ring pasbul dalan ning balen karing mangaragul a batu.

⁴⁸Kanita i Judas peparala yang sulat a makisabing mayap. Ngana, Paintulutan yu kaming dumalan king bansa yu. Alang numanu balang kekayu; dumalan kami mu. Oneng e de pa mu rin biklat ing pasbul.

⁴⁹Inya sinabi nang Judas karing sabla, subali mu karing sundalus a makilaban, ing magkampu la pa mu nung nu la karin.

⁵⁰Tinanggap lang utus ding sundalus king magpuestu la at lusuban de ing balen. Patingapun at kabukas deng lulusuban. E re tiknangan anggang e re ikua.

⁵¹Pepapate na lang Judas ding sablang lalaki ning Efron, kinua ra ing pibandian da, at pinatag de king gabun ing balen. Kaybat linabas la babo da ring bangke da ring mete.

⁵²Delakitan de ing Jordan papunta king malualas a kapatagan sumangid ning Bet San.

⁵³King kekaban ning pamaglakad da, ala yang patugut mandakap i Judas karetang mekatakas karing kalaban kabang pasiknangan na la lub ding memalen king kekaban na ning dalan anggang e la miras king gabun ning Judea.

⁵⁴King mitmung tula at kapasalamatan minukiat la king Bunduk ning Zion. Minie lang ain-a-durulukan uli na ning mapayapa rang pamagbalik at e la kewalan agyang metung mung tau.

⁵⁵Kabang atyu la Gilead di Judas at Jonatan, ing kapatad da namang i Simon lulusuban na ne ing Tolemaida king Galilea,

⁵⁶ding aduang pekapun, i Jose a anak nang Zacarias at i Azaria, abalitan da ing tepangan da at ing tagumpe da king labanan.

⁵⁷Ngarang misabi, Munta katang makilaban karing paganung makapadurut kekatamu at gawa kata munamang lagyu para kekata.

⁵⁸Inya ila at ding tauan da lisuban de ing Jamnia.

⁵⁹Selubungan na lang Gorgias at ding tauan na king labanan.

⁶⁰Maragul ing pangasambut nang Jose at Azaria, at penagal da la angga king angganan ning Judea. Ating manga aduang libung Israelita a mete king aldong ita.

⁶¹Iting maragul a pangasambut milyari uling ding Judiong pekapun bisa lang maging bayani at e la memintu kang Judas at karing kapatad na.

⁶²Subali pa kaniti, e la kayabe king pamilya da ring Macabeo a pinili na ning Dios ban magdalang kalayaan[13] karing memalen na ning Israel.

⁶³Oneng i Judas Macabeo at ding kapatad na kilala da la at ginalang ding sablang Israelita at ding sablang paganu nu man karin mibabalita ing kabantugan da,

⁶⁴at mititipun la deng tau ban purian da la.

⁶⁵Kaybat na nita, minta ya i Judas at ding kapatad na ban makilaban karing Edomita king dane mauli. Lisuban ne ing Hebron at ding makapadurut nang balen niti; lesak na la ding pader at silaban ding kuta a makapadurut.

⁶⁶Kaybat lisuban ne ing bansa ding Filisteo at delanan ne ing Marisa.[14]

⁶⁷King aldong ita ating mapilan a paring mete uling bisa lang maging bayani, oneng metung a kamangmangan ing depat dang pamakiabe king labanan.

⁶⁸Inarapan neng Judas ing Asdod king Filistia. Lesakan na la ding altar, silaban na la ding larawan da ring kikilalanan dang dios, dela ra ing kinua rang pibandian karing balen da, at kaybat mibalik la Judea.