Read Kapampangan 2 Macabeo 11 Bible Online

2 Macabeo 11 - Kapampangan bible

2 Macabeo 11

¹E meluat kaybat nang mesambut Timoteo, abalitan nang Lisias, ing guardia at kamaganak ning ari at manibala king kapamahalan ning balen, ing milyari. Mimua ya at

²penimunan na la ding walung pulung libung sundalus at ding sabla nang sundalus a pakakabayu laban karing Judio. Binalak na ing gawan neng siudad da ring Griego ing Jerusalem.

³Kalupa da ring pisasamban da ring paganu kailangan ya namang mamayad buis ing Templo at isubasta ya balang banua ing katungkulan ning Pekapun ding Pari.

⁴Bina yang metula i Lisias karing laksa-laksa nang sundalus, karing libu-libu nang sundalus a pakakabayu, at ding walung pulung elepante na. Inya e na na apakibalak ing upaya na ning Ginu.

⁵Liban ne ing Judea at lisuban ing kuta ning Betzur; manga atlung pulu at aduang kilometru ya king dane mauli ning Jerusalem.

⁶Inyang abalitan nang Judas at ding tauan na king kukubkuban na neng Lisias ing karelang kuta, kiniak la ding sablang memalen at tinulu luang meniawad saup king Ginu king parala yang mayap a anghel ban magligtas karela.

⁷Minuna yang diling kinangwang armas i Judas at inawad na karing aliwa ing makiabe lang itaya ing bie ra ban saupan da la ring kalupa rang Judio. Inya memalagua yang linage ing metung at metung ban sumaup.

⁸E la pa binang mirayu king Jerusalem inyang linto yang mumuna karela ing metung a makakabayung makaimalan maputi at maki gintung armas.

⁹Kanita king metung mung siwala pepasalamatan de ing mapaglunus dang Dios. Tutu rang penamdaman king matapang la at malyari da lang lusuban e mu ding tau nune agyang pang ding mabangis a animal at pati na pader a bakal.

¹⁰Dinatang lang paka-armas; kayabe de itang king lunus ning Ginu tinubud nang makilaban king panig da.

¹¹Kaybat, anti lang leon sinugud karing kalaban; pete da la ring labing metung a libung sundalus at libu anam a ralan a sundalung pakakabayu, at mepilitan lang memulayi ding aliwa ba lang miligtas.

¹²Sugatan la ding keraklan karing memulayi at mewala la armas. Ikua nang mitakas Lisias uling milayi yang anting metung a mataloti.

¹³E ne man mangmang i Lisias. Kabang pibulebulayan na ing pangasambut na akilala na king inya e na la sambutan ding Judio uling sasaupan na la ning Dios. Inya peparala yang mensahi karing Judio

¹⁴a managkat karela king mika metung la sanang makatuliran a pamikasundu layun mangakung agkatan ne pa ing ari ban makikaluguran ya karela.

¹⁵King kapakanan ding memalen, tenguanan na lang Judas Macabeo ding sablang mungkahi[14] nang Lisias, uling tinggap na la ning ari ding sablang mungkahing ibat king panig da ring Judio a pepayabut nang Judas Macabeo kang Lisias.

¹⁶Oyni ing kopia ning sulat nang Lisias karing Judio: I Lisias karing memalen Judio, komusta kayu?

¹⁷Binie de kanaku ding pekakatawan yung i Juan at i Absalom ing dokumentung peparala yu kanaku at inawad da kanaku king tanguanan ku ing makasulat karin.

¹⁸Pepabalu ku king ari ing nanumang bage a sukat nang abalu at binie ku ing nanumang atyu king upaya ku.

¹⁹Inya nung papanatilian yu ing mayap yung pilubluban king kayarian, pagkapilitan kung sikasuan ing kekayung kapakanan para king daratang a panaun.

²⁰Inutusan ku la ding pekakatawan yu at ding kanaku ban abalu yu ing sablang bage.

²¹Mipala kayu sana. Misulat ya iti king kaduang pulu at apat a aldo ning bulan ning Dioscorintio ning banuang dinalan apat apulu at walu.[15]

²²Oyni ing kopia ning sulat ning Ari: Ing Aring Antiocus king kakamal-kamalan a Lisias, komusta ka?

²³Ngening meko neng mekiabe karing dios i tatang ku, buri ku king ding atyu lalam ning kakung kayarian panimunan da ing sarili rang pamamalakad king bie ra a alang mangabala karela.

²⁴Abalitan mi king e ra atanggap ding Judio ing ugali da ring Griego antimo sana ing pagnasan nang tatang ku, oneng pinili ra ing sarili dang palakad keng bie at inawad da pa ing mipaintulutan lang tuki karing sarili dang kautusan.

²⁵Inya pinili mi king ing bansang iti kalupa da ring aliwa lakuan da lang alang mangabala karela, at yuyutus ku king isubli ya karela ing karelang Templo at mipaintulutan lang mibiebie agpang karing penugalian da ring karelang makatua.

²⁶Sana ipabalu mu karela ing bage at tanguanan mu. Ngeni balu da na ing kapagnasan tamu; mie na lang panatag at king katahimikan at pamahalan da ing sarili rang pamibiebie.

²⁷Oyni ing kopia ning sulat ning ari karing memalen Judio: Ing Aring Antiocus karing manimuna at karing Judio, komusta kayu?

²⁸Pagnasan ku ing masalese ngan sana ing kabilian yu. Atyu ku king masanting a kabilian.

²⁹Belita na kanakung Menelao ing kapagnasan yung magbalik karing pibalebale yu at lingunan ing sarili yung pamibiebie.

³⁰Inya detang muli na kekayu bayu miras ing atlung pulu yang aldo ing bulan ning Xanticus asahan da ing ala lang pitatakutan pa.

³¹Isundu yu ing pamanupad yu karing kautusan yu tungkul king pamangan at aliwa pang kautusan, antimo ing sadia yung daraptan. Alang Judiong miparusan king nanumang kasalanan a e na sasarian.

³²Tutubud ke i Menelao ban mika kapanatagan kayu.

³³Mipala kayu sana. Misulat ya iti inyang kalabing limang aldo na ning bulan ning Xanticus ning banuang dinalan apat apulu at walu.

³⁴Peparala ria naman ding tau Roma ing makatuking sulat karing Judio: Ding pekakatawan da ring tau Roma, i Quinto Memio at i Tito Manio karing Judio, komusta kayu?

³⁵Tatanguanan mi ing sablang binie na kekayung Lisias, ing kamaganak ning ari.

³⁶Papunta na kami Antiokia kanini, inya pakisabi ming mayap ing siasatan yu lang masalese ding bage likuan na para ikonsulta yu king ari at kaybat itubud ye ing ninuman ban makagawa kaming makayakmang munikala.

³⁷Inya mamirapal kayu sanang iparala ye ing tubud yu ba ming abalu ing kekayung pasya.

³⁸Masalese ko ngan sana kabilian. Misulat ya iti inyang kalabing lima nang aldo ning bulan ning Xanticus ning banuang dinalan apat apulu at walu.