Read Kapampangan 2 Macabeo 3 Bible Online

2 Macabeo 3 - Kapampangan bible

2 Macabeo 3

¹Lubus ing kapayapan at kanawan king banal a siudad ning Jerusalem inyang i Onias ya ing Pekapun ding Pari. Maingat da lang pamintuan ding kautusan kanita uling tapat ya i Onias at kasaman na ing e mayap.

²Ginalang de ring ari ning Siria at Ehipto ing Templo at dininan deng mangamal a regalu,

³at agyang ing Aring Seleuco,[5] ing ari ning mabilug a Asia, ya ing babayad king gastus da ring ain king Templo ibat king sariling buis a likum na.

⁴Oneng ing metung a taung milagyuan Simon king tribu nang Bilga,[6] ing pekapun talapanibala ning Templo, mesambut ya king pamipagsalita na kang Onias tungkul karing tuntunan king palengki ning siudad.

⁵King panaun a ita, i Apolonio a anak nang Traseus ya ing gobernador ning Cele-siria at Fenicia. Pintalan neng Simon

⁶at sinabi na king dakal la ding salapi king kaban ning Templo at e la mabilang-bilang. Anti na ning e no man kailangan ding salapi para karing ain, mayap pa ing ibili la king lalam nang upaya ning ari.

⁷Inyang ikit neng Apolonio ing ari belita na nung nanu ing sinabi ra tungkul king pibandian na. Pinili ne ning ari i Heliodoro, ing pekapun da ring ministru na, ban kuanan na iti para king ari.

⁸Agad yang meko i Heliodoro, oneng sinabi na king gagawa ya mung pamaniasat karing siudad ning Cele-siria at Fenicia.

⁹Karas na Jerusalem at kaybat na ning masayang salubung a binie na ning Pekapun ding Pari kang Heliodoro, selita na ing tune nang sangkan ning pamagbisita na at kitang na nung tutu pin ing balitang tinggap na.

¹⁰Pepaintindi na ning Pekapun ding Pari king ding makadepositu king Pondu ning Templo para karen lang mebalu at ulila,

¹¹subali ketang dake a mangaintulid kang Hircano a anak nang Tobias, ing lalaking ating matas a katungkulan. Lilingad nang Simon ing katutuan keting bage. Sinabi na naman king ing kabilugan a alaga mamabut mung atlung pulung libung librang pilak at labing limang libung librang gintu.

¹²Ngana pa king masakit malyari king ing ninuman mipaintulutan yang kumang salapi da ring memalen a menalig king pangasagradu na at dangalan ning Templo a pikabaluan king mabilug a yatu.

¹³Oneng i Heliodoro a manalakaran king kautusan na ning ari, pinilit na king ding makadepositu sukat lang idala king pisisinupan pibandian ning kayarian.

¹⁴Inya mitakda yang aldo at minta ya king Templo ban panibalan na ing pangabilang da ring salapi. Inya mika maragul a kaligaligan king mabilug a siudad.

¹⁵Makasakab la king arap ning altar ding paring paka-abitu at inawad da king Dios ing ingatan na la sanang e matatagin ding salapi, anti na ning ya ing minie karing kautusan ban maingat la ding salaping dinepositu da ring memalen king Templo.

¹⁶Malungkut ya ing balang manakit king Pekapun ding Pari. Maputla ya lupa uli na ning sindak a daralanan ning kaladua na.

¹⁷Gagalgal ya king mabilug nang katawan at king istura na ing sakit a panamdaman na e makalingad karing manakit.

¹⁸Pupulayi lang daratang ibat karing bale da ring memalen ban makiabe karing makisabing mayap uli na ning kalapastangan a malapit nang dugpa king banal a lugal.

¹⁹Mitmu ya ing dalan karing babaing alang susulud nune mu paldang gewa king imalan a magaspang;[7] ding dalagang sadiang makakulung mu king bale memulayi la karing pasbul dalan o karing pader da ring bale ra, at ding aliwa pakalual la katawan babatio karing awang;

²⁰Makayatiat la ngan a gamat manigapu king Banua.

²¹Makalunus lang akakit ding maldang pakasakab a maliligalig a pilubluban ampon ing Pekapun ding Pari king makalunus nang itsura.

²²Samantalang mamaus la ding memalen king Ginung Mayupaya ban ingatan na la ding salaping makapanibala king kaingatan na,

²³sindu nang Heliodoro ing tangka na.

²⁴Itang penandit a ya at ding guardia na dinatang la king pisisinupan bandi ning Templo, ing Ginu ning sablang makapagmulalang upaya pepakit yang metung a vision ban kanita ding sablang mengangas linub kayabe nang Heliodoro mangatakutan la at mangaina la king takut king pagmumulalan a pepakit nang upaya ning Ginu.

²⁵Kaniting vision menakit lang kabayu at metung a makasake. Masanting ya panga-ayus ing kabayu at ing makasake; makapiblas yang gintu at makatakut ya itsura. Bigla yang sinugud kang Heliodoro ing kabayu at ginulut ya at pemaldak ne.

²⁶Atin ya namang ikit i Heliodoro a aduang masikan at masanting a kayanakan a lalaki; masanting la piblas. Atyu la king mingatba at alang lunus deng pemarug.

²⁷Malalagua yang milako male tau at mikera king gabun, at binili de ring tauan na king metung a pagkeran

²⁸at liwal de. Nandin pa mu iting lalaking abe ding dakal a tau at ding sablang guardia na, linub la ban lusuban de ing pisisinupan pibandian ning Templo, ngeni ala yang sikanan nanuman a pupusanan dang lulual. Inya lantaran daa ngang kilala ing mayupaya nang sikanan ning Dios.

²⁹Kabang makakera ya i Heliodoro at e makapagsalita at ala nang kapanayan kumayap pa uli na ning pepakit nang upaya ning Dios,

³⁰pupurian da ne man ding Judio ing Ginu uli na ning makapagmulalang pamagdipensa na king Templo a kapilan pa mu mitmu ya king kapigaganakan at kaguluan, ngeni maglapo ya king tula at saya.

³¹Inawad da ring mapilan karing kayabe nang Heliodoro kang Onias a Pekapun ding Pari ing manalangin ya sana king Kakataskatasan ban masagip ya bie ing taung makabingit na king kamatayan.

³²Inya minie yang ain-sakripisyu para sagipan ne ning Dios i Heliodoro, uling e na buri ing isipan na ning ari king ding Judio ilang makirapat king milyari king taung tinubud na.

³³Kabang mamie yang ain-sakripisyu i Onias, ding aduang kayanakan a lalaki a misusulud parehung imalan, antimo king sadia, pepakit la kang Heliodoro. Ngara, Pasalamat ka kang Onias, ing Pekapun ding Pari; linigtas na ka ning Ginu uli na.

³⁴Tandanan mu king ing Ginu ning banua ya ing memarusa keka. Ngeni mako na ka at sabian mu karing sabla ing maragul nang upaya. Kasabi ra, limbug la.

³⁵Minie yang ain-sakripisyu king Ginu i Heliodoro, at uling linigtas ne bie ning Ginu ginawa yang dakal a pangaku. Memun ya kang Onias at mibalik ya at ding sundalus na king ari.

³⁶Karin sinabi na karing tau ing milagrung gewa na ning Kakataskatasan a Dios a ikit ding sarili nang mata.

³⁷Inyang kutnan ne ning ari i Heliodoro nung nanu yang klasing tau ing masanting diling itubud Jerusalem keng tutuki, nganang mekibat:

³⁸Nung atin kayung kalaban o ating magtangkang laban king kekayung kapamahalan, ya ing itubud mu. Magbalik ya kekang mebarug, nung magbalik ya, uling ating makapagmulalang upayang ibat king Dios a magobra karin.

³⁹Babanten ne ning Dios ning Banua ing Templo; daragsa ne at papaten ing ninumang datang a e mayap a kapagnasan.

⁴⁰Ita ya ing istoria nang Heliodoro at ning pangaingat ning pibandian ning Templo.