Read Kapampangan 2 Macabeo 14 Bible Online

2 Macabeo 14 - Kapampangan bible

2 Macabeo 14

¹Kalabas ding atlung banua, abalitan nang Judas at ding tauan na king i Demetrio a anak nang Seleuco miras ya king sadsaran ning Tripoli; kayabe na la ding dakal a sundalus at barku.

²Mibalita king pete ne ing Aring Antiocus at ing guardia nang i Lisias, at sekupan ne ing mabilug a bansa.

³Ating lalaking milagyuan Alcimus a king misan a panaun meging Pekapun ding Pari, oneng king panaun ning pamag-rebeldi tinggap na king bie na ing pamibiebie da ring Griego. Inyang apibalak na king e ne malyaring pasibayung maging Pekapun ding Pari, at uli na ning takut nang panasakitan de ring Judio,

⁴minta ya kang Aring Demetrio ketang banuang dinalan limang pulu at metung[21] at binie ne king ari ing metung a koronang gintu at ing metung a sangang palma ampon sanga da ring olibo a ibat king Templo, oneng ala ne mang sinabi king balak na.

⁵Mika oportunidad yang ilantad na ing e mayap nang kapagnasan inyang payaus neng Aring Demetrio king pulung da ring tagapayu na, at kitnan ne nung nanu ing buri dang daptan ding Judio. Nganang Alcimo,

⁶Ing isipan da ring talatuki nang Judas Macabeo king ila tapat la king Dios at king balen; maburi la keng gera at alang tuknang da lang agkatan deng tau ban mag-rebeldi at e re dirinan katahimikan ing bansa.

⁷Inya, milako na kanaku ing mana kung dangalaning kakung panga Pekapun ding Pariatyu ku ngeni uli da ring aduang bage:

⁸mumuna, ing tune malasakit ku karing katuliran yu bilang ari; at kadua, alang-alang karing kabalen ku, anti na ning daralan yang maragul a kasakitan ing mabilug a lahi uli na ning alang mayap a pamisip ding taung binggitan ku na.

⁹Mumungkahi ku king Makamal a Ari king pagaralan yu la ding balang metung kareting bage at kaybat gawang planu para king kekaming bansa at karing memalen mi a magkakasakit, agpang king ganaka at mayap yung pilubluban para karing sabla.

¹⁰E ya mika kapayapan ing kayarian kabang mabie ya i Judas.

¹¹Kayari nang migsalitang Alcimus, semantalanan da ring aliwang tagapayu a maki mua kang Judas ing oportunidad, at lalu reng pepamua i Demetrio.

¹²Inya agad-agad neng tilduan ning Aring Demetrio i Nicanor, ing pekapun da ring pangkat da ring pakasake elepante, ban maging gobernador ning Judea at tinubud ne

¹³ban paten i Judas at isalbag la ding talatuki na, at gawan deng Pekapun ding Pari i Alcimus king pekamaragul a Templo ning yatu.

¹⁴Mekiabe lang agad kang Nicanor ding sablang dayuan king Judea a tinakas king paglusub nang Judas uli na ning pamisip dang pangasambut at kaguluan a dugpa karing Judio a siguradung makakayap para karela.

¹⁵Abalitan da ring Judio king lulusub ya i Nicanor at king kasaup na la ding dayuan king bansa ra. Pisikan dang alikabuk ing katawan da at menalangin la king karelang Dios a memili king bansa ra ban maging sarili nang bandi a king kapilan man e pa migkulang king pamaniaup na king panaun ning pamangailangan.

¹⁶Binie neng Judas, ing karelang pamuntuk, ing utus at agad na lang linakad ban arapan king labanan malapit king baryu ning Adasa.[22]

¹⁷Ing kapatad nang Judas, i Simon, lalabanan ne i Nicanor oneng tunggal ditak masasambut ya uli na ning e na asahan ing planu a gewa ning kalaban na.

¹⁸Makanyan man, inyang abalu nang Nicanor nung nu ya anti katapang i Judas at ding sundalus na king pamakilaban da para king bansa ra, pengilagan na ing malutas iting bage keng labanan.

¹⁹Inya tinubud ne i Posidonio at i Teodoto ampon i Matatias ban gawang pamikasundu karing Judio.

²⁰Kaybat da lang pisabi ding miyayaliwang dake ning pamikasundu, sinabi na lang Judas karing kayabe na at kumpormi la ngan.

²¹Mitakda lang aldo para mikit-ikit lang sarilinan ding manimuna. Ibat karing aduang panig lege da la ring gamitan a luklukan para king karelang pamisabi.

²²Makanyan man i Judas mibili yang tauan nang paka armas karing piling lugal; makasadia la king nanumang e asa-asahan a kataksilan ding kalaban. Maayus naman ing pamipagsalita da ring aduang manimuna.

²³Menatili ya pang mapilan a panaun Jerusalem i Nicanor at e ya linabag king kasunduan, at pepalakuan na la pa ding taung migpanig king lakad na.

²⁴Pekikuanan nang parati yang atyu siping na i Judas. Mikamaragul yang panlalawe kang Judas

²⁵at inamunan neng makiasawa at mika sariling pamilya na. Gewa nang Judas iti at mibiebie ya antimong karaniwan a memalen.

²⁶Inyang apansinan nang Alcimus ing pamikaluguran da ring adua, kinua ne ing kopia ning kasunduan da. Minta ya king Aring Demetrio at sinabi na king gagawa yang palakad i Nicanor a e mayap para king kapakanan ning kayarian inyang tilduan neng Kakaluguran ning Ari ing taksil a i Judas.

²⁷Mimua yang e mu nanu ing ari king alang katutuan a sumbung at king mua na sinulat ya kang Nicanor nung nu na sasabian king e ya matula king kasunduan, at inutus na ing dakpan ne i Judas at parala neng agad Antiokia.

²⁸Inyang miras ya kang Nicanor iting sulat melungkut ya at e na balu ing daptan na uling e na buri ing siran na ing pamikasundu na king taung tapat king pikayari da.

²⁹Uling imposibli naman ing payalang bahala na ing kautusan ning ari, inya megumpisa yang menintun oportunidad para arakap ne i Judas.

³⁰Apansinan nang Judas king dirimla ya i Nicanor king pamikaluguran da. Aintindian na king metung yang e mayap a palatandanan, inya tinipun na la ding marakal a bilang karing tauan na at sinalikut la kang Nicanor.

³¹Inyang akilala nang Nicanor king alamangan neng Judas ketang depat na, minta ya king maula at banal a Templo king oras a mamain la ding pari at inutus na ing isuku re i Judas.

³²Sinumpa la ding pari king alang makibalu karela nung nu ya karin ing taung kailangan da.

³³Inatiat neng Nicanor makaturu king Templo ing wanan nang gamat at nganang sinumpa, Subali mu nung e ye isuku kanaku i Judas, ipatag ke king gabun iting Templo, lasakan ke ing altar, at nung nu ya makatalakad karin ku mitalakad templo para kang Dionisio ban akit ning mabilug a yatu.

³⁴Kasabi da reting amanu meko ya. Oneng inatiat da la ring gamat ding pari at menalangin la king Dios, ing tapat a Talaingat ning bansa. Ngarang menalangin,

³⁵O Ginu, ala kang nanumang kailangan keting yatu, makanyan man tula mu ing mika Templo kang tuknangan keti kekami.

³⁶Ginu, ikang bukud mung banal, papanatilian me sanang malinis iting Templo a bayu pa mu melinis.

³⁷Siplung de kang Nicanor i Razis, ing metung karing manimuna na ning Jerusalem. Sasabian da king sinaup ya king miyayaliwang paralan karing kabalen na at tune lang matas a panlalawe king pangatau na, inya mekilala ya antimong Ibpa da ring Judio.

³⁸Karing mumuna nang aldo ning pamag-rebeldi, teya ne ing bie na para king Judaismo, at minarap ya king ukuman uli na niting katapatan na.

³⁹Ba nang apakilalang Nicanor nung nu anti karagul ing mua na kareng Judio tinubud na la ding limang dalan a sundalus ba reng dakpan i Razis.

⁴⁰Inisip na king tune rang panamdaman ding Judio ing pangarakap na niti.

⁴¹Malapit da nia mung akua ding sundalus ing tore nung nu ya karin i Razis. Pakikuanan da neng ibuklat ing pasbul na ning patyu at miyabie ne ing utus a silaban de ing pasbul. Ikit nang Razis king makapadurut la, inya inarap ne king sarili na ing espada na ban magpakamate.

⁴²Meyapan na pa ing mate yang marangal kesa king dumalan yang kamuran king gamat da ring kriminal.

⁴³King pamamirapal na at kagipitan ning panaun, sinala ya king pamanandus na king sarili na at e ya mete. Uli na ning ala lang patugut daratang king kuartu ding sundalus, memulayi ya king pader, at anting matapang a bayani bildug na ing sarili na karing dakal a tau.

⁴⁴Agad lang mekalisia ding tau at mebaldug ya ketang lugal a likuan da.

⁴⁵Mabie ya pa at uli na ning milalablab nang tepangan, tinalakad ya king sarili na, mamagus ing daya na karing sugat na, memulayi yang papunta karing tau. Katataulian, minukiat ya king matas a batu.

⁴⁶Agyamang metiktik ne king daya na, kinua na ing bituka na at karing adua nang gamat inatsa na karing tau. Kabang gagawan na iti, minaus ya king Ginu ning bie at pangisnawa king ibalik na lang pasibayu deting dake ning katawan na. Makanyan yang mete.