Read Kapampangan 2 Macabeo 10 Bible Online

2 Macabeo 10 - Kapampangan bible

2 Macabeo 10

¹Lalam nang pamanimuna ning Ginu, i Judas Macabeo at ding tauan na ikua reng pasibayu ing Templo at ing siudad ning Jerusalem.

²Lesak da la ring altar a telakad da ring dayuan king plasa at ding aliwang lugal a pisasamban a telakad da.

³Pepalinis de ing Templo, agpang king kautusan, at mitalakad lang bayung altar. Kaybat kapamilatan na ning bayung api a ibat karing pikiskisan a batu miyain lang ain-sakripisyu king mumunang pamikatagun kilub ding aduang banua; dinuluk lang insenso, sinindi da la ring sulu, at lege ding sagradung tinape.

⁴Inyang arapat da na iti, migsakab la at menalangin king ing Ginu e na na sana paintulut pang miras pasibayu karela ing kapahamakan, bagkus nung mikasala lang pasibayu ya na mismu at ning lunus na ing mituntun karela at e na na la babie pa karing mabagsik at alang lunus a paganu.

⁵Melinis ya ing Templo king kaduang pulu at limang aldo ning bulan ning Kislev, itang mismung aldo at bulan inyang lepastanganan de ring paganu ing Templo.

⁶Miras walung aldo ing masayang pamagselebra da, kalupa ning Piesta da ring Dalungdung at aganaka da ring tau nung makananung kapilan pa mu pigselebran da ing Piesta da ring Dalungdung kabang mibiebie lang anting animal karing kabundukan at karing kueba.

⁷Oneng ngeni, pidaladala da la ring sanga da ring berding palma at tukud a pelamutian bulung ning yedra kabang magkanta lang kapasalamatan at kapurian king Dios a migtagumpe king pangalinis na ning mismung Templo na.

⁸Apikayari da ring sablang tau king ing mabilug a lahing Judio pagselebran ne iting piesta balang banua.

⁹Mepupus na ing panaun nang Antiocus Epifanes.

¹⁰Ngeni ibalita mi naman ing milyari king istoria ning anak nang i Antiocus Eupator, ing anak na ning alang Dios a katawan, at ding e mayap a binunga da ring pamakigera na.

¹¹Kalukluk na bilang ari tilduan ne i Lisias ban manibala king kapamahalan ning balen at maging gobernador heneral ne ning Cele-siria at Fenicia.

¹²Inalilan ne i Tolomeo Macron, ing minunang diling gobernador a mayap mekiutus karing Judio. Penimunan nang Tolomeo ing ibayu na ing e makatuliran a pamakiutus da karing Judio at pigsikapan na ing mapayapang pamakiutus na karela.

¹³Inya simbung de ring Kaluguran ning Ari kang Eupator at singkanan deng taksil uling likuan ne ing Cyprus a pigkatiwala na ning Aring Filometor ning Ehipto, at linipat ya kang Antiocus Epifanes. Migpakamate ya kapamilatan na ning pamaninum nang lasun uling e ra ne gagalangan ding tau.

¹⁴Inyang meging gobernador ne ning Idumea i Gorgias kinangwa yang sundalus a upahan at king balang oportunidad lulusuban na la ding Judio.

¹⁵E mu ita, ding tau Idumea a atyu karing masanting a kabilian a kuta ala da lang tuknang gigipitan ding Judio. Tinggap da la detang tinakas ibat Jerusalem at susundu ra ing labanan.

¹⁶Inya kaybat dang menalangin maniawad saup king Dios, i Judas Macabeo at ding tauan na lisuban da la ring kuta da ring tau Idumea.

¹⁷Simbut da la ring magdipensa king pader at abihag de ing kuta. Pete da la ring sablang ikit da; ating maygit o kumulang keng aduang pulung libu katau.

¹⁸Ating siam a libu karing kalaban a sinalikut karing aduang matibe kuta a ating dakal a gamit agyang lulusuban da la.

¹⁹Minta ya karing aliwang lugal i Judas nung nu ya mas kailangan, oneng likuan ne i Simon at i Jose kayabe nang Zaqueo at ding tauan na. Maragul-dagul ne ing puersa ban isundu ra ing pamangubkub.

²⁰Oneng matako lang salapi ding mapilan karing tauan nang Simon, at inyang dininan da lang dinalan apat apulung librang pilak, peintulutan da lang makatakas ding mapilan karing kalaban manibat karing kuta.

²¹Inyang abalitan nang Judas ing milyari, inaus na la ding manimuna karing sundalus na at singkanan na lang pisali da la ring kapatad da inyang peintulutan da lang maging malaya ding taung kalaban da.

²²Kaybat pete na la ding migtaksil at agad-agad na lang asupil ding aduang kuta.

²³Magtagumpe yang magtagumpe i Judas keng labanan, at king pamaglusub na karing aduang kuta pete na la ding maygit aduang pulung libu katau.

²⁴Kaybat nang mesambut Timoteo karing Judio, tinipun na la ding dakal a sundalus a upahan at sundalus a pakakabayung ibat Asia. Sinulung yang minta Judea ban akua neng bigla.

²⁵Kabang lalapit ya, menalangin ya i Judas at ding tauan na. Mibablas lang imalan a magaspang[13] at mipisik abu king buntuk da;

²⁶migsakab la karing balitang ning altar at inawad da king saupan na la sana ning Dios kapamilatan na ning pamakilaban na karing kalaban, antimo ing pengaku na king Kautusan na.

²⁷Kayari dang menalangin, kinua da la ring armas da, sinulung lang marayung bagya manibat king Jerusalem, at karas ning bengi tinuknang lang e na marayu karing kalaban.

²⁸Kabuklat ning masala miyarap la king labanan ding aduang puersa. Para king tagumpe da menalig la ding Judio king tepangan da at king kapanaligan da king Ginu, samantalang ding kalaban da menalig la king sarili dang bigsikan king pamakilaban.

²⁹King kalibudtan ning maigpit dang pamilaban, ding kalaban menakit lang limang masanting a lalaking pakasake kabayu a maki gintung renda at ila ding manimuna karing sundalung Judio.

³⁰Pedurutnan de reting limang lalaki i Judas at dipensa re karing baluti ra. Pepauranan da la ring kalaban karing paslu at kildap at duldul. Melitu la at metaranta ding kalaban at misambulat la.

³¹Pete da la ring aduang pulung libu limang dalan a sundalung e pakakabayu at anam a ralan a sundalung pakakabayu.

³²Tinakas ya i Timoteo king matatag a kuta king Gezer a panimunan ning kapatad nang i Kereas.

³³Kibkuban neng Judas at ding tauan na kilub ding apat a aldo.

³⁴Uling manalig la ding atyu kilub king kapanatagan ning karelang kabilian kukulisak da ing miyayaliwang makatakut a insultu karing Judio at king karelang Dios.

³⁵Itang abak a maranun ning kalimang aldo, mikalabkab ing mua da ring aduang pulu karing tauan nang Judas uli na ning pamaginsultu da ring kalaban. Matapang deng inukiatan ing pader at king maragul dang mua penabak da la ring balang akasalubung da.

³⁶Kayagnan na niti, minukiat la king pader ding aliwa king sumangid nang dake ning kuta at silaban da la ring tore. Dakal lang mete king silab kabang daragul. Lesak da ne man ding aliwang sundalus ing pasbul at pepaluban da la ring makatagan pa karing tauan nang Judas ban karela yang sakupan ing siudad.

³⁷Sinalikut ya i Timoteo kilub ning talaga, oneng pete reng kayabe na ing kapatad nang i Kereas at i Apollofanes.

³⁸Inyang yari na ing sabla, pigselebran de ring Judio ing tagumpe da kapamilatan na ning pamagkanta ra karing himno at kanta ning kapasalamatan king Ginu a pepakit maragul a ganaka at minie tagumpe karela.