Read Kapampangan 2 Macabeo 7 Bible Online

2 Macabeo 7 - Kapampangan bible

2 Macabeo 7

¹King aliwa namang situasyun dekap de ing metung a pengaring babaing Judio at ding pitu nang anak a lalaki. Pepabarug na la ning ari ban pilitan da lang mangan karning babi.

²Kanita migsalita ya ing metung karing anak na para karela ngan. Ngana, Nanu mo ing akua yu king gagawan yung yan? Makasadia kaming mate lugal king labag kami karing kautusan da ring makatua mi.

³Inya mimua ya ing ari at inutus na ing tamban da la ring maragul a kawa at kaldera anggang e la malare king pali,

⁴at agad merapat. Kanita sinabi na karing tauan na king pututan de dila itang migsalita, bakbakan de balat a buntuk, at pututan a gamat ampon bitis, kabang makalawe ya i ima na at ding anam nang kapatad.

⁵Inutus ning ari ing dalan de at pritu re king metung karing kawa iting ala nang kamasalesen a anak agyang mangisnawa ya pa. Kabang mitatas ing makapal a asuk a ibat king kawa ing ima at ding anak na pasiknangan ne lub ing metung at metung ban arapan ing kamatayan king mitmung dangalan. Ngara,

⁶Makalawe ya at balu na ning Ginung Dios ing daralanan tamung kasakitan. Pekamalino nang Moises iti inyang sinulat ne ing kanta a atulan na la detang ginulut king Ginu. Ngana, Malunus ya ing Ginu karing talasuyu na.

⁷Kaybat nang mete ning mumuna karing mikakapatad king makanyan a kabilian, ding sundalus megumpisa lang migkusuelu king kadua. Sepulyut da ing buak na pati na balat ning buntuk na. Kaybat ngara, Kanan me ining karning babi o buri mung tunggal-tunggal mi lang pututan ding gamat mu at bitis?

⁸Nganang mekibat king amanu nang sisuan, Kapilan man e ke kanan! Inya pepasakitan deng kalupa na ning gewa ra king minuna,

⁹oneng king tauli nang inawa ngana king ari, Ikayung berdugu! Malyaring paten yu kami oneng ing Ari ning mabilug a yatu biayan na kami ibat king kamatayan, at dinan na kaming bie alang angga uling pemintuan mi la ding kautusan na.

¹⁰Kaybat na nita, pegumpisan deng perusan ing katlu karing mikakapatad. Inyang utusan deng ilual ne ing dila na, agad-agad nang gewa iti. Kaybat matapang na lang inatiat ding gamat na

¹¹at masikan a lub nang sinabi, Binie na la kanaku deti ning Dios. Oneng Qmaygit lang maulaga kanaku ding kautusan na kesa karing gamat ku at balu ku king isubli na lang pasibayu ning Dios kanaku.

¹²Mengapamulala ya ing ari pati na detang kayabe na king katapangan na at kusang lub nang dumalan kasakitan.

¹³Kamate na, perusan dia naman ing kapat king anti kanita munamang mabangis a paralan,

¹⁴oneng ngana king tauli nang amanu, Matula kung mate king gamat yu, uling atin kaming katibayan biayan na kami ning Dios ibat king kamatayan. Oneng alang pamanyubling bie para keka Antiocus!

¹⁵Inyang kinua de ring sundalus ing kalimang anak at pegumpisan deng perusan;

¹⁶linawe neng maratna king mata ing ari at ngana, Atin kang upayang gawan mu ing buri mu kekami agyamang kalupa da ka namang ating kamatayan. E mu isipan king ing Dios gilutan na ne ing lahi mi.

¹⁷Manaya ka at akit mu nung makananung ing degulan nang upaya pasakitan na ka at ding lahi mu.

¹⁸Kanita kinua de ring sundalus ing kanam at bayu ya mepatad a pangisnawa ngana, E me lilinlangan ing sarili mu. Nung inya pagdusan mi la deting bage uli na ning sarili ming kasalanan; mikasala kami laban king kekeng Dios at dela mi iting karumaldumal a kabiguan king sarili mi.

¹⁹E mu isipan ing atakasan mu ing ibunga na keka ning pamaglaban mu king Dios.

²⁰Makapagmulala yang dili karela ing ima at karapatdapat yang makapasubaling lugal king kekatamung katandanan. Agyamang ikit na lang mete ding pitu nang anak kilub namu ning patingapun, makanyan man pibata nang mitmung tetagan uling binili na ing kapanaligan na king Ginu.

²¹King amanu rang sisuan, pepasiknangan na la lub ding anak na. Masikan ya lub agyamang babai ya uling atin yang kapanaligan king Dios. Pepasiknangan ne lub ing metung at metung karing anak na. Ngana karela,

²²Atyu kayu king sepupunan ku at e ku man balu nung makananu, uling aliwa aku ing minie bie at inawa kekayu at king pangayubug ning katawan yu.

²³Ing miyuyubug king tau ya ing Miglalang king meto yatu at ya ing mibalak king penibatan na ning sabla. Inya king lunus na ibalik na ing bie yu at inawa anti na ning linawe yu lang matas king sarili yung bie ding kautusan na.

²⁴Penamdaman nang Antiocus king gagawan neng pikaylian ning ima, inya gewa na ing sablang agyu na ban apapaniwalan ne ing bungsu karing mikakapatad ban kalinguan na na ing kaugalian da ring makatua da. Pengakuanan neng taimtim king e mu ing gawan neng mabandi at pikabaluan nune dinan ne pang katungkulan a maki upaya at mipamansagan yang Kakaluguran ning Ari, nung kalinguan na la ding karelang kaugalian.

²⁵Anti na ning e ne dirinan pansin ning anak a lalaki, inaus ne ning ari ing ima at inawad na king ima ing payuan ne ing anak na ban iligtas ing bie na.

²⁶Kaybat ning dakal nang pamanamuyut ning ari mebisa yang agkatan ne ing anak na.

²⁷Linele ya king anak at bilang tutul na king ari ngana king amanu rang sisuan, Anak ko, malunus ka kanaku. Dela ra kang siam a bulan king sepupunan ku; atlung banua da kang iningat, sinese da ka at peparagul angga na king idad mung yan.

²⁸Aduan ku keka anak, lawan me ing banua at yatu; lawan mu ing sablang atyu ken at ganakan mu king lelangan na ngan ning Dios yan ibat king ala, at king makanyan munamang paralan ya mikaka bie ing tau.

²⁹E me pitatakutan iting berdugu. Matula meng ibie ing bie mu at ipakilala mu ing karapatdapat ka karing kapatad mu, ban king lunus na ning Dios tanggapan da kang pasibayung kayabe ra king pamanyubling mebie.

³⁰Ya pa mung kayari nang migsalita inyang migsalita ya ing anak. Ngana, Ikayu ngan, nanu pang panayan yu? E ku pailalam karing kautusan ning ari. Ing pamintuan ku ya ing Kautusan a binie nang Moises karing makatua mi.

³¹At ika, Aring Antiocus a ginawa karing miyayaliwang paralan a katampalasanan karing Hebreo, e me atakasan ing gamat na ning Dios.

³²Magdusa kami uli da ring kasalanan mi,

³³at ban ituru na kami at disiplinan. Ing mabie ming Ginu mua ya king makuyad a panaun, makanyan man uling talasuyu na kami pa mu rin, patawaran na kami.

³⁴Ika ing pekamabangis at makasumaming bage a mebie. Inya e mu sa lilinlangan ing sarili mung mimisip king degulan mu kabang parusan mu la ding memalen ning Dios.

³⁵Alang paralan ban atakasan mu ing parusa king gamat na ning Dios a Mayupaya, ing manakit king sabla-sabla.

³⁶Migdusa la sinaguli ding kapatad ku uli na ning katapatan da king kasunduan ning Dios, oneng ngeni linub na la king bie alang angga. Oneng ika manabu ka king pamanatul na ning Dios at miparusan ka ketang mangaintulid king kekang kapalaluan.

³⁷Aku, kalupa da ring kapatad ku, susuku ke ing katawan ku at ing bie ku alang-alang karing kautusan da ring makatua mi. Aduan ku naman king Dios ing agad nang ipakit ing lunus na karing memalen na at pasakitan na ka angga king mapilit kang kilalanan mu king ya mu ing bukud Dios.

³⁸Mananu na sanang miyangganan na kanaku at karing kapatad ku ing makatuliran nang mua ning Dios.

³⁹Uli da reting amanung kalapastanganan laban king ari mikalabkab ya mua ing ari at lalu neng perusan maygit karing kapatad na.

⁴⁰Mete ya ing anak a maki lubus a tiwala king Ginu; agyang ditak mu e ne gilutan.

⁴¹Katataulian, pete re ing ima.

⁴²Dakal na ku selita tungkul karing Judiong pepasakitan da at pinilit mangan king bituka da ring animal a inain da.