Read Kapampangan 2 Macabeo 12 Bible Online

2 Macabeo 12 - Kapampangan bible

2 Macabeo 12

¹Kayari na ning pamikasundu rang kapayapan ding Judio at ding tau Siria, mibalik ya i Lisias king ari, at mibalik na la naman ding Judio king obra da king marangle.

²Oneng e da la buring mibiebie king kapayapan ding gobernador king lugal a ita antimo i Timoteo at i Apolonio a anak nang Genneo, i Jeronimo at i Demofon ampon i Nicanor, ing pamuntuk da ring upahan a sundalus a ibat Cyprus.

³Ilarawan ke ngeni kekayu ing karumaldumal a gewa da ring tau Jopa. Kinumbira da la ring Judiong manuknangan king balen da at ding asawa ra at anak ban sake karing bangka a sidia ra. Ala lang nanumang pepakilalang e mayap a kapagnasan karela.

⁴Anti na ning pikasunduan ning mabilug a memalen, at uli na ning bisa lang mibiebie payapa at ala lang isipan nanuman, mebisa la. Oneng inyang makalaut na la king dagat, ding tau Jopa pepalbug da la ring bangka at melumud la ding e kumulang king aduang dalan karela.

⁵Inyang abalitan nang Judas iting milyari karing kabalen na, sidia na la ding sundalus na.

⁶Menalangin la king Dios, ing ukum a e mangabiran, at lisuban da la ring mekamate. Silaban de ing sadsaran ning Jopa itang kabengian, silaban da la ring sablang bangka, at pete ding sablang ikit dang sasalikut karin.

⁷Minatras ya i Judas inyang ikit nang makasara la ding pasbul dalan. Makanyan man yari king lub na ing balikan na la king aliwang panaun at pamaten no ngan.

⁸Inyang abalitan na king maki pamalak la ding tau Jamnia king pamaten da la naman ding Judio king siudad da,

⁹lisuban ne ing Jamnia king kabengian at silaban ing sadsaran dang barku at ding barkung atyu karin. Ababatio ra ing api angga Jerusalem a ating apat apulu't walung kilometru karayu.

¹⁰Inyang atin na la mung manga aduang kilometru dayu di Judas at ding tauan na king Jamnia king pamaglakad da ban pakitagpuan king labanan i Timoteo, selakayan da la ring e kumulang king limang libung Arabo a maki kayabe limang dalan a sundalung pakakabayu.

¹¹Metung yang maigpitan a labanan ing merapat nung nukarin, king saup ning Dios, simbut da la deting tribu ning disyerto a mekisabing makikaluguran karing Judio at mengakung munie karing sese rang animal at sumaup karela king miyayaliwang paralan.

¹²Inisip nang Judas ing malyaring mika silbi la king dakal a paralan, inya mekikasundu yang mika kapayapan la. Kaybat na nita, mibalik la ding Arabo karing tolda ra.

¹³Lisuban nia namang Judas ing Caspin, ing metung a makakutang balen a makapadurut pader, at karin la manuknangan ding paganu a miyayaliwa na penibatan.

¹⁴Manalig la king sikanan ning pader da at king sapat dang pamangan agyang lumuat da la pang kukubkuban. Inya gewa deng pikaylian i Judas at ding tauan na; panagkasan da la at magsalita lang kalapastanganan king Dios da.

¹⁵Oneng menalangin la ding Judio king Mayupayang Dios ning meto yatu a linasak karing pader ning Jerico inyang panaun nang Josue a e man ginamit kasangkapan a pamusbus pader o kasangkapan a panglusub. Kaybat, king mitmung tapang lisuban de ing pader,

¹⁶at uling kaburian na ning Dios, abihag de ing balen. King karakal da pete ding Judio, ing makasiping a dagat-dagatan a maki lapad kapitnang kilometru, mig-itsura yang lalapo king daya.

¹⁷Manibat king balen ning Caspin, linakad la ding tauan nang Judas; ating dinalan limang pulu at aduang kilometru angga king Caraca nung nu la manuknangan ding Judio malapit king siudad ning Tob.

¹⁸E re ikit karin i Timoteo uling likuan na ne ing lugal a ita. Ala yang arapat karin nune mu ing lakuan ne ing metung a grupung sundalus.

¹⁹Lisuban de ring adua nang heneral Judas, i Dositeo at i Sosipatro, at pete da la ngan ding maygit apulung libung kalaban a makadistinu karin.

²⁰Kaybat pipitna-pitna neng Judas karing dakal a grupu ding sundalus na at tinuldu yang maging pamuntuk da ring balang grupu, at agad neng tikian i Timoteo a maki dinalan aduang pulung libung sundalus at aduang libu limang dalan a sundalung pakakabayu.

²¹Inyang abalitan nang Timoteo king malapit ne i Judas, pepapuntalan na la ding babai at anak pati na ing karga ra king metung a balen a ausan dang Karnaim. Lugal yang masakit pakirasan at masakit yang biglang luban uling makiput la ding sablang dalan a palub.

²²Inyang datang ya ing mumunang grupu, mikatmuan la king takut ding kalaban at mengataranta la ketang pepakit na nitang Metung a manakit king sabla-sabla.[16] Misisiglulu lang tinakas karing miyayaliwang direksyun, inya apanasakit da la ring mismung kayabe ra at metandus la pa ding aliwa karing espada na ning metung at metung.

²³Lalu da lang penagal di Judas at pete da la ring atlung pulung libu karing kalaban.

²⁴Abihag de mismu i Timoteo ding sundalus nang Dositeo at Sosipatro. Uli na ning mautak ya ikua na lang apapaniwalan, inya pepaburen deng tinakas. Sinabi na king ding keraklan karing makasukul pengari da la at kapatad, at paten da la nung ating malyari king bie na.

²⁵Katataulian, inyang pengaku nang ulit-ulit karela king ibalik na la deting bihag a e ninanu balang, pepalakuan de ban aligtas da la ring kamaganak da.

²⁶Kaybat, lisuban neng Judas ing siudad ning Karnaim, at ing templo ning kikilalanan dang diosang i Atargatis, at pete da la karin ding aduang pulu at limang libu katau.

²⁷Kaybat neng ganap lesakan ing siudad at ing templo lisuban ne ing Efron, ing siudad a makakuta at nung nu ya manuknangan i Lisias[17] at ding taung ibat king miyayaliwang bansa. Tinalakad la kilual ning pader ding masikan a kayanakan at matapang lang mekilaban, samantalang makatambak kilub ning siudad ing dakal a gamit panggera at armas.

²⁸Oneng menalangin lang miniawad saup ding Judio king Ginu a mibabagsak king sikanan ding kalaban na. Inya ikua de ing siudad at pete da la ring ating aduang pulu at limang libu karing magdipensa na ning Karnaim.

²⁹Kaybat da karin, memirapal lang minta king siudad ning Bet Shan,[18] dinalan at aduang pulung kilometru ya karayu dane nang norti ning Jerusalem.

³⁰Pemalita da ring Judio karin king maganaka la karela ding tau karin lalu na neng panaun na ning kasakitan.

³¹Inya pepasalamatan na la ding memalen at penabilin na karela king isundu ra ing mayap dang pamakiutus karing Judio karing daratang a panaun. Ikua rang mekapagbalik king panaun para king Piesta ning Pamamupul.

³²Kaybat ning pamagselebra ra king Pentecoste[19] (antimo ing yaus da king Griego king Piesta ning Pamamupul) sinulung ya i Judas at ding tauan na ban lusuban de i Gorgias, ing gobernador ning Idumea

³³a maki atlung libung sundalus a e pakakabayu at apat a ralan a sundalung pakakabayu.

³⁴Inyang miyarap la king labanan ating mapilan a Judiong mete.

³⁵Kanita ing metung a Judio ning siudad ning Tob, i Dositeo, ing metung a masikan a sundalung makakabayu, sigmit ne king balabal na i Gorgias at keladkad ne king mabilug nang sikanan; pagnasan neng dakpan ban akua neng mabie iting alang silbing tau. Oneng ing metung a sundalung makakabayu a tau Tracia tinagal ya at pinutut ne takde i Dositeo, inya ikua nang mekatakas Gorgias king siudad ning Marisa.

³⁶Samantala, i Esdrias at ding Judiong sundalus na mapagal na la uli na ning malambat da nang pamakilaban. Inya menalangin ya i Judas king ipakit na sana ning Ginu king makapanig ya karela at ya ing manimuna karing sundalus.

³⁷Kabang magkanta ya i Judas king amanu rang sisuan bilang senias ning pamakilaban ginawa lang biglang pamanialake ding Judio, at ikua ra lang apapulayan ding sundalus nang Gorgias.

³⁸Kaybat ning labanan tinipun na lang Judas ding sundalus na king balen ning Adullam. Miglinis la agpang king panugali ra uling daratang ne ing Aldo ning Sabbath, at menatili la karin king Aldo ning Sabbath.

³⁹Kabukasan, anti na ning kailangan na, minta la ban tipunan ding bangke da ring mete king labanan at ikutkut da la siping da ring makatua da king karelang kutkutan.

⁴⁰Oneng king lalam nang imalan ning balang metung karing mete menakit lang mangalating larawan da ring kikilalanan dang dios a sasamban da king Jamnia a babawal ning Kautusan kareng Judio. Malino karing sabla king iti ya ing sangkan nung inya mete la.

⁴¹Inya pepasalamatan da ing dapat ning Ginu, ing makatuliran a ukum a mibubulalag king makasalikut;

⁴²at king pamanalangin da inawad da king iti sanang pamikasala lubus sanang mipatawaran. Ing marangal a i Judas inaus na la kapanamdaman ding tau king pangilagan da ing kasalanan uling ikit da na karing sarili rang mata ing milyari karing mete king labanan uli na ning pamikasala ra.

⁴³Meniawad yang saup karing balang metung at peparala na la ding alagang apat a librang pilak king Jerusalem ban gamitan king ain para king pangapatawaran ning kasalanan. Gewa nang Judas iti uli na ning maniwala ya king ating pamanyubling mebie.

⁴⁴Uling nung e na paniwalan ing subli lang mie ding mete kamangmangan namu at kalabisan ing ipanalangin la pa ding mete.

⁴⁵Oneng uli na ning atyu king isip na ing makapagmulalang ablas a makapanaya karetang tapat nang memalen, ing parasan na mayap at banal, at ya ing sangkan nung inya miyain yang ain ban mayatbus la ding mete king karelang pamikasala.