Read Kapampangan Mateo 20 Bible Online

Mateo 20 - Kapampangan bible

Mateo 20

¹Ing Kayarian ning Banua kalupa ne ning metung a taung ating mulahan ubas. Linual ya inyang abak a maranun ban manintun a-upahan nang magobra king mulahan nang ubas.

²Kaybat dang mikasundu king upang metung a denaryung sueldung patingapun, pepapuntan na la king mulahan nang ubas.

³Linual yang pasibayu itang mag-a-alas nuebe na ning abak at minta ya king palengki, at disnan na la ding mapilan a taung talatalakad karin a alang daraptan.

⁴Ngana karela, Munta kayu namang makipagobra king mulahan kung ubas at dinan da kayung sapat a upa.

⁵At minta la karin. Pasibayu yang linual bandang kaugtuan aldo at bandang alas tres ibat meugtu, at makanyan munaman ing depat na.

⁶Linual yang pasibayu inyang malapit na mung alas singku at menakit yang aliwa pang taung pakatalakad karin. Baket sisiran ye ing patitingapun keti a ala kayung daraptan? nganang kinutang karela.

⁷Ngarang mekibat, Kasi pu alang mananggapan obra kekami. Nung makanyan, munta kayu at magobra munaman king mulahan kung ubas, ngana karela.

⁸Inyang mabengi na, ngana ning makibandi king katiwala na, Ausan mu na la deng magobra at bayaran mu la king karelang upa. Magumpisa ka karing tauling meyakua at itauli mu la ding minuna.

⁹Inyang linapit la ding meyakuang megobra itang gatpanapun, tinanggap lang metung a denaryu.

¹⁰Inyang linapit la ding minunang grupu isipan da king tanggap lang maygit; makanyan man tinanggap la namang metung a denaryu.

¹¹Inyang tinggap da la ring upa ra, migreklamu la king makibandi.

¹²Ngarang sinabi, Metung la mu pung oras megobra dening tauling mekipagobra, baket pekilupa yu la upa kekaming megobrang patingapun a mibata king pali na ning aldo?

¹³Ba, abe, ngana ning makibandi king metung, e ra ka piperhuisiuan. E wari mekipagkasundu kang mibayaran metung a denaryu?

¹⁴Tanggapan mu la ding upa mu at muli na ka. Buri keng upahan kalupa na ning upa mu ining tauling megobra.

¹⁵E ku wari arapat ing buri kung daptan karing salapi ko? Pota galang mangalalu ka mu uli na ning maganaka ko?

¹⁶Nganang memupus migsalitang Jesus, Makanyan lang maging mumuna ding tauli at maging tauli ding mumuna.

¹⁷Inyang paukiat ya Jerusalem i Jesus, kelilua na la ding labing aduang alagad at pekisabian na la kabang lalakad la.

¹⁸Ngana karela, Lawan yu, paukiat tamu Jerusalem at karin manabu ya ing Anak ning Tau karing gamat da ring pamuntuk da ring pari at karing talaturu ning Kautusan. Atulan deng mate

¹⁹at kaybat ibie re karing gamat da ring paganu,[47] at insultuan de at panasakitan at ipaku re king krus; at king katlung aldo subli yang mie.

²⁰Linapit ya kanita kang Jesus ing asawa nang Zebedeo; kayabe na la ding adua nang anak a lalaki. Uling atin yang buring aduan dinuku ya arapan na.

²¹Nanung buri mu? nganang kinutang Jesus. Nganang mekibat, Ipangaku yu sana king dening adua kung anak a lalaki lukluk la king banda yung wanan at kayli potang miras na ing Pamag-ari yu.

²²E yu balu ing aduan yu, nganang mekibat Jesus karing aduang anak a lalaki. Apibata yu kaya ing kasakitan a malapit ku nang pibatan?[48] Opu, apibata mi, ngarang mekibat.

²³Wa, ing kasakitan a pibatan ku, pibatan yu naman,[49] nganang Jesus karela, oneng ala yu kanaku ing mamili nung ninu ing lukluk king banda kung wanan o king banda kung kayli. Deti para kareta lang pagsadian nang Ibpa ku.

²⁴Inyang dimdam da iti ding apulung alagad, mimua la karing aduang mikapatad.

²⁵Inya pepalapitan na lang Jesus at ngana karela, Balu yu king ding mamuntukan karing tau paginu la karela, at ding sasakup karela pakilala ra ing karelang kayupayan.

²⁶Oneng e makanyan kekayu. Nung ing ninuman kekayu bisa yang maging marangal, sukat yang maging talasuyu da ring sabla.

²⁷At nung ing ninuman bisa yang mamuntukan, sukat yang maging talasuyu yu,

²⁸antimo ing Anak ning Tau e dinatang ban suyuan, nune ban sumuyu at iyain ing bie na ban mayatbus la ding dakal.

²⁹Kalako da Jerico, tikian de ring dakal a tau i Jesus.

³⁰Ating aduang taung bulag a makalukluk king lele ning dalan. Ngarang kinulait inyang dimdam dang lalabas ya i Jesus, Anak nang David! Malunus ka kekami!

³¹Ding dakal a tau sebianan da la at sinabi ra king e la masigla. Oneng lalu rang sikan ing kulait da. Ngara, Anak nang David! Malunus ka kekami!

³²Tinuknang ya i Jesus at inaus na la. Kitang na karela, Nanu ing buri yung daptan ku para kekayu?

³³Mekibat la, Buri mi pu ing manakit la ding mata mi!

³⁴Melunus ya karela i Jesus at tigkil na la ding mata ra; kanita mu rin menakit la at tinuki la kang Jesus.