Read Kapampangan Marcos 11 Bible Online

Marcos 11 - Kapampangan bible

Marcos 11

¹Inyang milalapit na la Jerusalem, malapit king balen ning Betfage at Betania, ababatiawan da ne ing Bunduk ding Olibo, pepaunan na lang Jesus ding adua karing alagad na.

²Ngana karela, Munta kayu king baryung arapan yu. Pangaras yu karin dasnan ye ing metung a biserung asno a makatali. Ala pang taung sinake kaniti. Kalagan ye at idala ye keni.

³Nung ating kutang kekayu, Baket kakalagan ye? sabian yu, Kailangan ne ning Ginu at pasubli nia naman agad keti.

⁴Minta la at disnan de ing metung a biserung asno king lele dalan; makatali ya king pasbul dalan. Samantalang kakalagan de,

⁵kitang da ring taung atyu karin, Nanu ing daraptan yu, obat kakalagan ye?

⁶Mekibat la antimo ing tiru nang Jesus karela at peintulutan da na lang mako ding tau.

⁷Dela re ing biserung asno kang Jesus. Timpak da la king asno ding karelang balabal at sinake ya i Jesus.

⁸Linantang da ring dakal a tau ing karelang balabal king dalan. Memakli lang sangang tanaman ding aliwa at binili da la king daralanan na.

⁹At ding taung mumuna at ding makatauli kang Jesus kukulisak da, Purian ya ing Dios! Bendisyunan ne sa ning Dios ing daratang king lagyu na ning Ginu!

¹⁰Bendisyunan ne sa ning Dios ing daratang nang kayarian David a tatang tamu! Hosanna king Kakataskatasan!

¹¹Linub ya Jerusalem i Jesus, at tinaglus ya kilub na ning Templo. Kaybat nang linawe ing sablang atyu karin, linual ya at ding labing adua at minta la Betania anti na ning mabibengi na.

¹²Kabukasan, samantalang lalakad lang ibat Betania, meranup ya i Jesus.

¹³King makarayu ikit ne ing metung a tanaman a higera, malabung ya. Lepitan ne ba nang lawan nung atin yang bunga. Inyang milapit ne, bulung mu ing ikit na, uling e ra pa panaun mamunga ding higera.

¹⁴Sinabi nang Jesus king tanaman a higera, Ala nang makapangan pa karing bunga mu! At dimdam da iti ding alagad.

¹⁵Inyang miras na la Jerusalem, linub ya king Templo i Jesus, at pegumpisan na lang tinabi ding mamisali ampon maniali kilub na ning Templo. Penuag na la ding lamesa da ring maglibe-salapi, at ding luklukan da ring magtindang pati-pati.

¹⁶At binawal neng dumalan kilub na ning Templo ing ninumang ating daralan.

¹⁷Tiru na la kanita ding tau. Ngana, Makasulat karing Kasulatan king sinabi na ning Dios, Ing bale ku mayaus yang bale pipanalanginan para karing sablang tau. Oneng gewa yeng pugad da ring mapanako!

¹⁸Dimdam da iti ding pamuntuk da ring pari at ding talaturu ning Kautusan. Inya megumpisa lang menintun paralan ban apapate re i Jesus. Tatakut la kang Jesus uling mangapamulala la ding dakal a tau king turu na.

¹⁹Inyang mabibengi na, meko nia naman Jerusalem i Jesus at ding alagad na.

²⁰Kabukasan ning abak a maranun, king paglakad da apansinan deng melangi ya ing tanaman a higera at pati ding uyat na.

²¹Aganaka nang Pedro ing mepalyari at ngana kang Jesus, Maestro, lawan mu, melangi ya ing tanaman a higerang piniumpa mu!

²²Nganang Jesus karela, Sukat kayung salpantaya king Dios.

²³Ing katutuan sasabian ku kekayu, nung sabian na ning ninumang king bunduk a ini, Malis ka at iyatsa mu ing sarili mu king dagat, at nung ala yang alinlangan king pusu na at paniwalan na king iti mapalyari, marapat para keya.

²⁴King uli na niti sasabian ku kekayu, nung manalangin kayu at aduan yu ing nanuman, panaligan yu king iti tinggap yu na, at ing sabla miyabie kekayu.

²⁵At neng tatalakad kayu ban manalangin, patawaran ye ing ninumang mikasala kekayu ban i Ibpa yung atyu banua patawaran na kayu naman. [

²⁶Nung e yu la patawaran ding mikasala kekayu, e na kayu naman patawaran ning Ibpa yung atyu banua.]

²⁷Migbalik na la naman Jerusalem. At kabang lalakad ya king Templo, lepitan de i Jesus ding pamuntuk da ring pari, ding talaturu ning Kautusan ampon ding makatua na ning balen.

²⁸Kitang da kang Jesus, Nanu ing kayupayan mung gawa karing bage deti? Ninu ing minie keka king kayupayan a yan?

²⁹Mekibat ya i Jesus, Kutnan da kayu naman at nung apakibatan yu ku, kanita ku sabian kekayu nung kenu ku ibat ing kayupayan dapat kareting bage.

³⁰Sabian yu kanaku nung kaninu menibatan ing kayupayan nang maminyag Juan: king Dios o king tau?

³¹At pisabisabi ra, Nung sabian tamung menibatan king Dios, sabian na kekatamu, Baket e ye peniwalan?

³²Sabian ta kayang Ibat king tau? (Tatakut la karing tau uling ding sabla kikilalanan deng propeta i Juan.)

³³Inya pekibat da kang Jesus, E mi balu. Sinabi nang Jesus karela, E ku naman sabian kekayu nung nanu ing kayupayan kung dapat kareting bage.