Read Kapampangan Lucas 1 Bible Online

Lucas 1 - Kapampangan bible

Lucas 1

¹Kagalang-galang a Teofilo, Dakal na la mu rin pu ding migkapilit sinulat istoria tungkul karing bage mepalyari libutad mi.

²Makayagpang ing karelang sinulat king sinabi da kekami ding mekasaksi at menaral kareting bage ibat na king kapupurmeruan.

³Kaybat kung inusisang mitmung kaingatan iting sablang bage, meyapan ku na naman pu ing sumulat metung a maayus a istoria para kekayu, Kagalang-galang a Teofilo.

⁴Depat ku iti ban abalu yung lubus ing katutuan da ring sablang bage a mituru na kekayu.

⁵Kanitang i Herodes ya ing ari na ning Judea, ating metung a pari a milagyuan Zacarias. Miembru ya king grupu da ring pari nang Abiya. Elizabeth ya lagyu ing asawa na[1] at iti ibat ya king lahi nang Aaron a pari.

⁶Mibiebie la deting miyasawa king mitmung kayapan king arapan na ning Dios. Mapamintu lang lubus karing kautusan at tuntunan a ibat king Ginu.

⁷Oneng e la mikayanak uling baug ya i Elizabeth at matua na lang parehu.

⁸Misan a aldo, ing grupu nang Zacarias ya ing makatutuk mangasiwa king Templo.

⁹Agpang king kaugalian a tutukian da ring pari, ya ing misuertian at mepiling duluk king insenso king altar. Inya linub ya king Templo ning Ginu,

¹⁰kabang ding dakal a taung atyu lual manalangin la king oras ning pamanduluk.

¹¹Kabud-abud pepakit ya kang Zacarias ing anghel na Ginu; makatalakad ya king banda nang wanan ning altar, king lugal nung nu ra durulukan ing insenso.

¹²Misdan ya i Zacarias panakit na king anghel at mitakutan ya.

¹³Oneng ngana ning anghel, Zacarias, e ka tatakut! Dimdam na ning Dios ing kekang panalangin, inya manganak yang metung a lalaki ing asawa mung i Elizabeth. Pamalagyuan meng Juan.

¹⁴Tumula ka at magsaya, at dakal lang tumula king pangabait na

¹⁵uling maging marangal ya king panimanman na ning Ginu! E ya minum alak o nanumang inuman a makalasing. At mikatmuan ya king Banal a Espiritu manibat king pangabait na.

¹⁶Dakal la karing anak na ning Israel ding papagbalikan na king Ginung karelang Dios.

¹⁷Datang yang mumuna king Ginu, masikan at mayupayang antimo i propeta Elias ba na lang pikasunduan pasibayu ding tata at ding anak; ban tuntun la ding makasalanan king dalan da ring matulid, at ban isadia ne para king Ginu ing balen a pinili na.

¹⁸Nganang Zacarias king anghel, Makananu kung abalu king tutu yan? Matua na ku at antimu rin ing asawa ku.

¹⁹Aku i Gabriel, nganang mekibat ning anghel, makatalakad ku arap ning Dios a mitubud kanaku ban sabian ku at ipayabut keka iting mayap a balita.

²⁰Oneng e mu pala paniwalan ing balita ku a tutu namang mapalyari potang miras na ing mituldung panaun. Mapipi ka uling e ka meniwala. Manatili kang e makapagsalita anggang e matupad ing pangaku ku keka.

²¹Panenayan deng lumual ding tau i Zacarias; pigmulalan da nung baket meluat yang tutu kilub ning Templo.

²²Inyang linual ya, e ya makapagsalita karela. Inya inisip da king menakit yang metung a vision[2] kilub ning Templo. Uling e ya makapagsalita, sisinial na namu karing gamat na ing buri nang sabian karela.

²³Kayari na ning pamagsilbi na king Templo, minuli ya bale na i Zacarias.

²⁴Kalabas da ring mapilan a aldo, milamnan ya i Elizabeth a asawa na at migdatun ya king bale kilub ding limang bulan.

²⁵Nganang sinabing Elizabeth, Seupan na ku mu rin ning Ginu king kapamilatan na niting mepalyari. Segipan na ku king maragul a kamarinayan king arapan da ring tau!

²⁶Inyang kanam na nang bulan Elizabeth, tinubud ne ning Dios ing anghel Gabriel karin Nazaret, ing metung karing balen na ning Galilea.

²⁷Atin yang balita para king metung a babaing birhen a makapangakung kasal king lalaking milagyuan Jose a ibat king lahi nang Aring David.[3] Maria ing lagyu na ning babaing birhen.

²⁸Dinatang ya kang Maria ing anghel at ngana, Ing kapayapan manatili keka![4] Ing Ginu atyu keka at binendisyunan na kang e mu nanu!

²⁹Tutu yang melingasngas a lub i Maria uli na niting amanung sinabi na ning anghel at isip-isipan na nung nanu ing kabaldugan na niti.

³⁰Ngana ning anghel, Maria, e ka mitatakutan uling meging malam ya lub keka ing Dios.

³¹Milamnan ka at ibait me ing metung a anak a lalaki at pamalagyuan meng Jesus.

³²Maging marangal ya at mayaus yang Anak ning Kakataskatasan a Dios. Gawan neng ari ning Ginung Dios, antimo i David a makatua na.

³³Ya ing maging ari da ring lahi nang Jacob king sablang panaun at e ya mapupus ing kayarian na kapilan man!

³⁴Nganang sinabing Maria king anghel, Makananung mapalyari iti kabang ala na ku mang asawa?[5]

³⁵Pekibat na ning anghel, Datang ya keka ing Banal a Espiritu at lilungan na ka ning upaya na ning Dios. Uli na niti, mayaus yang Anak ning Dios ing banal a anak a mibait keka.

³⁶Lawan me i Elizabeth a kamaganak mu. Sasabian da ring tau king e ne manganak, oneng ngeni kanam na na, agyamang matua ne.

³⁷Uling alang bage a e na apapaliarian ning Dios.

³⁸Nganang Maria, Talasuyu na ku ning Ginu, marapat sa kanaku antimo ing sinabi mu. At likuan ne ning anghel.

³⁹E melambat, ginayak ya i Maria at mamalagua yang minta king metung a balen king kabundukan na ning Judea.

⁴⁰Minta ya king bale nang Zacarias at dininan neng mayap a oras i Elizabeth.

⁴¹Inyang dimdam nang Elizabeth ing pamagmananu[6] nang Maria, ginalo[7] ya ing anak king atian na. At i Elizabeth, kitmuan king Banal a Espiritu,

⁴²migsalita yang masikan. Ngana, Mapalad[8] ka karing sablang babai! At mapalad ya ing anak a mibait keka!

⁴³Makananu kung pengaintuliran ing dalawan na ku ning ima na ning kanakung Ginu?

⁴⁴Uling kabud dimdam ku ing kekang pamagmananu ginalo ya ing anak king atian ku king tula.

⁴⁵Mapalad ka uling paniwalan mu king ing balita na keka ning Ginu mipaltutu!

⁴⁶Nganang Maria, Ing pusu ku pupurian ne ing Ginu;

⁴⁷magsaya ya ing kaladua ku uli ning Dios a kakung Talapagligtas,

⁴⁸uling e na ku kelinguan, akung maluka nang talasuyu! Manibat ngeni ausan da kung mapalad ding sablang tau,

⁴⁹uli ning mangaragul a bage a depat na kaku ning Mayupayang Dios. Banal ing lagyu na;

⁵⁰lulunusan na la ding ating takut keya, karing sablang mituki-tuking lahi.

⁵¹Inatiat ne ing mayupaya nang takde, at simbulat na la ding mangatas a lub ketang kapalaluan ning karelang nasa.

⁵²Bigsak na la ding ari ibat karing karelang tronu, at ding atyu king kababan ilang tinas na.

⁵³Pepakabsian na la ding danupan karing mayap a bage, at pepalakuan na lang alang darala ding mabandi.

⁵⁴Tiparan na ing pengaku na karing makatua tamu at dinatang ya ba neng saupan ing Israel a talasuyu na;

⁵⁵ pepakitanan neng lunus i Abraham at ding sablang lahi na king kapilan pa man!

⁵⁶At inabayan neng Maria i Elizabeth kilub ding atlung bulan. Kaybat na nita, minuli ne.

⁵⁷Dinatang ing aldo nang pamanganak Elizabeth, at beit ne ing metung a anak a lalaki.

⁵⁸Abalu da ring siping nang bale at kamaganak ing makapagmulala nang kayapan ning Ginu kang Elizabeth. At mekipagsaya la ngan kang Elizabeth.

⁵⁹Mesirkunsisyun[9] ya ing anak inyang walu neng aldo tua. Pamalagyuan de sanang Zacarias, ing lagyu nang tata na,

⁶⁰oneng nganang tinutul ima na, Ali, Juan ing lagyu na.

⁶¹Ngara kang Elizabeth, Ala metung man karing kamaganak mu a makanyan a lagyu!

⁶²Inya sininialan de ing tata; kitang da nung nanu ing buri nang ipamalagyu king anak.

⁶³Meniawad yang apisulatanan i Zacarias at sinulat na, Ing lagyu na Juan. Mipamulala la ngan!

⁶⁴Kanita mu rin mekapaniabi yang pasibayu i Zacarias at pinuri ne ing Dios.

⁶⁵Tiblan na la ngan ning takut ding sablang siping dang bale at mikalat ing balita tungkul king mepalyari king mabilug a kabundukan na ning Judea.

⁶⁶Kukutang da ring sablang mekabalita kaniti, Nanu kaya ing paintungulan na ning anak a iti? Masala king ing upaya na ning Ginu atyu keya.

⁶⁷I Zacarias, ing tatang nang Juan, mikatmuan ya king Banal a Espiritu at nganang migsalita,

⁶⁸Purian ta ya ing Ginu, ing Dios ning Israel! Inatdanan na lang kasaupan ding memalen na at pinalaya[10] na la.

⁶⁹Dininan na katamung metung a mayupayang Talapagligtas a ibat king lahi nang David[11] a talasuyu na.

⁷⁰Iti ya ing malambat na nang pengaku king kapamilatan ding banal nang propeta:

⁷¹king iligtas na katamu karing kekatamung kalaban, at karing gamat ding sablang masama kekatamu.

⁷²Pengaku na naman ing pakit yang lunus karing makatua tamu, at ganakan ne ing banal nang kasunduan.

⁷³Yan ing pangaku a sinumpa na kang Abraham a makatua tamu;

⁷⁴king iligtas na katamu karing kekatamung kalaban; ban malaya[12] tamung makasamba keya;

⁷⁵ban maging banal tamu at maging matulid king panimanman na king kekaban ning bie tamu.

⁷⁶Ika, anak ku, mayaus kang propeta na ning Kakataskatasan a Dios. Datang kang makauna king Ginu ban isadia mu ing dalanan na,

⁷⁷at ituru me king balen na ing dalan ning kaligtasan, ing pangapatawad ding karelang kasalanan.

⁷⁸Ing Dios tamu tune yang mapaglunus at maganaka. Ing munag ning kaligtasan ipaslag ne kekatamu,

⁷⁹at ibat banua sunlag ya karing atyu king karalumduman, at karing atyu king lilung ning kamatayan ban ituntun na katamu king dalan ning kapayapan.

⁸⁰At dinagul ya ing anak at sinulung ya pamikakatawan at espiritu. Menuknangan ya king disyerto angga king panaun a linual ya ban pakilala ya king Israel.