Read Kapampangan 2 Macabeo 1 Bible Online

2 Macabeo 1 - Kapampangan bible

2 Macabeo 1

¹Ibat ya iting sulat karing Judiong atyu Jerusalem at Judea, at miparala ya karing kapatad dang atyu Ehipto. Kukomustan da kayu.

²Mananu na sanang dinan na kayung kapayapan at bendisyun ning Dios, at ganakan ne ing kasunduan na kang Abraham, Isaac, at Jacob, ding tapat nang talasuyu.

³Ibie na sana kekayu ing kapagnasan samba king Dios at ing kalausan a lub tupad king mabilug yung pusu at kaladua king parasan na.

⁴Dinan na kayu sanang beluan a makaintindi king Kautusan na at karing tuntunan na. Dinan na kayu sanang kapayapan,

⁵pakibatan na la ding panalangin yu, patawaran ing kasalanan yu, at e na kayu lalakuan kapilan man king oras ning kaligaligan yu.

⁶Ikaming atyu keni Juda ipanalangin da kayu.

⁷King banuang dinalan anam apulu't siam,[1] inyang i Demetrio a Kadua ya ing ari ning Siria, silatanan da kayu tungkul king pamagligalig at kasakitan a dinatang kekami karing banuang kaybat nang mig-rebelding Jason at ding tauan na laban king Banal a Bansa at ning kayarian.

⁸Silaban neng Jason at ding tauan na ing pasbul dalan ning Templo at pete da la ring taung alang kasalanan. Menalangin kami kanita at pekibatan na kami. Minie kaming ain a animal at ain-a-binutil, sinindi mi la ding sulu, at lege ding sagradung tinape.

⁹Inya pagselebran ye ing Piesta da ring Dalungdung king bulan ning Kislev.[2] Misulat ya iting sulat king banuang dinalan walung pulu't walu.[3]

¹⁰Ibat ya iting sulat karing Judiong atyu Jerusalem at Judea, king Senado da ring Judio, at kang Judas. Para kang Aristobulus ya, ing talaturu nang Aring Tolomeo at lahi da ring pekapun pari, at para karing Judio ya a atyu king Ehipto. Kukomustan da kayu ngan at mananu na sanang alang masakit kekayu.

¹¹Pasalamatan mi ya ing Dios uling linigtas na kami king maragul a panganib. Anti kami karing lalaking makasadiang lumaban king ari,

¹²oneng ing Dios ya ing mitabi karing kalaban king banal a siudad.

¹³Kanitang minta ya Persia ing Aring Antiocus a kayabe ding dakal nang sundalus alang minisip king atin lang kasambut, oneng ikua da lang pete at pemirasu king templo ning kikilalanan dang diosa a i Nanea kapamilatan ning paralan a gewa da ring pari nang Nanea.

¹⁴Minta ya ing Aring Antiocus a kayabe da ring mapilan karing pagkatiwalan nang tagapayu ban pakasalan ne ing diosa, at kaybat kuanan ing dakal king pibandian ning templo antimong regalung pangkasal.

¹⁵Kaybat dang lege ding pari ing pibandian, ing ari at ding mapilan karing kayabe na linub la king templo ban kuanan da. Kalub nang Antiocus, sera da la ring pari ding pasbul,

¹⁶at manibat karing lihim a pidadalanan king kisami pemarongga da lang batu. Mibagsak ya ing ari; anti ya mong mituran king kildap. Pemirasu da la katawan at inatsa da la ring buntuk da karing taung atyu kilual.

¹⁷Pasalamatan ya ing Dios uling perusan na la deting taung e mayap a dapat. Pasalamatan ya king sablang bage.

¹⁸King kaduang pulu't lima nang aldo ning bulan ning Kislev pagselebran mi ya ing Piesta ning Pasibayung Pangatalaga ning Templo kabang pagselebran mi ing Piesta da ring Dalungdung. Inisip mi ing maulaga ing paganaka mi iti kekayu ban kanita ikayu munaman apagselebran ye iting piesta. King makanyan a paralan yu aganaka nung makananung linto ing api inyang miyain yang sakripisyu i Nehemias kaybat neng apatalakad ing Templo at ing altar.

¹⁹King panaun a inyang ding makatua mi darala da lang yugse Persia, ating mapilan a tapat a pari a king lihim kinangwang api king altar. Selikut da iti king metung a malanging talaga at king kasanting na pangasalikut alang menakit metung man.

²⁰Kalabas da ring dakal a banua, king panaun a tikda ning Dios, tinubud neng magbalik ning ari ning Persia i Nehemias. Tinubud na lang Nehemias ding lahi da ring paring misalikut king api ban kuanan de. Oneng belita ra king e la menakit api, nune marayuput a likidu.

²¹Inutusan na lang Nehemias ing kuma lang ditak at idala ra arap na. Inyang ing bage iyain da makasadia na, inutus na karing pari ing idilig da iting marayuput a likidu babo ding dutung, at karing bage atyu babo ra, at iti merapat.

²²Kaybat nang linabas ning mapilan a penandit, sinlag ya ing aldo a mipampan king biga at mikalabkab ing maragul a api king altar, at mengapamulala la ding sabla.

²³Kabang maduduluk ya ing ain, menalangin la ding pari at ding atyu karin. Penimunan na lang Jonatan, ing Pekapun ding Pari, at i Nehemias at ding memalen mekibat la.

²⁴Makanyan ya ing panalangin nang Nehemias: O Ginung Dios a linalang king heganaganang bage, makapagmulala ka, mayupaya ka, makatuliran, at malunusan. Ika ing bukud ari, ing bukud malam.

²⁵Ika ing bukud mung mapamie, ing bukud mung makatuliran, mayupaya, at alang angga, ing Talapagligtas ning Israel king sablang e mayap. Pinili mu la ding makatua mi ban maging sarili mung memalen.

²⁶Tanggapan mu ing ain-sakripisyu alang-alang karing sablang memalen ning Israel; bandi mu la, ingatan mu la at papagbanalan.

²⁷Tipunan mu la ding miyugse, gawan mu lang malaya detang me-ipus karing paganu, dinan mong kapaldanan detang lalatian da at pikakasaman; ipabalu mu karing paganu king ika ing kekaming Dios.

²⁸Parusan mu la ding lulupig kekami king uli ning karelang bigsikan at paburen mu lang dumalan kasakitan;

²⁹oneng italakad mu la ding kekang memalen king kekang banal a lugal, antimo ing sinabi nang Moises a kekang daptan.

³⁰Kaybat, migkanta lang himno ding pari.

³¹Inyang megisan na ing ain-sakripisyu, inutus nang Nehemias ing tipunan da ing mitagan a marayuput a likidu at pepatugtug na karing batung maragul.

³²Agad-agad mikalabkab ing api oneng mitdang dili na inyang meraig king sala ning api king altar.

³³Mikalat ing mengapalyari karing sablang lugal. Belita ra king ari ning Persia king menakit lang marayuput a likidu king lugal nung nukarin da selikut ding pari ing api ning altar bayu la miyugse, at king i Nehemias at ding kayabe na ginamit da ban silaban ing yayain da.

³⁴Inyang apatutuan na iting bage, kilungan ne ning ari ing lugal at gewa neng sagradu.

³⁵Ding tilduan nang talabante ning ari tinanggap lang dake king maragul a buis a tatanggapan ning ari uli na niting sagradung lugal.

³⁶Inaus neng neftar Nehemias at ding kayabe na ing marayuput a likidu a ing buri nang sabian pamaglinis, oneng ding mas dakal a tau ausan deng nafta.